ތަންފީޒީ އިދާރާތަކަށް ދީފައިވާ ބާރާ އެއްވަރަށް ހަރުކަށި ފިކުރާ ދެކޮޅަށް ފިޔަވަޅެއް ނޭޅޭ: ޝަހީމު
ހަރުކަށި ފިކުރު ހުއްޓުވުމަށް މަޖިލީހުން ތަންފީޒީ އިދާރާތަކަށް ދޭން ބޭނުންވެދާނެހެން ހީވާ ބާރެއްވެސް ވަނީ ދީފައި
ހެންވޭރު ދެކުނު ދާއިރާގެ އެމްޑީޕީގެ މެމްބަރު ހުސެއިން ޝަހީމް (އަނދުން ހުސެއިން)
ހަރުކަށި ފިކުރާ ދެކޮޅަށް އެދެވޭ މިންވަރަކަށް ފިޔަވަޅު މިހާތަނަށްވެސް އެޅިފައިވާ ކަމަށް ދެންނެވެން ނެތްކަމަށް ހެންވޭރު ދެކުނު ދާއިރާގެ މެންބަރ ޙުސައިން ޝަހީމް (އަނދުން ހުސައިން) ވިދާޅުވެއްޖެއެވެ.
ހަރުކަށި ފިކުރާއި ދެކޮޅަށް އަދި އެ ފިކުރު ފަތުރާ ބޮޑުން ހައްޔަރުކުރުމަށް ފުލުހުންގެ އިދާރާއިން ރާއްޖޭގެ އެކި ކަންކޮޅުތަކުގައި ހާއްސަ އޮޕަރޭޝަންތަކެއް ހިންގަން ފަށާފައިވާ ދަނޑިވަޅެއްގައި ރާއްޖެ ޓީވީގެ ފަލަ ސުރުޚީ ޕްރޮގުރާމުގަ ވާހަކަ ދައްކަވަމުން ޝަހީމް ވިދާޅުވީ އަމިއްލަފުޅަށްވެސް ގަބޫލުކުރެވޭގޮތުގައި ހަރުކަށި ފިކުރާ ދެކޮޅަށް އެންމެ އެދެވޭ މިންވަރަކަށް މިހާތަނަށް ފިޔަވަޅު އެޅިފައިނުވާކަމަށާއި, ނަމަވެސް އެ ކަންކަން ހުއްޓުވުމަށްޓަކައި ރައްޔިތުންގެ މަޖިލީހުން ތަންފީޒީ އިދާރާތަކަށް ދޭން ބޭނުންވެދާނެހެން ހީވާ ބާރެއްވެސް ދީފައިވާކަމަށެވެ.
ޝަހީމް ވިދާޅުވީ ހަރުކަށި ފިކުރު ފަތުރާ މީހުން ސިފަކުރަނީ، ދީނަށް އުޅޭ ފަރާތެއް ދީނަށް އުޅެގެންނާއި ފަސްވަގުތު ނަމާދުކޮށް ސުންނަތް ރޯދަ ހިފާމީހާއަށް ނޫންކަމަށާއި, ކަނޑައެޅިގެން ތަފާތު ކުށްތަކަށް އަރައިގަނެ އެތަކެއް ތުހުމަތުތަކެއް ކުރެވިފައިވާ މީހުން ޝަހްސުއޮޅުވައި ދީންވެރިމީހެއްކަމަށް ހެދިގެން އަނެއްކާވެސް ކުރިން ކުރި ނުބައިކަންތަކުގައި އުޅޭ މީހުންނަށްކަމަށެވެ.
ޝަހީމް އިތުރަށް ވިދާޅުވީ ދީނުގައި އަންގަވާފައިވާ ގޮތާއި ހިލާފަށް މައުލޫމާތު ފަތުރައި ރާއްޖެއިން ބޭރުގެ ޓެރަރިސްޓް ޖަމާއަތްތަކަށް މީހުން ރެކްރޫޓްކޮށް ޖާނުންފިދާވުމުގެ ހަމަލާތަކަށް ހިއްވަރުދީ ރާއްޖޭގައިވެސް މީހުން މެރުމުގައި ތަމްރީނުކޮށް ހިއްވަރުދީ އެފަދަ ވާހަކަތައް ދައްކާ މީހުންނަކީ ހަރުކަށި ވިސްނުން ފަތުރާމީހުންކަމަށެވެ.
ހަރުކަށި ފިކުރުތައް ފަތުރާމީހުން ރެއާއި ދުވާލު އިންޓަރނެޓްގެ ވަސީލަތްތަކާއި، ސޯޝަލް މީޑިއާގެ ވަސީލަތްތަކާއި، ސިއްރިއްޔާތުގައި އެފިކުރު ފަތުރަން ގިނަގުނަ ރޭވުންތައް ރާވާ، އެމީހުންގެ ފިކުރު ފެތުރުމަށްޓަކައި މަސައްކަތް ކުރަމުންދާ ކަމަށާއި މި ކަންކަމަށް ސަމާލުވުމަށް ނެޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ)އިން މީގެކުރިން ވަނީ އިލްތިމާސްކޮށްފައެވެ.
ދިވެހި ދައުލަތަކީ ކުފުރުގެ ދައުލަތެއް ކަމަށާއި، ހަރުކަށި ފިކުރު ގަބޫލުނުކުރާ މީހުންގެ މުދަލާއި ނަފްސު އަދި ފުރާނައަކީ ގެއްލުން ދެވިދާނެ އެއްޗެއް ކަމަށް ޤަބޫލުކުރުމުގެ އިތުރުން، ޝަރުއީ އަދި ގާނޫނީ އިމުގެ ބޭރުން އުމުރުން 18 އަހަރު ނުވާ ކުދިން އަނބިންގެ ގޮތުގައި ގެންގުޅުމާއި އަދި އެމީހުންނާއެކު ޖިންސީ ގުޅުން ހިންގުމަކީ ހުއްދަކަމެއް ކަމަށް ޤަބޫލުކޮށް، އެ ފިކުރު ފަތުރާ ފަރާތްތައް ހޯދުމަށް ފުލުހުންނާއި ޤައުމީ ދިފާޢީ ބާރާއި ގުޅިގެން ދަނީ ގިނަ މަސައްކަތްތަކެއް ކުރަމުންނެވެ.
