ހދ އަތޮޅުގައި މިހާތަނަށް ބާއްވާ އެންމެ އަގުހުރި އިނާމްތައް ދޭ ޤުރުއާން މުބާރާތް އެއަތޮޅު ނައިވާދޫގައި ފަށައިފިއެވެ.
ނައިވާދޫ ޒުވާނުން އިސްނަގައިގެން ހުކުރު ދުވަހު މެންދުރު ފަހު ފެށި މިޤުރުއާން މުބާރާތުގައި ވަނަވަނައަށް އަންނަ ފަރާތްތަކަށް ދޭ އިނާމް ތަކުގެ ތެރޭގައި ދެ އުމުރާ ދަތުރާއި، ބެޑް ރޫމް ސެޓަކާއި ލެޕްޓޮޕް އަދި އައިޕެޑް ފަދަ އަގުހުރި އިނާމްތައް ހިމެނެއެވެ.
ބައިވެރިވާ ކޮންމެ ދަރިވަރަކަށް ޚަތިމަކާއި ގިފްޓް ޕެކެއްވެސް ދިނުމަށް ހަމަޖެހިފައިވާ މި މުބާރާތުގައި ޖުމްލަ 64 ދަރިވަރުން ވަނީ ބައިވެރިވެފައެވެ.
ބަލައިގެން ކިޔެވުމާއި ހިތުން ކިޔެވުމުގެ ގޮފި ހިމެނޭ ގޮތަށް މި ޤުރުއާން މުބާރާތް ކުރިއަށް ގެންދަނީ ޖުމްލަ 4 އުމުރު ފުރައަކަށް ބަހާލައިގެންނެވެ.
"ނައިވާދޫ ޤުރުއާން މުބާރާތް 1438" ގެ ނަމުގައި ކުރިއަށް ގެންދާ މިމުބާރާތް ނައިވާދޫ ސްކޫލުގައި ހުކުރު ދުވަހު ފަށާފައިވާއިރު މުބާރާތުގެ ކިޔެވުން ހޮނިހިރު ދުވަހުވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މިނިސްޓްރީ އޮފް އިސްލާމިކް އެފެއާޒްގެ ޖަޖުން މުބާރާތް އިންސާފް ކުރައްވާއިރު މުބާރާތުގެ ނަތީޖާ ފާޅު ކުރުމާއި ވަނަވަނައަށް ހޮވޭ ދަރިވަރުންނަށް އިނާމާއި ތަށި ދިނުމަށް ހަމަޖެހިފައިވަނީ ހޮނިހިރު ދުވަހުގެރޭ އެކަމަށް ޚާއްޞަކޮށްގެން ބާއްވާ ހަފްލާއެއްގައެވެ.
މުބާރާތް އިންތިޒާމް ކުރާ ފަރާތުން ބުނީ މިއީ ނައިވާދޫގެ ދަރިވަރުންގެ ހިތްތަކުގައި ކީރިތި ޤުރުއާނަށް ލޯބި ޖެއްސުމާއި ތަޖްވީދު މަގުން ރީތިކޮށް ޤުރުއާން ކިޔަވަން ދަސްކުރުމަށް ބާރު އެޅުމުގެ ގޮތުން ބާއްވާ މުބާރާތެއް ކަމަށެވެ.
