ރާނީ އަށް އައުޓްސްޓޭންޑިން އެވޯޑެއް ލިބިއްޖެ

ބޮލީވުޑްގެ ތަރި ރާނީ މުކްރަޖީއަށް "އައުޓް ސްތޭންޑިން ކޮންޓްރިބިއުޝަން ޓު ސިނަމާ އެވޯޑް" ލިބިއްޖެއެވެ.

އޭނާއަށް ލިބުނު މި އެވޯޑަކީ މޮރިޝަޝްގެ ސަރުކާރުން އެ ގައުމުގެ 50 ވަނަ މިނިވަން ދުވަސް ފާހަގަ ކުރުމަށް ބޭއްވި ހަރަކާތްތަކުގެ ތެރޭގައި ހިމެނޭ "މޮރިޝަޝް ސިނަމާ ވީކް" ގެ ތެރެއިންނެވެ.

ރާނީ އަށް މި އެވޯޑް އެރުވީ މޮރިޝަޝްގެ ބޮޑުވަޒީރު ޕްރަވިންދް ކުމާރް ޖަގްނައުތް އެވެ.

"މޮރިޝަޝް ސިނަމާ ވީކް"އަކީ މޮރިޝަސްގެ 50 ވަނަ މިނިވަން ދުވަސް ފާހަގަ ކުރުމަށްޓަކައި ބޭއްވި ޚާއްސާ ފިލްމް ފެސްޓިވަލެކެވެ.

އެވޯޑާއި ހަވާލުވުމަށްފަހު ވާހަކަ ދައްކަމުން ރާނީ ބުނީ އޭނާއަށް އެ އެވޯޑް ލިބުމުން ފަޚުރުވެރިވާކަމަށާއި އޭނާއަށް އެފަދަ ޝަރަފެއް އެރުވީތީ ޝުކުރު އަދާކުރާކަމަށެވެ. އަދި އޭނާ އެކްޓު ކޮށްފައިވާ "ކުޗްކުޗް ހޯތާހޭ"، "ބިއްޗޫ"، އަދި "ހެލޯ ބްރަދާ" ގެ ބައެއް މަންޒަރުތައް މޮރިޝަޝްގައި ނަގާފައިވާ ކަމަށާއި އޭނާއަށް މޮރިޝަޝްގެ ސަގާފަތް ވަރަށް ކަމުދާކަމަށް ރާނީ ބުންޏެވެ.

ރާނީ ވިހެއުމަށްފަހު އެނބުރި އަންނަ ފިލްމު ކަމަށްވާ "ހިޗްކީ" ސިނަމާތަކަށް އަންނާނީ އަންނަ ފެބްރުއަރީގައެވެ.

އުމުރުން 39 އަހަރުގެ ރާނީ އޭނާގެ ފިރިމީހާ އަދި މަޝްހޫރު ޑައިރެކްޓަރ އަތިތުޔާ ޗޮޕްރާއާއި ކައިވެނި ކޮށްފައިވަނީ 2014 ވަނަ އަހަރުގައެވެ.