އެފްއޭއެމުން ނޫސްވެރިންގެ ބައްދަލުވުން އަލުން ފަށަނީ

ދިރާގު ދިވެހި ޕްރިމިއަރ ލީގުގެ މެޗުތަކުގެ ކުރިންނާއި ފަހުން ބާއްވަމުން އަންނަ ނޫސްވެރިންގެ ބައްދަލުވުންތައް އަލުން ފަށައިފިއެވެ.

އެފްއޭއެމުން މި ހަފުތާގަ ކުއްލި ގޮތަކަށް ކެންސަލް ކޮށްލީ ނޫސްވެރިންގެ ބައްދަލުވުންތަކުގައި ފަހަކަށް އައިސް ކްލަބުތަކުގެ ކޯޗުން ކްލަބުތަކަށް ދިމާވެފައިވާ މައްސަލަތަކުގެ ޝަކުވާތައް އޮއްސަލާމުންދާތީއެވެ.

ކުއްލި ގޮތަކަށް އެފްއޭއެމުން ކުރިޔަށް ގެންދިޔަ ނޫސްވެރިންގެ ބައްދަލުވުންތައް ކެންސަލްކޮށްލިއިރު އެފްއޭއެމްގެ އޮފިޝަލް ވަޓްސްއެޕް ގުރޫޕުގައި ނޫސްވެރިން މި ކަމާއި ބެހޭ ގޮތުން ސުވާލުކުރިއިރު، އެފްއޭއެމުން އެއްވެސް ޖަވާބެއްދީފައެއް ނުވެއެވެ. ނަމަވެސް މިވާހަކަތައް މީޑިއާތަކުގައި ރިޕޯޓުކުރުމާއި ގުޅިގެން އެފްއޭއެމުން ބުނީ، ނޫސްވެރިންގެ ބައްދަލުވުން ކެންސަލް ކޮށްލަން ޖެހުނީ އެފްއޭއެމްގެ މީޑިއާ ރޫމުގައި މަރާމާތެއް ކުރަމުންދާތީ ކަމަށާއި، އަދި އެފްއޭއެމްގެ ޓެކްނިކަލް ޑިރެކްޓަރުންނަށް ސެމިނަރއެއް ކުރިޔަށް ގެންދާތީ ކަމަށެވެ. އަދި މެޗުތަކުގެ ކުރިން ބާއްވަމުން އަންނަ ޕްރެސް ނަގަން ޓީމު ތަކުގެ ޕްރެކްޓިސްއަށްފަހު ޓާފް ދަނޑުގައި ފުރުސަތު އޮންނާނެ ކަމަށްވެސް އެފްއޭއެމްއިން ބުންޏެވެ.

އެފްއޭއެމުން ވަނީ އިއްޔެ ހަވީރު ޓީސީ އާއި ފޯކައިދޫ އަދި ރޭ ދަ ގްރާންޑޭ އާއި ޔުނައިޓެޑް ވިކްޓްރީ ކުޅުނު މެޗަށް ފަހު ނޫސްވެރިންގެ ބައްދަލުވުން ބާއްވާފައެވެ. ނަމަވެސް ނޫސްވެރިން ސުވާލު ކުރުމަށް ފެށުމުގެ ކުރިން އެފްއޭއެމްގެ އޮފިޝަލަކު ވަނީ، ސުވާލުކުރެވޭނީ ހަމައެކަނި މެޗާ ގުޅޭ ގޮތުން ކަމަށް ނޫސްވެރިންނަށް އަންގާފައެވެ،