ޔޫރަޕުގެ ބޮޑެތި ކުލަބުތަކުން އޮބާމަޔަން އަށް ފާރަލަނީ

އާސެނަލްގެ ފޯވަރޑް ޕީއޭ އެމެރިކް އޮބާމަޔަން އަށް ޔޫރަޕުގެ ބޮޑެތި ކުލަބުތަކުން ފާރަލާން ފަށައިފިއެވެ.

މީޑިއާ ރިޕޯޓުތައް ބުނާގޮތުންނަމަ، އިންޓަރ މިލާންގެ ކޯޗު އެންޓޯނިއޯ ކޮންޓޭގެ ވިސްނުން ހުރީ މިސީޒަނަށް ފަހު އޮބާމަޔަން އަށް ބިޑު ކުރުމަށެވެ. އަދި އޮބާމަޔަންއަށް ކުރާ ބިޑުގެ ތެރެއިން އިންޓަރ މިލާންގެ ބައެއް ކުޅުންތެރިން އާސެނަލްއަށް ހުށަހަޅާނެއެވެ. އިންޓައިން އާސެނަލްއަށް ހުށަހަޅާނެ ކަމަށް ބެލެވޭ ކުޅުންތެރިންނަކީ އިޓަލީގެ ފޯވަރޑް މަޓެއޯ ޕޮލިޓާނޯ އާއި އުރުގުއޭގެ އެޓޭކިންގ މިޑްފިލްޑަރ މަޓިއަސް ވެސީނޯއެވެ. އޮބާމަޔަންގެ އިތުރުން އިންޓައިން އަންނަނީ ޗެލްސީގެ ފޯވަރޑް އޮލިވިއޭ ޖިރޫޑަށް ވެސް ފާރަލަމުންނެވެ.

އިންޓަރ މިލާންގެ އިތުރުން ސްޕެއިންގެ ޗެމްޕިއަން ބާސެލޯނާއިން ވެސް އަންނަނީ އޮބާމަޔަން އަށް ފާރަލަމުންނެވެ. އެގޮތުން ބާސާއަށް ދިމާވެފައިވާ އެޓޭކްލައިންގެ މައްސަލައަށް ހައްލެއް ހޯދުމަށް އެޓީމުން އަންނަނީ ކުޅުންތެރިންނަށް ފާރަލަމުންނެވެ. މީޑިއާ ރިޕޯޓްތައް ބުނާ ގޮތުން ބާސެލޯނާގެ އެއްވަނަ ޓާގެޓަކީ އޮބާމަޔަން އެވެ. އެގޮތުން އޮބާމަޔަން ހޯދުމަށް ބާސާއިން 50 މިލިއަން ޔޫރޯގެ ބިޑެއް ކުރުމަށް ތައްޔާރަށް އޮތްއިރު ބާސާގެ ބައެއް ކުޅުންތެރިން ވެސް އާސެނަލްއަށް ހުށަހަޅާނެއެވެ.

އޮބާމަޔަން ވިދާލީ އޭނާ ޖަރުމަނުގެ ޑޯޓްމަންޑަށް ކުޅުނު ދުވަސްވަރުގައެވެ. އެގޮތުން އޮބާމަޔަން ވަނީ ޑޯޓްމަންޑަށް އޭނާ ކުޅުނު 213 މެޗުން އެޓީމަށް 141 ލަނޑު ކާމިޔާބުކޮށްދީފައެވެ. އާސެނަލްއަށް 2017 ވަނަ އަހަރު އޮބާމަޔަން ގުޅުމަށްފަހު އޭނާ ވަނީ އެޓީމަށް ކުޅުނު 89 މެޗުން 56 ލަނޑު އެޓީމަށް ކާމިޔާބުކޮށްދީފައެވެ.

އަދި އޭނާގެ ގައުމުގެ ބޮންގެ ގައުމީ ޓީމަށް އޭނާ ކުޅެދިން 63 މެޗުން 25 ލަނޑު އޭނާ ވަނީ ކާމިޔާބުކޮށްދީފައެވެ.