ވޮލީބޯލް އެސޯސިއޭޝަނުން އަންނަ އަހަރަށް ބޮޑެތި ތައްޔާރީތަކެއް
ބީޗް ވޮލީ އާއި އިންޑޯ ވޮލީ ވަކިކުރުމަށް މަސައްކަތްތަކެއް ކުރެވޭނެ
ވީއޭއެމްގެ ޖެނެރަލް ސެކެޓްރީ އަދީލް ރާއްޖެޓީވީގެ ކުޅިވަރުފައިލްގައި ވާހަކަ ދައްކަވަނީ
އަންނަ އަހަރަށް ޕްލޭނެއްގެ ދަށުން ބޮޑެތި ތައްޔާރީތަކެއް ވަމުން އަންނަ ކަމަށް ވޮލީބޯލް އެސޯސިއޭޝަން އޮފް މޯލްޑިވްސްގެ ޖެނެރަލް ސެކެޓްރީ އަހުމަދު އަދީލް (ބޭބެ) ބުނެފިއެވެ.
ރާއްޖެޓީވީގެ "ކުޅިވަރުފައިލް" ޕްރޮގްރާމްގައި ވާހަކަ ދައްކަމުން ބޭބެ ބުނެފައި ވަނީ އަންނަ އަހަރަށް ތައްޔާރުވުމުގެ ގޮތުން ޕްލޭނެއް އެކުލަވާލުމުގެ މަސައްކަތް މިހާރު ކުރެވެމުންދާ ކަމަށެވެ. އެގޮތުން ވޮލީ ކުރިއެރުވުމަށް ކަންތައްތަކެއް ނުކޮށް ވޮލީ ކުރިނާރާނެ ކަމަށް ބޭބެ ބުނެފައި ވެއެވެ.
ހަމައެހެންމެ ބީޗް ވޮލީ އާއި އިންޑޯ ވޮލީ ވަކިކުރުމަށް ވެސް މަސައްކަތްތަކެއް ކުރެވެމުންދާ ކަމަށާއި އެހެނަސް މި ދެ ކުޅިވަރު ވަކިކުރުމަށް ތަފާތު އެކި ދަތިތަކަކާ ކުރިމަތިލާން ޖެހިފައިވާ ކަމަށް އަދީލް ބުނެފައި ވެއެވެ. އެގޮތުން މި ދެ ކުޅިވަރުގައި ކުޅުންތެރިންނަށް ލިބޭ އާމްދަނީގައި ބޮޑު ފަރަގެއް ހުންނަ ކަމަށާއި އެއް ލެވެލްއެއްގައި މި ދެ ކުޅިވަރުގައި ވާދަކުރާ ކުޅުންތެރިން މަދުކަން އަދީލް ފާހަގަކޮށްފައި ވެއެވެ. އެހެނަސް އަންނަ އަހަރުން ފެށިގެން ރިސޯޓުތައް މެދުވެރިކޮށް ބީޗް ވޮލީއަށް ކުޅުންތެރިން ތަމްރީނު ކުރުމަށް އެ އެސޯސިއޭޝަނުން ވިސްނަމުންދާ ކަމަށް އަދީލް ބުނެފައި ވެއެވެ.
ހަމަމިއާއެކު ދެން އެކުލަވާލާ ގައުމީ ވޮލީ ސްކޮޑުގައި ގިނަ އަދަދެއްގެ ޒުވާން ކުޅުންތެރިން ހިމެނުމަށް ނިންމާފައިވާ ކަމަށާއި މީގެ ތެރެއިން ގިނަ ކުޅުންތެރިން ވެގެންދާނީ އަތޮޅުތެރެއިން ހޮވާލެވޭ ކުޅުންތެރިންނަށް ކަމަށް އަދީލް ބުނެފައި ވެއެވެ. އެގޮތުން ޒުވާން ގައުމީ ޓީމަކަށް އަންނަ އަހަރު ރާއްޖެއިން ބޭރަށް ދިޔުމުގެ ފުރުސަތު ދޭން ނިންމާފައިވާ ކަމަށް އަދީލް ބުނެފައި ވެއެވެ.
ރާއްޖޭގައި ވޮލީއަކީ މަގްބޫލް ކުޅިވަރަކަށްވާއިރު މިފަދަ ޕްލޭނެއްގެ ދަށުން މަސައްކަތްތަކެއް ކުރެވިއްޖެ ނަމަ ބޮޑުތި ކުރިއެރުންތަކެއް ފެނިގެންދާނެއެވެ.
