އަލީ ވަހީދުގެ ވާހަކަތައް ލޭބަރ ޕާޓީން ދޮގުކޮށް، މިނިސްޓަރުގެ އިސްތިއުފާއަށް ގޮވާލައިފި

ލޭބަރ ޕާޓީ އާއި ޓީމްގެ މެމްބަރުން ރިސޯޓެއްގެ މެނޭޖުމެންޓުން ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)އަށް ސްޓާފެއްގެ ބޮލަށް 6.50 ޑޮލަރު ދައްކަން ޖެހޭ ގޮތަށް މަޖުބޫރު ކުރުވާ ސިޓީއެއް ދިނުމަށް އިންޒާރު ދެމުންދާ ކަމަށް ޓުއަރިޒަމް މިނިސްޓަރ އަލީ ވަހީދު ދެއްކެވި ވާހަކަތައް އެ ޕާޓީން ދޮގުކޮށްފިއެވެ.

މިކަމާއި ގުޅިގެން އެ ޕާޓީން ނެރުނު ބަޔާނުގައި ވަނީ މިނިސްޓަރ ކުރެއްވި ޓްވީޓުގައި ވަނީ އެޕާޓީ ބަދުނާމު ވާގޮތަށް ދެއްކެވި ވާހަކައެއް ކަމަށެވެ. އަދި އެ ޓުވީޓުގައި އެ ޕާޓީއާއި ބެހޭގޮތުން ބަޔާންކޮށްފައިވާ ވާހަކަތަކަކީ ނުހަނު ކަންބޮޑުވާ ކަމެއް ކަމަށާއި، ޙަޤީގަތާއި ހިލާފު ބަލައިގަނެވޭނެ ވާހަކައެއްނޫން ކަމަށެވެ. މީގެ އިތުރުން އެ ބަޔާނުގައި ވަނީ މިނިސްޓަރަށް އަދި އެއްވެސް އެހެން ފަރާތަކަށް ބިރުދެއްކުމުގެ ގޮތުން އެއްވެސްކަމެއް ކޮށްފައި ނުވާނެ ކަމަށެވެ.

Advertisement

އަދި ލޭބަރ ޕާޓީއަކީ ދިވެހިރާއްޖޭގެ މަސައްކަތްތެރިންގެ ޖަމިއްޔާތަކާއި، އަދި ޙާއްސަކޮށް ޓީމްއާއި ގުޅިގެން މަސައްކަތްތެރިންގެ ޙައްޤުގައި މަސައްކަތްކުރާ ޕާޓީއެއްކަމަށް ބަޔާނުގައިވެއެވެ. އެ ޕާޓީން ވަނީ ރިސޯޓް މުވައްޒަފުންގެ އަތުން އެއްވެސް ފައިސާއެއް ހޯދަން، މަޖުބޫރު ކުރުވާނެ ސިޓީއެއް ހޯދަން ޓޫރިޒަމް މިނިސްޓްރީގައި ނުވަތަ އެނޫން އެއްވެސް ތަނެއްގައި، އެ ޕާޓީން ނުވަތަ ޕާޓީއަށް ތާއިދުކުރާ ޖަމުއިއްޔާއަކުންވެސް އެދިފައި ނުވާނެ ކަމަށް ބުނެފައެވެ.

މީގެއިތުރުން ދިވެހިރާއްޖޭގެ މަސައްކަތްތެރިންގެ ހައްގުތައް ރައްކާތެރިކޮށް މަސައްކަތްތެރީން އިޤުތިސާދީ، އިޖްތިމާއީ އަދި ސިޔާސީ ގޮތުން ބާރުވެރިކުރުވުމަށް ކުރަންޖެހޭ އެންމެހައި މަސައްކަތްތައް ކުރުމަކީ ލޭބަރ ޕާޓީގެ މައިގަނޑު އެއް މަޤްސަދުކަމަށްވެސް ބުނެފައިވެއެވެ. އަދި ލޭބަރ ޕާޓީން ވަނީ މަސައްކަތްތެރިންނަށް ކުރިމަތިވެފައިވާ ގޮންޖެހުންތަކާއި ނިކަމެތިކަމުން މިންޖުކޮށް، ހާއްސަކޮށް ޓޫރިޒަމް ދާއިރާގެ ގިނަ މަސައްކަތްތެރިންނަށް ލިބެންވާ ހަމަ އުޖޫރަ ނުލިބުމާއި، ސާވިސް ޗާޖު އިންސާފުން ނުބެހުމުގެ އިތުރުން، މަސައްކަތްތެރިންގެ އަސާސީ ހައްޤުތަށް ނުލިބުމާއި، ޓުރޭޑް ޔޫނިޔަންތައް ހަދާ ހިންގުމުގެ ހައްޤުތަށް ކަށަވަރު ވެފައި ނުވުން، ކުއްވެރިކޮށްފައެވެ.

މަސައްކަތްތެރިންގެ ހައްޤުތަށް ހޯދައިދިނުމުގައި ކުރަންޖެހުނު ކޮންމެ ކަމެއް ކުރުމުގައި މަސައްކަތްތެރިންނާއެކު ދެމިއޮންނާނެ ކަމަށް ވެސް ބަޔާނުގައިވެއެވެ. އެ ޕާޓީން ވަނީ ދިވެހި ރައްޔިތުންގެ ފައިސާއިން މުސާރަދީ ރައްޔިތުންގެ ހައްޤުތަކާއި މަސްލަހަތުތަށް ރައްކާތެރި ކޮށްދެއްވުމުގެ ޒިންމާއާއި ހަވާލުވެފައިވާ މިނިސްޓަރުން ރައްޔިތުންނަށް ދޮގުހަދައި، އޮޅުވައިލައި އުފެދޭ މައްސަލަތަށް މަޝްވާރާގެ މަތީން ހައްލު ނުކުރެވޭނަމަ މަޤާމުން އިސްތިއުފާދިނުމަށް ގޮވާލާފައެވެ.