2020 ވަނަ އަހަރު 2019 ވަނަ އަހަރަށްވުރެން އިތުރު ކާމިޔާބީތައް ހާސިލް ކުރުމަށް ތަސައްވުރު ކުރާކަމަށާއި، އެކަންތައްތަކާއިއެކު އިމިގްރޭޝަންގެ ޚިދުމަތްތައް އިތުރަށް ލާމަރުކަޒު ކުރެވި، ޚިދުމަތް ހޯދާ ފަރާތްތަކަށް ލުއި ފަސޭހަ ވެގެން ދާނެކަމަށް އިމިގްރޭޝަނުން ބުނެފިއެވެ.
2019 ވަނަ އަހަރު މޯލްޑިވްސް އިމިގްރޭޝަނުން ހާސިލްކުރި ކާމިޔާބީތައް ފާހަގަ ކުރުމުގެގޮތުން "ކަށަވަރު 2019" ގެ ނަމުގައި އިމިގްރޭޝަންގެ އޮފިސަރުން ބައިވެރިވި ޙާއްސަ ހަފްލާއެއްގައި ވާހަކަފުޅު ދައްކަވަމުން ކޮންޓްރޯލަރ ޖެނެރަލް އަދި ޑެޕިއުޓީ ކޮންޓްރޯލަރ ވަނީ ކުރިއަށް އޮތް 2020 ވަނަ އަހަރު އިތުރު ކާމިޔާބީތައް ހާސިލް ކުރުމަށް ތަސައްވުރު ކުރާކަމާއި، އެކަންތައްތަކާއިއެކު އިމިގްރޭޝަންގެ ޚިދުމަތްތައް އިތުރަށް ލާމަރުކަޒު ކުރެވި، ޚިދުމަތް ހޯދާ ފަރާތްތަކަށް ލުއި ފަސޭހަ ވެގެން ދާނެކަމަށްވިދާޅުވެފައެވެ.
އިމިގްރޭޝަނުން 2019 ވަނަ އަހަރު ހާސިލްކޮށްފައިވާ މުހިންމު ކަންތައްތައް:
- އީމެއިލް މެދުވެރިކޮށް ޕާސްޕޯޓަށް އެދި ހުށަހަޅާ، އޮންލައިންކޮށް ފައިސާ ދެއްކޭނެ ނިޒާމެއް ޤާއިމް ކުރުން
- އިމިގްރޭޝަނުގެ ތަފާސް ހިސާބު ޝާޢިއުކުރަން ފެށުން
- ގަން އިންޓަނޭޝަނަލް އެއަރޕޯޓުން ބިޒްނަސް ވިސާ އަދި އަލަށް މަސައްކަތްކުރުމަށް އަންނަ ބިދޭސީންނަށް ރާއްޖެއެތެރެވެވޭނެ އިންތިޒާމް ހަމަޖެއްސުން
- ބިޒްނަސް ވިސާގެ ޙިދުމަތް 48 ގަޑިއިރުގެ ތެރޭގައި ދޭން ފެށުން
- އިންސާނީ ވަގުފާރިއަށް ތުހުމަތު ކުރެވޭ 27 މައްސަލައެއް ތަހުޤީޤީ އިދާރާތަކަށް ފޮނުވުން
- އިމިގްރޭޝަނުގެ ޚިދުމަތް ލާމަރުކަޒީ ކުރުމުގެގޮތުން ހއ. އަތޮޅުގައި އިމިގްރޭޝަނުގެ އޮފީހެއް ޤާއިމްކުރުން
- ބޯޑަރ ސެކިއުރިޓީ އިތުރަށް ހަރުދަނާ ކުރުމުގެގޮތުން ގަން އިންޓަނޭޝަނަލް އެއަރޕޯޓުގައި "ޑޮކިއުމެންޓް އެގްޒެމިނޭޝަންލެބް" އެއް ޤާއިމްކުރުން
- ސީޕޯޓް ކްލިއަރެންސް ދިނުމަށް ބޯޑަރ ކޮންޓްރޯލް މޯބައިލް ސިސްޓަމެއް އަލަށް ތަޢާރަފްކޮށް ބޭނުންކުރަން ފެށުން
