އައު އަހަރާ ދިމާކޮށް ޝިލްޕާ ޓިކްޓޮކްއާ ގުޅެނީ

މަޝްހޫރު ފިލްމީ ތަރި ޝިލްޕާ ޝެޓީ އައު އަހަރާ ދިމާކޮށް މަޤުބޫލު އެޕްލިކޭޝަނެއް ކަމަށްވާ ޓިކްޓޮކްއާ ގުޅެން ނިންމައިފިއެވެ.

ޝިލްޕާގެ އިންސްޓަގްރާމްގައި ޕޯސްޓްކޮށްފައިވާ ވީޑިއޯއެއްގައި ބުނެފައިވަނީ އައު އަހަރާ ދިމާކޮށް މުޅިން އައު ކަމެއް ކުރަން ނިންމާފައިވާ ކަމަށެވެ. ޓިކްޓޮކާ ގުޅެން ނިންމީ ސަޕޯޓަރުންނަށް ދޭ ހަދިޔާއެއްގެ ގޮތުގައި ކަމަށް ޝިލްޕާ ބުންޏެވެ.

އަދި ޓިކްޓޮކްގެ ވީޑިއޯއަށް އިންތިޒާރުކުރުމަށް ޝިލްޕާ އެދިފައިވާތީ އޭނާގެ ސަޕޯޓަރުން މިހާރު ތިބީ އިންތިޒާރުގައި ކަމަށް އިންޑިއާގެ ބޮލީވުޑް ޚަބަރު ފަތުރާ ނޫސްތަކުން ބުނެއެވެ.

ދުނިޔޭގެ އެކި ޤައުމުތަކުގަ ޓިކްޓޮކްގެ އެހީގައި އެކި މީހުންގެ ހުނަރުތައް ހިއްސާ ކުރަމުންދާއިރު، ޝިލްޕާމެން ފަދަ މަޝްހޫރު ފަންނާނުން މިއެޕްލިކޭޝަނާއި ގުޅެން ނިންމުމަކީ ޓިކްޓޮކްއަށާއި، އަދި ޓިކްޓޮކްގައި ހުނަރުތައް ދައްކަމުންދާ ފަންނާނުންނަށް ލިބޭ އިތުރު ހިތްވަރެއް ކަމަށް ބައެއް ޢާންމުންދަނީ ބުނަމުންނެވެ.

ގިނަބައެއްގެ ލޯބި ހޯދައިފައިވާ ޝިލްޕާވަނީ 13 އަހަރު ދުވަސް ވަންދެން ބޮލީވުޑްއާ ދުރުގައި އުޅުމަށްފަހު ނިކަންމާ ކިޔާ ފިލްމަކުން ވަރަށް އަވަހަށް ފެނިގެންދާނެކަން ހާމަކޮށްފައެވެ.

ޝިލްޕާ ދާދިފަހުން ވަނީ ޑާންސް ރިއަލިޓީ ޝޯ "ސުޕަރ ޑާންސް ޗެޕްޓަރ 3" ގެ ފަނޑިޔާރުކަން ކޮށްފައެވެ.

ޝިލްޕާ އެންމެ ފަހުން ފެނިގެން ގޮސްފައިވަނީ 2007 ވަނަ އަހަރު ރިލީޒް ކުރި ފިލްމް " އަޕްނޭ" އިންނެވެ. މި ފިލްމުގައި ޝިލްޕާ އާއެކު ލީޑް ރޯލުން ފެނިގެން ގޮސްފައިވަނީ ދަރްމެންދްރާއާއި، ސަނީ ޑިއޯލްއާއި، ބޮބީ ޑިއޯލްގެ އިތުރުން ކެޓްރީނާ ކައިފް އެވެ.