ވެލިގާ ހާރޑްވެއަރގެ ކޯޕޮރޭޓް ސަރވިސް ސެންޓަރު ހުޅުވައިފި
ރާއްޖޭގައި ހާޑްވެއަރ ފިހާރައަކުން ހުޅުވި ފުރަތަމަ ކޯޕޮރޭޓް ސަރވިސް ސެންޓަރު
ވެލިގާ ހާޑްވެއަރ ގެ ފިހާރައެއް
ވެލިގާ ހާޑްވެއަރގެ ކޯޕޮރޭޓް ކަސްޓަމަރުންނަށް ހާއްސަ ކޮށްގެން ސަރވިސް ސެންޓަރެއް ހުޅުވައިފިއެވެ.
މާފަންނު ބުރު ކައިރީގައި ހުންނަ ވެލިގާ ހާޑްވެއަރ ފިހާރަ އަލުން ރީބްރޭންޑް ކުރުމަށްފަހު ކޮޕަރޭޓް ކަސްޓަމަރ ސަރވިސް ސެންޓަރެއްގެ ގޮތުގައި ހުޅުވާފައިވަނީ ބުރާސްފަތި ދުވަހުގެ ރޭ އެވެ. މި ސެންޓަރުން ހުކުރު ދުވަސް ފިޔަވާ ކޮންމެ ދުވަހަކު ހެނދުނު 8 އަކުން އިރުއޮއްސި 6 އަކަށް ހިދުމަތް ލިބޭނެ ކަމަށް ވެލިގާ އިން ބުންޏެވެ.
މިއީ ރާއްޖޭގައި، ހާޑްވެއަރ ފިހާރައަކުން ހުޅުވި ފުރަތަމަ ކޯޕޮރޭޓް ސަރވިސް ސެންޓަރެވެ.
ރާއްޖެއެމްވީ އަށް މައުލޫމާތު ދެއްވަމުން ވެލިގާ ކުންފުނީގެ ޑިރެކްޓަރު އައްބާސް މުހައްމަދު ވިދާޅުވީ މިއީ ކޯޕޮރޭޓް ކްލަޔަންޓުންނަށް ދެވޭ ހިދުމަތުގެ ފެންވަރު ރަނގަޅު ކުރުމުގެ ގޮތުން އެ ކުންފުނިން ހުޅުވި ސެންޓަރެއް ކަމަށާއި އެ ސެންޓަރުން މުދާ ގަތުމުގެ އިތުރަށް ކަސްޓަމަރުންނަށް މުދަލުގެ އަޖުމަ ބަލާލުމުގެ ހިދުމަތްވެސް ލިބިގެންދާނެ ކަމަށެވެ. އަދި އެ ސެންޓަރ ބޮޑަށް ބައްޓަން ކުރެވިފައިވަނީ "އެކްސްޕީރިއަންސް" ސެންޓަރެއްގެ ހިދުމަތް ދޭ ގޮތަށް ކަމަށް އައްބާސް ވިދާޅުވިއެވެ.
ސެންޓަރުގެ މުވައްޒަފުންނަކީ ވަރަށް ރަނގަޅަށް ތަމްރީނު ކުރެވިފައިވާ ގާބިލު ކުދިންތަކެއް ކަމަށް ވެސް ވެލިގާ އިން ވަނީ ފާހަގަކޮށްފައެވެ.
ކޯޕަރޭޓް ކަސްޓަމަރުންގެ އިތުރުން ފިހާރައަށް އަންނަ ކަސްޓަމަރުންގެ ތެރެއިން ވެލިގާގައި ރަޖިސްޓްރީ ކުރެވިފައިވާ ފަރާތްތަކަށް ވެސް ފިހާރައިން ހިދުމަތް ލިބިގެންދާނެ ކަމަށް ވެސް އެ ސެންޓަރުން ބުންޏެވެ.
ވެލިގާގެ ކޯޕޮރޭޓް ކަސްޓަމަރ މެނޭޖަރ މިފްޒާން މުޙައްމަދު ވިދާޅުވީ އެބޭފުޅުންގެ އަމާޒަކީ އެއްވެސް ދަތި ކަމެއްނެތި ކަސްޓަމަރުންނަށް ހިދުމަތް ލިބޭނެގޮތް ހަދައިދީ، ވީހާވެސް އަވަސް ހިދުމަތެއް ފޯރުކޮށްދިނުން ކަމުގައެވެ.
ވެލިގާ ހާޑްވެއަރގެ ކޯޕަރޭޓް ކަސްޓަމަރ ސެންޓަރ އިން ދެމުން ގެންދާ ހިދުމަތްތަކާއި ބެހޭ ގޮތުން އިތުރު މައުލޫމާތު ހޯދުމަށް 3333881 ނަންބަރަށް ގުޅުމަށް ވެލިގާ އިން ވަނީ އެދިފައެވެ.
ވެލިގާ ހާޑްވެއަރ އަކީ 2008 ވަނަ އަހަރުން ފެށިގެން ފުޅާ ދާއިރާއެއްގައި ހާޑްވެއަރ އާއި މަސައްކަތު ސާމާނު ވިއްކަމުން ކުންފުންޏެކެވެ. އެތަނުގެ މަޝްހޫރު ބްރޭންޑްތަކުގެ ތެރޭގައި މެޓާބޯ، ޝެލީސް، ވީރާ އަދި މަކީޓާ ހިމެނެއެވެ.