- "އެން.ރޫޓް ކްލިއަރެންސް" ޚިދުމަތް ދޭން ފެށުން (ފަސޭހަ ޚިދުމަތެއް ދިނުމުގެ ގޮތުން ކަނޑުމަގުން ރާއްޖެ އަންނަފަސެންޖަރ ލައިނަރތައް ރާއްޖެ އައުމަށް ފުރާ އެންމެ ފަހު ބަނދަރަށް އިމިގްރޭޝަން އޮފިސަރުން ގޮސް، އެ ބަނދަރަކުންބޯޓަށް އަރާ، ރާއްޖެ އައުމުގެ ދަތުރުމަތީގައި ފަޅުވެރިންނާއި ފަތުރުވެރިންނަށް ކްލިއަރެންސް ދިނުން)
- އޮންލައިން ވާރކް ވިސާގެ ޚިދުމަތް ތަޢާރަފްކުރުން
- ފަސޭހަކަމާއެކު މަޢުލޫމާތު ފޯރުކޮށްދިނުމަށްޓަކައި ކޯލް ސެންޓަރުގެ ޚިދުމަތް ތަޢާރަފްކުރުން
- "ރަށުން" މި ނަމުގައި ޕާސްޕޯޓުގެ ޚިދުމަތް ތަޢާރަފް ކުރުން (އިމިގްރޭޝަނުގެ ޚިދުމަތްތައް ލާމަރުކަޒީ ކުރުމުގެ ގޮތުންރަށްރަށުން ޕާސްޕޯޓުގެ ޚިދުމަތަށް އެދި ހުށަހެޅޭނެ ނިޒާމެއް ޤާއިމްކުރުން)
- އިންސާނީ ވަސީލަތް ހަރުދަނާ ކުރުމުގެ ގޮތުން 25 އޮފިސަރަކަށް، ޑިގްރީ އަދި މާސްޓާރސް ފެންވަރަށް މަތީ ތަޢުލީމުހާސިލް ކުރުމުގެ ފުރުސަތު ހޯދައިދިނުން
- އިމިގްރޭޝަންގެ މަސައްކަތްތަކާއި ގުޅުންހުރި 7 ދާއިރާއަކުން، ޖުމްލަ 131 އިމިގްރޭޝަން އޮފިސަރުންނާއި،އިމިގްރޭޝަނާއި ގުޅުންހުރި މަސައްކަތްތައް ކުރާ މުވައްސަސާ/ އޮފީސްތަކުގެ 48 ބޭފުޅުންނަށް ތަމްރީނު ދިނުން
އިމިގްރޭޝަނުގެ ހެޑް އޮފީހުގައި އާދީއްތަ ދުވަހު ބޭއްވި މިހަފްލާގައި، ގިނަ އަދަދެއްގެ އޮފިސަރުން ބައިވެރިވެފައިވާއިރު މިހަފްލާގައި 2019 ވަނަ އަހަރު އިމިގްރޭޝަނުން ހާސިލްކުރި ކާމިޔާބީތައް ދައްކުވައިދޭ އެނިމޭޓެޑް ވީޑިއޯއެއް، ކޮންޓްރޯލަރ ޖެނެރަލް މުޙައްމަދު އަޙުމަދު ޙުސެއިން ވަނީ ޝާޢިއުކޮށްފައެވެ.
މި ވީޑިއޯއިން ދައްކުވައިދޭ ގޮތުން, ޚިދުމަތްތައް ލާމަރުކަޒު ކުރުމުގެ ގޮތުންނާއި، ރައްޔިތުންނަށް ދޭ ހިދުމަތުގެ ފެންވަރު ރަނގަޅު ކުރުމުގެ ގޮތުންނާއި، ޙިދުމަތްތަކާއި މެދު ރައްޔިތުންގެ އިތުބާރު ހޯދުމުގެ ގޮތުންނާއި، ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ހައްލު ހޯދުމުގެ ގޮތުންނާއި، ބޯޑަރ ސެކިއުރިޓީ ހަރުދަނާ ކުރުމުގެ ގޮތުންނާއި އަދި އިންސާނީވަސީލަތް ކުރިއެރުވުމުގެގޮތުން މިއަހަރުގެ ތެރޭގައި މައިގަނޑު 14 ކަމެއް ހާސިލްކޮށްފައިވެއެވެ.
