"ތަގްސް އޮފް ހިންދުސްތާން" ގެ ޝޫޓިން ނިންމާލުމަށް ފަހު އަމީތާބު "102 ނޮޓް އައުޓް" ގެ ޝޫޓިން އަށް!

މޯލްޓާގައި "ތަގްސް އޮފް ހިންދުސްތާން" ގެ ޝޫޓިން ނިންމާލުމަށް ފަހު "102 ނޮޓް އައުޓް" ގެ ޝޫޓިންއަށް ދިއުމަށް އަމީތާބް ދަތުރު ފަށައިފިއެވެ.

އަމީތާބް ކޮށްފައިވާ ޓްވީޓެއްގައި ބުނެފައި ވަނީ "ތަގްސް އޮފް ހިންދުސްތާން" ގެ ޝެޑިއުލް ކޮށްފައިވާ ފުރަތަމަ ޝޫޓިން ނިންމާލުމަށް ފަހު ފުރާފައިވާ ކަމަށެވެ.

"ތަގްސް އޮފް ހިންދުސްތާން"ގެ ޝޫޓިންއަށް މޯލްޓާއަށް އަމީތާބް ފުރީ މިމަހުގެ 5 ވަނަ ދުވަހުގައެވެ.

މި ފިލްމުގެ ބަތަލާގެ ރޯލުން ފެނިގެންދާނީ ކެޓްރީނާ ކައިފް އާއި "ޑަންގަލް" އިން ބޮލީވުޑަށް ތައާރަފުވި ފާތިމާ ސަނާ ޝައިހް އެވެ. މި ފިލްމުގެ ސްކްރިޕްޓް ލިޔެފައި ވަނީ ވެސް ވިޖޭ ކްރިޝްނާއެވެ. މި ފިލްމުގެ ޕްރޮޑިއުސަރަކީ އަދިތްޔާ ޗޮޕްޅާއެވެ.

"102 ނޮޓް އައުޓް" ގައި އަމީތާބާއި ރިޝީ ކަޕޫރު އަދާކުރަނީ ބައްޕައާ ދަރިއެއްގެ ރޯލެވެ. މި ފިލްމުގައި އަމީތާބަކީ ރިޝީގެ ބައްޕައެވެ. 75 އަހަރުގެ އަމީތާބް ރިޝީއަށްވުރެ 10 އަހަރު ދޮއްޓެވެ. ރިޝީ ޓްވިޓާގައި ބުނީ އެހާ ގިނަ ދުވަސްތަކެއް ފަހުން އަމީތާބާ އެކު ފިލްމެއް ކުޅެން ލިބުމަކީ ވަރަށް ހިތްހަމަޖެހި އުފާވާ ކަމެއް ކަމަށެވެ. ޒުވާން އުމުރުގައި ދެ ތަރިން އެކުގައި ފިލްމްތަކުން ފެނިގެން ގޮސްފައި ވެއެވެ. ދެ މީހުންނަކީ ވެސް 80 އަދި 90 ގެ އަހަރުތަކުގައި ވަރަށް ކާމިޔާބު ވާދަވެރި ދެ ތަރިންނެވެ.

މި ފިލްމާ ބެހޭ ގޮތުން މުމްބާއި މިރާގައި ބުނެފައި ވަނީ ފިލްމުގެ ޝޫޓިން މެއިމަހުގެ 17 ގައި ފަށާފައިވާ ކަމަށެވެ. އަދި އެޕްރީލް ފަހުކޮޅާ ހަމައަށް ފިލްމުގެ މަސައްކަތް ކުރާނެ ކަމަށެވެ.

އެއަށްފަހު ފިލްމުގެ ޝޫޓިން މެދުކަނޑާލައި މިއަހަރުގެ ޖުލައިމަހުގެ ތެރޭގައި އަލުން ޝޫޓިން ފަށާނެ ކަމަށް އެ ނޫހުން ރިޕޯޓްކޮށްފައި ވެއެވެ. އެހެންކަމުން އަމީތާބް ފުރާފައި ވަނީ "102 ނޮޓް އައުޓް" ގެ އެންމެ ފަހުގެ ޝޫޓިން އަށް ކަމަށް ބެލެވެއެވެ.