އީޕީއެލް: ޝެފިލްޑް ބަލިކުރުމަށްފަހު ލިވަރޕޫލުން ތައްޓާ ގާތަށް

ފަސޭހަކަމާއިއެކު ޝެފިލްޑް ޔުނައިޓެޑް ބަލިކޮށް، އިނގިރޭސި ލީގު ތަށި ހޯދުމާ އެއް ފިޔަވަޅު ގާތަށް ލިވަރޕޫލް ޖެހިލައިިފިއެވެ.

ލިވަރޕޫލްގެ އެންފީލްޑްގައި ކުޅުނު މެޗުން ޝެފިލްޑްގެ މައްޗަށް ލިވަރޕޫލުން ކުރިހޯދީ، 2-0 ގެ ނަތީޖާއަކުންނެވެ. މި މޮޅާއެކު ލިވަރޕޫލް ވަނީ ލީގު މެޗަކުން ބަލިނުވާތާ އަހަރެއް ފުރިހަމަކުރި ތިންވަނަ އިނގިރޭސި ޓީމަށް ވެގެން ގޮސްފައެވެ.

މެޗުގެ ކުޅުން ފެށިގެން މާގިނައިރުތަކެއް ނުވަނީސް ލިވަރޕޫލުން ވަނީ ގޯލެއް ޖަހާ މެޗުގެ ލީޑު ނަގާފައެވެ. މިލަނޑު ލިވަރޕޫލަށް މެޗުގެ ހަތަރުވަނަ މިނިޓުގައި ކާމިޔާބުކޮށްދިނީ، އެންޑީ ރޮބަރޓްސަން ފަހިކޮށްދިން ފުރުސަތަކުން، އެޓީމަށް ކުޅެމުން އަންނަ މިސްރުގެ ހުނަރުވެރި ފޯވާޑް މުހައްމަދު ސަލާހެވެ.

ފުރަތަމަ ލަނޑަށް ފަހުވެސް ލިވަރޕޫލުން ގިނަ ފުރުސަތުތަކެއް ހޯދި ނަމަވެސް، ޝެފިލްޑް ޔުނައިޓެޑުގެ ކީޕަރު ޑީން ހެންޑަރސަން ވަނީ ވަރަށް ހުށިޔާރުކަމާއިއެކު އޭނާގެ ގޯލަށް އަމާޒުވީ ހުރިހާ ހަމަލާއެއް ދިފާއުކޮށްފައެވެ. ފުރަތަމަ ހާފު ނިމިގެން ދިޔައީ 1-0 ނަތީޖާއަކުން ލިވަރޕޫލް ކުރީގައި އޮވެއެވެ.

ދެވަނަ ހާފުގެ ކުޅުން ފެށިގެންވެސް ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ލިވަރޕޫލުންނެވެ. މި ހާފުގެ 61 މިނިޓުގައި ސަލާހު ފޮނުވާލި ބޯޅައެއް ޝެފިލްޑްގެ އަރިމަތީ ދަނޑިއަށް އަމާޒުވިއެވެ. އޭގެ އިރުކޮޅެއް ފަހުން ސަދިއޯ މާނޭ ވަނީ ލިވަރޕޫލްގެ ދެވަނަ ލަނޑުޖަހާ މެޗުގެ ނަތީޖާ 2-0 ކަށް ބަދަލުކޮށްފައެވެ.

މި މޮޅާއެކު ލިވަރޕޫލު އޮތީ ކުޅުނު 20 މެޗުން ލިބުނު 58 ޕޮއިންޓާއެކު ލީގު ތާވަލުގެ އެއްވަނައިގައެވެ. ވާދަވެރި ޓީމުތަކުން 21 މެޗު ކުޅެފައިވާއިރު، ދެވަނައިގައި އޮތް ލެސްޓަރ ސިޓީއާ ލިވަރޕޫލާ އޮތް ފަރަގު ވަނީ 13 އަށް އިތުރުވެފައެވެ.