ދުނިޔޭގެ މައްސަލަތަކަށް ހައްލު ހޯދުމަށް، ގުޅިގެން މަސައްކަތް ކުރުމަކީ ރާއްޖެއިން އަބަދުވެސް ތާއީދުކުރާ ކަމެއް: އާސިމް
26 ޖޫން 2017 | ހޯމަ 10:12އދގެ ތެރެއިން ހުރިހާ ގައުމަކަށް ހަމަހަމަ ފުރުސަތު ލިބިގެންދޭ
އދ. ގެ ގޮތްޕެއް ކަމަށްވާ ހިއުމަން ރައިޓްސް ކޮމިޝަން
ދުނިޔޭގެ މައްސަލަތަކަށް ހައްލު ހޯދުމަށް ގުޅިގެން މަސައްކަތް ކުރުމަކީ ރާއްޖެއިން އަބަދުވެސް ތާއީދުކުރާ ކަމެއް ކަމަށާއި އެކަމަށް އދ. ގެ ތެރެއިން ހުރިހާ ގައުމަކަށް ހަމަހަމަ ފުރުސަތު ލިބިގެންދާ ކަމަށް ފޮރިން މިނިސްޓަރ ޑރ. މުހައްމަދު އާސިމް ވިދާޅުވެއްޖެއެވެ.
ޑރ. އާސިމް މިހެން ވިދާޅުވީ އދ. އުފެދުނުތާ 72 ފުރުމާއި ގުޅިގެން އާންމު ކުރެއްވި މެސެޖުގައެވެ.
ޑރ. އާސިމްގެ މެސެޖުގައި އދ. އުފެއްދީ "ދެވަނަ ބޮޑު ހަނގުރާމައިގެ އަޅިތަކުން ދުނިޔެ އަރައިގަތް ދުވަސްތަކުގެ ތެރޭގައި" ކަމަށާއި ވޭތުވެދިޔަ 72 އަހަރުގެ ތެރޭގައި އދ. ވެގެންދިޔައީ ދުނިޔޭގެ އެތައް މިލިއަން ބަޔަކަށް އުންމީދީ ދިރިއުޅުމެއް ހޯދައިދިނުމަށް މަސައްކަތް ކުރާ ޖަމާއަތެއްގެ ގޮތުގައި ކަމަށް ފާހަގަކުރައްވާފައި ވެއެވެ.
އދ. ގެ މެންބަރަކަށް ރާއްޖެ ވީ 1965 ވަނަ އަހަރު މިނިވަންކަން ހޯދުމަށްފަހުއެވެ. ޑރ.
އާސިމް ވިދާޅުވީ ރާއްޖެއަކީ އޭރު އދ.އާ ގުޅުނު އެންމެ ފުރަތަމަ "މައިކްރޯ ސްޓޭޓް" ކަމަށެވެ. ރާއްޖެއަކީ ކުޑަ ގައުމަކަށް ވުމާ ގުޅިގެން، އދ. ގެ ޗާޓަރުގައިވާ ޒިންމާތައް ފުރިހަމަ ކުރުމުގައި ގިނަ ގޮންޖެހުންތަކެއް ކުރިމަތިވާނޭ ކަމަށް އޭރު ދެކެވުނު ކަމަށް ވެސް މިނިސްޓަރ ވިދާޅުވިއެވެ.
ނަމަވެސް، އދ. ގެ "އެއް ގައުމު، އެއް ވޯޓު" އުސޫލުގެ ދަށުން އެހެން ގައުމުތަކާ އެއް ހަމައެއްގައި ރާއްޖެއަށް ހަރަކާތްތެރިވުމުގެ ފުރުސަތު ލިބިގެންދިޔަ ކަމަށް ޑރ. އާސިމް ފާހަގަކުރެއްވިއެވެ. މި އުސޫލުގެ ދަށުން ރާއްޖެ އާއި ދިވެހިންގެ ހުރި ކަންބޮޑުވުންތަކާ ގޮންޖެހުންތަކަށް ހައްލު ހޯދާ، އެއް ހަމައެއްގައި މިނިވަންކަމާއެކީ މަސައްކަތް ކުރުމުގެ ފުރުސަތު ލިބި، ތަރައްގީވުމުގެ ފުރުސަތު ލިބިފައިވާ ކަމަށް ވެސް މިނިސްޓަރ ވިދާޅުވިއެވެ.
ކުދި ގައުމުތަކަށް މިނިވަންކަމާއެކީ ހިޔާލުފާޅުކޮށް މަސައްކަތް ކުރުމުގެ ފުރުސަތު އެންމެ ފުޅާކޮށް އެގައުމުތަކަށް ފޯރުކޮށްދީފައި ވަނީ އދ. ގެ ޗާޓަރުން ކަމަށް އެ މެސެޖުގައި މިނިސްޓަރ ވިދާޅުވިއެވެ. އަދި، އދ. ގެ ޗާޓަރުގެ އުސޫލުތައް ގާއިމްކުރުމާއި ހަމަހަމަ، އަމަންއަމާން ޖަމާއަތެއް ގާއިމްކުރުމަށް ރާއްޖެއިން ފުރިހަމައަށް އެއްބާރުލުން ދިނުމަށް ތައްޔާރު ކަމަށް ވެސް މިނިސްޓަރ އާސިމް ވިދާޅުވިއެވެ.
