ސަރވިސް ޗާރޖު ލިސްޓުގެ އެންމެ ކުރީގައި 'ޝެވަލް ބްލޭންކް ރަންދެލި' ހިމެނިއްޖެއެވެ.

އެގޮތުން ރިސޯޓުތަކުގެ މުވައްޒަފުން ދޭ މައުލޫމާތުގެ މައްޗަށް މޯލްޑިވްސް ސާވިސް ޗާޖުން އެކުލަވާލާ ތަފާސްހިސާބުތަކުން ދައްކާގޮތުގައި މިދިޔަ ޑިސެމްބަރު މަހު ރަންދެލިން ވަނީ 1,903.28 ޑޮލަރު ސަރވިސް ޗަރޖުގެ ގޮތުގައި ދީފައެވެ. ނޮވެމްބަރު މަހު ރަންދެލި ހިމެނުނީ ލިސްޓުގެ ދެވަނައިގައެވެ. ނޮވެމްބަރު މަހު ރަންދެލިން ސަރވިސް ޗާރޖުގެ ގޮތުގައި ދީފައިވަނީ 1,329.31 ޑޮލަރެވެ. އެއީ 573 ޑޮލަރުގެ ކުރިއެރުމެކެވެ.

ލިސްޓުގެ ދެވަނައިގައި ހިމެނިފައިވާ 'ދަ ސެއިންޓް ރިޖިސް ވޮއްމުލި" ރިސޯޓުން ވަނީ ސަރވިސް ޗަރޖުގެ ގޮތުގައި ޑިސެމްބަރު މަހު 948.67 ޑޮލަރު ދައްކާފައެވެ. ވޮއްމުލި ރިސޯޓު ނޮވެމްބަރު މަހު ހިމެނުނީ ލިސްޓުގެ 5 ވަނައިގައެވެ. އެއީ 789.81 ޑޮލަރު ސަރވިސް ޗަރޖުގެ ގޮތުގައި ދީގެންނެވެ.

ނޮވެމްބަރު މަހު ލިސްޓުގެ އެއް ވަނައިގައި އޮތް 'ވެލާ ޕްރައިވެޓް އައިލެންޑް' މިދިޔަ ޑިސެމްބަރު މަހު ހިމެނިފައިވަނީ ލިސްޓުގެ ތިން ވަނައިގައެވެ. ވެލާ ޕްރައިވެޓް އައިލެންޑުން ނޮވެމްބަރު މަހު 1329.31 ޑޮލަރު ސަރވިސް ޗާރޖުގެ ގޮތުގައި ދިން އިރު ޑިސެމްބަރު މަހު ދީފައިވަނީ 931.84 ޑޮލަރެވެ. އެއީ 397.47 ޑޮލަރުގެ ދަށްވުމެކެވެ.

ލިސްޓުގެ 10 ވަނައިގައި ހިމެނިފައިވަނީ 'ތާޖް އެގްޒޯރިކާ ރިސޯޓް އެންޑް ސްޕާ'އެވެ. ޑިސެމްބަރު މަހު 'ތާޖް އެގްޒޯރިކާ ރިސޯޓް އެންޑް ސްޕާ'އިން ދައްކާފައިވަނީ 460 ޑޮލަރެވެ.

ރިސޯޓުތަކުން އެކަށީގެންވާ މިންވަރަކަށް ސާވިސް ޗާޖު ނުދޭ މައްސަލަ އަކީ ފެށުނީއްސުރެ ހައްލު ނުކުރެވި އޮތް މައްސަލައެކެވެ. މިނިސްޓަރ ވަނީ ގިނަ ރިސޯޓުތަކުން މުވައްޒަފުންނާ މެދު އަމަލު ކުރަމުން އަންނަނީ ރަނގަޅަށް ކަމަށާއި ވަކިން ހާއްސަކޮށް ދިވެހިން ހިންގަމުން އަންނަ ރިސޯޓުތަކުން ރަނގަޅު ސަރވިސް ޗާޖުތަކެއް ދެމުން އަންނަކަން ފާހަގަކުރެވިފައިވާ ކަމަށް މިނިސްޓަރ ވަނީ ނޫސްވެރިންގެ ބައްދަލުވުމެއްގައި ވިދާޅުވެފައެވެ. މިހެން ވިދާޅުވުމާއި ގުޅިގެން މިނިސްޓަރަށް ގިނަ ރިސޯޓު މުވައްޒަފުންގެ ފާޑު ކިއުންތައް ވަނީ އަމާޒުވެފައެވެ. ސަރުކާރުގެ ބައެއް އިސްވެރިން ގެންދަވަނީ މިނިސްޓަރުގެ ދިފާއުގައި ވާހަކަދައްކަވަމުންނެވެ.