އޭޝިއާގެ އެންމެ ފުރިހަމަ ހޮޓާތަކުގެ "ގޯލްޑް 2020" ލިސްޓުގަ ރާއްޖޭގެ ސޮނޭވާ ޖާނީ

ކޮންޑެ ނާސްޓް ޓްރެވަލާ މަޖައްލާއިން ހޮވާ އޭޝިއާގެ އެންމެ ފުރިހަމަ ހޮޓާތަކުގެ "ގޯލްޑް 2020" ލިސްޓުގަ ރާއްޖޭގެ ސޮނޭވާ ޖާނީ ހިމެނިއްޖެއެވެ.

ޓޫރިޒަމް ދާއިރާގައި ނެރޭ އެންމެ ޒަމާންވީ އެއް މަޖައްލާ ކަމަށްވާ "ކޮންޑެ ނާސްޓް ޓްރެވަލާ" އިން ނެރުނު މިލިސްޓުގަ ސޮނޭވާ ޖާނީގެ އިތުރުން އަވަށްޓެރި އިންޑިއާގައި ހޮޓާތަކުގެ ގޮތުގަ ބޭނުންކުރާ ގަނޑުވަރުތައް ވެސް ހިމެނެއެވެ. އަދި ކޮމްބޯޑިއާގަ ހުންނަ ސޯންގް ސާންގް ޕްރައިވެޓް ރަށާއި، މެލޭޝިއާގެ ލަންކާވީގެ އެންމެ ރީތި ގޮޑުދޮށުގައި އިންނަ ދަ ދަތާއި ރިސޯޓު ވެސް މި ލިސްޓުގައި ހިމަނާފައިވެއެވެ.

މަޝްހޫރު ޓީވީ ޗެނަލް ސީއެންއެން އިން މިއަހަރުގެ ސެޕްޓެންބަރު މަހު ހޮވި، އިންސްޓަގްރާމް ކުރަން އެންމެ ހިތްގައިމު އަދި މަގްބޫލު ރިސޯޓުތަކުގެ ތެރޭގައި ސޮނެވާ ޖާނީ ހިމެނުނެވެ. އޭރުގަވެސް އެ ލިސްޓުގައި ރާއްޖޭގެ ރިސޯޓަކަށް ހިމެނިފައިވަނީ ހަމައެކަނި ސޮނެވާ ޖާނީ އެވެ.

އެންމެ މަތީ ފެންވަރުގެ ރިސޯޓެއްގެ ގޮތުގައި ސޮނޭވާ ކުންފުނިން ނ. މެދުފަރުގައި ތަރައްގީ ކޮށްފައިވާ ސޮނޭވާ ޖާނީ ރިސޯޓް ހުޅުވާފައިވަނީ 2016 ވަނަ އަހަރު އޮކްޓޯބަރު މަހުގައެވެ. ވެލާނާ އިންޓަރނޭޝަނަލް އެއަރޕޯޓުން 30 މިނިޓުން ސީޕްލޭންގައި ދެވޭ ސޮނޭވާ ޖާނީގައި އެކި ގައުމުތަކުގެ ކެއުންތަކަށް ހާއްސަ ރެސްޓޯރެންޓްތަކާއި ކްލަބް ހައުސްއަކާއި ސްޕާއަކާއި ސައިލެންޓް ސިނަމާއެއްގެ އިތުރުން، އޮބްޒަވޭޓަރީއެއް ވެސް ގާއިމްކޮށްފައިވެ އެވެ. މިއީ ރާއްޖޭގެ ރިސޯޓެއްގައި ސައިލެންޓް ސިނަމާ އެއް ހެދި ފުރަތަމަ ފަހަރެވެ.

މި ރިސޯޓްގެ އެންމެ ހިތްގައިމު ކަމަކީ ކޮޓަރީގެ އަދަދު މަދުކޮށް، ކޮޓަރިތަކުގެ މެދުގައި އޮންނަ ހުސް ޖާގަ ބޮޑުކޮށްފައިވުމެވެ. އެގޮތުން، މިއީ މުޅި ދުނިޔޭގައި ވެސް ބިމުގެ ނިސްބަތުން ކޮޓަރީގެ އަދަދު އެންމެ މަދު ރިސޯޓެވެ.

ކޮންޑެ ނާސްޓް މަޖައްލާ ކިޔުންތެރިންގެ އަދަދު 1.3 މިލިއަނަށް އަރަ އެވެ. މި މަޖައްލާއިން ދޭ ބައެއް އެވޯޑުތައް މީގެ ކުރިންވެސް ރާއްޖޭގެ ރިސޯޓަކަށް ލިބިފައި އެވެ.