އައިއެސްއާ ގުޅުން އޮންނަ ކަމުގެ ތުހުމަތުގައި ތުރުކީގައި 147 މީހަކު ހައްޔަރުކޮށްފި
އިސްތަންބުލް އިން 24 މީހަކު ހައްޔަރު ކޮށްފައިވޭ
ހައްޔަރު ކުރި މީހުންގެ ތެރޭގައި ސީރިޔާ މީހުން ހިމެނޭ
ޓެރަރިސްޓު ޖަމާޢަތެއް ކަމަށްވާ، އިސްލާމިކް ސްޓޭޓްގެ މެންބަރުން ކަމަށް ތުހުމަތު ކުރެވޭ ބަޔަކު ތުރުކީން ހައްޔަރު ކޮށްފިއެވެ.
ރިޕޯޓުތައް ބުނާގޮތުން ހައްޔަރު ކުރި 147 މީހުންގެ ތެރޭގައި އިރާގާއި ސީރިޔާ މީހުން ހިމެނެއެެވެ. މި މީހުން ހައްޔަރު ކޮށްފައިވަނީ ތުރުކީގެ ނުވަ ޕްރޮވިންސަކުންނެވެ. އޭގެ ތެރޭގައި ހޯމަ ދުވަހު ވެރިރަށް އިސްތަންބޫލުން ހައްޔަރުކުރި 24 މީހުން ހިމެނެއެވެ.
ތުރުކީން ވަނީ މި މަހު ކުރީކޮޅު އައިއެސްއާ ގުޅުން އޮންނަ ފްރާންސްގެ 11 މީހަކު އެ ޤައުމުން ޑިޕޯޓުކޮށްލާފައެވެ.
ތުރުކީއަކީ ބޭރު ޤައުމުތަކުން ހަނގުރާމަތަކަށް އަންނަ މީހުން ތިބޭ ''ހޮޓަލެއް'' ނޫން ކަމަށް ބުނެ، އެ ޤައުމުން ވަނީ މިދިޔަ މަހު އައިއެސްއާ ގުޅުން އޮންނަ ތުރުކީއާ ސީރިޔާ ޖަލު ތަކުގައި ތިބި މީހުން އެމީހުންގެ އަމިއްލަ ވަޒަނަށް ފޮނުވާލުމުގެ މަސައްކަތް ފަށާފައެވެ.
މިދިޔަ މަހު ތުރުކީން ހާމަކޮށްފައިވާ ތަފާސް ހިސާބުތައް ބުނާގޮތުން އެ ޤައުމުގެ ހައްޔަރުގައި 1،200 ވަރަކަށް އައިއެސްގެ ހަނގުރާމަވެރިން އެބަތިއްބެވެ.
