މިއީ ބިރުން ތިއްބެވި ފަނޑިޔާރުންނަށް ލިބުނު އުފަލެއް: އަބްދުﷲ ރިޔާޒު

މިއީ ބިރު ފަހަނަ އަޅައި ދާން ވީ ވަގުތު ކަމަށާއި ބިރުން ތއްބެވި ފަނޑިޔާރުންނާއި ކުންފުނިތަކުގެ މުވައްޒަފުންނަށް ލިބުނު ހިތްހަމަ ޖެހުމެއް ކަމަށް ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.

މީޑިއާތަކަށް ދެއްވި ޕްރެސްގައި މަސީހުގެ އިތުބާރު ނެތްކަމުގެ ސޮއި ރިޔާޒު ސިފަކުރެއްވީ ހުރިހާ ރައްޔިތުންނަށް ލިބުނު "ޖިހާދެއްގެ" ގޮތުގައެވެ.

Advertisement

ރިޔާޒު ވިދާޅުވީ މަސައްކަތުގެ ހިތްވަރަކީ ރައްޔިތުން ކަމަށާއި މިއީ މަސީހާ ދޭތެރޭ އަދި ރައީސް ޔާމީނާ މެދު އޮތް ޒާތީ މައްސަލައެއް ނޫން ކަމަށެވެ.

ރައީސް ޔާމީނަށް ތާއިދު ކުރެއްވި ބޭފުޅުން ނެންގެވީ ގައުމައްޓަކާ ރަނގަޅު ރިސްކެއް ކަމަށް ރިޔާޒު ވިދާޅުވިއެވެ.

ރިޔާޒު ވިދާޅުވީ ރައްޔިތުން ތިބި ގޮތް އެނގިގެން ހިނގައްޖެ ކަމަށާއި ގާނޫނުތަކާއި އެއްގޮތަށް މައްސަލަތައް ނިންމަން ކޯޓުގެ ގާޒީންނަށް ގޮވާލާ ކަމަށެވެ. ކޯޓުތަކުގެ ގާޒީންނަށް ޕްރެޝަރ އޮތް ނަމަވެސް މަސީހުގެ އިތުބާރު ނެތްކަން ފާސްވުމާއެކު ހުރިހާ މުއައްސަސާއެއް ވެސް މިނިވަންވާނެ ކަމަށް އޭނާ ވިދާޅުވިއެވެ. މިނިވަން މުއައްސަސާގެ ބޭފުޅަކު ވަކިކުރެއްވުމުގެ ބާރެއް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމުގެ އަތްޕުޅުގައި ނެތް ކަމަށް ވެސް ރިޔާޒު ވިދާޅުވިއެވެ.

"އަޅުގަނޑުމެން މިދައްކާލީ އަދި 45 މެމްބަރުން. އަދި ކުރިއަށް އޮތްތަނުގައި މިއަދަދު ގިނަވާނެ. މިއައި ބަދަލާ އެކު ފަނޑިޔާރުގެއަށް ވެސް މުއައްސަސާތަކަށް ވެސް އަލުން ވިސްނަވާނެ ކަމަށް އުންމީދު ކުރަން،" ރިޔާޒު ވިދާޅުވިއެވެ.

މީގެ އިތުރުން އެކި ތުހުމަތުތައް ކޮށްގެން ހައްޔަރުކޮށްފައިވާ ސިޔާސީ ލީޑަރުން ވަގުތުން މިނިވަން ކުރެއްވުމަށް އެޓާނީ ޖެނެރަލް މުހައްމަދު އަނިލް އަށް ވަނީ ގޮވާލައްވާފައެވެ. ރިޔާޒު ވިދާޅުވީ މިހާރު ގައުމުން އަރުވާލެވިގެން ތިއްބެވި ސިޔާސީ ބޭފުޅުން މިގައުމަށް އަނބުރާ އައިސް ގައުމަށް ޚިދުމަތް ކުރައްވަން ޖެހޭ ކަމަށް އޭނާ ވިދާޅުވިއެވެ.

ރިޔާޒު ވިދާޅުވީ ނަޝީދުގެ މައްސަލަ އަނބުރާ ގެންދަންޖެހޭ ކަމަށާއި ރައީސް ނަޝީދުގެ މައްޗަށް ޓެރަރިޒަމްގެ ދައުވާ ނުކުރެވޭނެ ކަމަށެވެ. އަދި މާމިގިލީ ދާއިރާގެ މެމްބަރު ގާސިމްއިބްރާހިމްގެ މައްޗަށް ދެއްކެވި ވާހަކައަކުން ކޮރަޕްޝަންގެ ދައުވާ ނުކުރެވޭނެ ކަމަށާއި ދިއްގަރު ދާއިރާގެ މެމްބަރު އަހުމަދު ފާރިސްގެ މައްޗަށް ޝަހުސް އޮޅުވާލުމުގެ ދައުވާއެއް ނުކުރެވޭނެ ކަމަށެވެ.

މަސީހުގެ އިތުބާރު ނެތްކަން މިއަދު ހާމަވެފައިވާ ކަމަށާއި އެހެންކަމުން ވަގުތުން އިސްތިއުފާދޭންޖެހޭނެ ކަމަށް އޭނާ ވިދާޅުވިއެވެ.

"މިހާރު ލެޖިޓިމަސިއެއް ނެތް. މެޖޯރިޓީ މިއޮތީ އެހެން ބުނެފައި. އިތުރު ރޯލް ކޯލެއް ހަދާކަށް ދެން ނުޖެހޭނެ. މަސީހު ވަގުތުން އިސްތިއުފާ ދެއްވަން ޖެހޭނެ." ރިޔާޒު ވިދާޅުވިއެވެ.

މަޖިލީހުގެ މެޖޯރިޓީ މިހާރު އޮތީ އިދިކޮޅު ފަރާތްތަކުގެ އަތުގައި ކަމަށް ރިޔާޒު ވިދާޅުވިއެވެ. އަދި މިކަމަށް ފުލުހުންނާއި ސިފައިން އެއަށް އިހުތިރާމް ކުރެއްވުން އެދިލައްވާ ކަމަށް އޭނާ ވިދާޅުވިއެވެ.

"ކޮށި ޖަހައިގެން ގެންގުޅުނު މެންބަރުން ފަޅާލާފައި އެ ނިކުތީ. ބިރު ގަންނާނެ ކަމެއް ނެތް. އެންމެ ފަހު ވަގުތާ ޖެހެންދެން ވެސް ދެމި ހުންނާނަން" ރިޔާޒު ވިދާޅުވިއެވެ.