އައު އަހަރުގެ ޗުއްޓީ ހޭދަކޮށްލެއްވުމަށް ރައީސް ސޯލިހު ލަންކާއަށް
ލަންކާ އަށް ވަޑައިގަންނަވަނީ އަންގާރަ ދުވަހު
ރައީސް ސޯލިހު ބޭރަށް ކުރެއްވި ދަތުރު ފުޅެއްގެ ތެރެއިން
ރައީސް އިބްރާހީމް މުހައްމަދު ސޯލިހު އަހަރީ ޗުއްޓީ ހޭދަކޮށްލެއްވުމަށް އަންގާރަ ދުވަހު ލަންކާއަށް ފުރާވަޑައިގަންނަވާ ގޮތަށް ހަމަޖެހިއްޖެއެވެ.
ރައީސް ކުރައްވަން ހަމަޖެހިފައިވާ ނުރަސްމީ ދަތުރުފުޅާއި ބެހޭ ގޮތުން ރައީސް އޮފީހުގެ އިސްބޭފުޅަކު ރާއްޖެ.އެމްވީއަށް މައުލޫމާތު ދެއްވަމުން ވިދާޅުވީ، ރައީސް ސޯލިހު ލަންކާއަށް ވަޑައިގަންނަވާނީ ހަތަރު ދުވަހަަށް ކަމަށެވެ. ޗުއްޓީ ނިންމަވާލެއްވުމަށް އެމަނިކުފާނު ރާއްޖެ ވަޑައިގަންނަވާނީ ހުކުުރު ދުވަހުއެވެ.
ރައީސްގެ އާއިލާގެ ބައެއް ބޭފުޅުން ދިރިއުޅުއްވަމުން ގެންދަވަނީ ލަންކާގައެވެ. މި އަހަރުގެ ކުރީކޮޅުވެސް ރައީސް ވަނީ ލަންކާ އަށް ނުރަސްމީ ދަތުރުފުތަކެއް ކުރައްވާފައެވެ.
ވެރިކަމާއި ހަވާލުވެވަޑައިގަތް ފަހުން ލަންކާގެ މިނިވަން ދުވަސް ފާހަގަކުރުމަށް ބޭއްވި ރަސްމިއްޔާތުގައި ބައިވެރިވެ ވަޑައިގަތުމަށް ކުރީގެ ބޮޑު ވަޒީރު ރަނިލް ވިކްރަމަސިންހަގެ ދައުވަތަކަށް ރައީސް ސޯލިހު އެ ގައުމަށް ދަތުރުފުޅެއް ކުރެއްވިއެވެ. އެ ދަތުރުފުޅުގައި ރައީސް ސޯލިހު ވަނީ ލަންކާގައި ދިރިއުޅެމުންދާ ދިވެހިންނާއިވެސް ބައްދަލުކުރައްވާފައެވެ.
