2018 ވަނަ އަހަރު ރައީސް އިބްރާހިމް މުހައްމަދު ސޯލިހް ވެރިކަމުގެ ހުވާކުރެއްވީ ގިނަ ވައުދުތަކަކާއެކުގައެވެ. އެ ވައުދުތައް ފުއްދަވާނެކަމުގެ ޔަޤީންކަން ރައްޔިތުންނަށް ދެއްވަމުންނެވެ. އައު ސަރުކާރުގެ މީލާދީ ފުރަތަމަ އަހަރު ނިންމާލާއިރު، 2019 ވަނަ އަހަރަކީ އައު ސަރުކާރަށް ކާމިޔާބު އަހަރެކެވެ. ވައުދުތައް ފުއްދި، ވައުދުތައް ފުއްދުމުގެ މަސައްކަތް ފެށި އަހަރެކެވެ. ނިމުނު ސަރުކާރުތަކަށް ގޮންޖަހައި، ދަތިތަކާއި، އުނދަގުލުގެ ތެރޭގައި ރެކޯޑްތަކެއް ހާސިލްކުރި ސަރުކާރެކެވެ.

ހިސާބުތަކުން ފެންނަން ހުރި އަދަދުތަކުން އެކަނިވެސް، އައު ސަރުކާރުގެ ކާމިޔާބީތަކާއިމެދު ސުލާވު އުފައްދާނެ ޖާގައެއް ނެތެވެ. ރާއްޖޭގެ ތާރީހުގައިވެސް އައު ސަރުކާރެއްގެ ފުރަތަމަ އަހަރުގެ ތަރައްޤީގެ މަސައްކަތްތަށް ނުފަށާ މިންވަރަށް، ތަރައްޤީގެ މަސައްކަތްތައް ފަށައި، އަހަރު ނިންމާލާއިރު ރާއްޖޭގެ އެކި ރަށްތައް ހިމެނޭގޮތަށް 91 ރަށެއްގައި 118 މަޝްރޫއެއް އަންނަނީ ކުރިއަށްގެންދަމުންނެވެ. އަބްދުﷲ ޔާމީންގެ ވެރިކަމުގެ ފުރަތަމަ އަހަރުގެ ހިސާބުތަކާއި އަޅާބަލާއިރު މިއީ ރެކޯޑް އަދަދެކެވެ.

2019 ވަނަ އަހަރު ސަރުކާރުގެ ކާމިޔާބީތަކަށް ބޮޅެއް އިތުރުކޮށްދިނީ ސަރުކާރުގެ 100 ދުވަހުގެ ވައުދާއެކު އެވެ. ސަރުކާރުގެ 100 ދުވަސް ނިންމާލީ، ވައުދުތަކުގެ ތެރޭގައި ހިމެނުނު 83 އިންސައްތަ ވައުދުތައް ފުރިހަމަކުރުމަށްފަހު އެވެ. އޭގެތެރެއިން ފެށި ހިލޭ ޑިގްރީ ޕްރޮގްރާމުން މިހާރުވެސް 5000 އަށްވުރެ ގިނަ ދަރިވަރުން ތައުލީމް ހާސިލްކުރާއިރު، ފުރަތަމަ ސެމިސްޓަރގާއި މަދު ސުކޫލަކާއެކު ފެށި ހެނދުނުގެ ނާސްތާ ޕްރޮގްރާމްގައި އަހަރު ނިންމާލިއިރު ސަރުކާރުގެ 112 ސުކޫލެއްގައި ވަނީ މިޕްރޮގްރާމް ފަށާފައެވެ.

އެސްއެމްއީ ބޭންކާއެކު ކުދި އަދި މެދު ފަންތީގެ ވިޔަފާރިތަކަށް އައު ދިރިމެއް ގެނެސްދިންއިރު، މެޓަނިޓީ ލީވް ދޭން ފެށީވެސް 2019 ވަނަ އަހަރުގަ އެވެ. މިއީ ސަރުކާރުން ހޯދި ކާމިޔާބީތަކެވެ.

އަހަރު ނިންމާލަން ދުވަސްކޮޅަކަށްވިއިރު ސަރުކާރުގެ ކާމިޔާބީތަކުގެ ލިސްޓަށް ބޮޅު އިތުރުކޮށްދިނީ ލާމަރުކަޒީ ނިޒާމަށް ގެނައި ބޮޑު ބަދަލާއެކު އެވެ. ޤާނޫނު އަސާސީ އާއި ޤާނޫނުވެސް ވަނީ އިސްލާހުކޮށްފަ އެވެ. ކައުންސިލްތަކަށް ބޮޑެތި ބާރުތަކެއްދީ، މަރުކަޒީ ސަރުކާރުގެ ވައްޓަފާޅި ނިމުމަކަށް ގެނައުމުގެ މަސައްކަތް ވަނީ ފަށައިގެންފަ އެވެ.

ބިދޭސީން ޤާނޫނީ އިމުގެ ތެރެއަށް ވެއްދުމަށްފެށި ޕްރޮގްރާމާއެކު ދަމާލި ބޮޑެތި ކިއޫތަކުގެ ވާހަކައަކީވެސް، ސަރުކާރު ކާމިޔާބީގެ ލިސްޓަށް އިތުރުވާނެކަންކަމެވެ. ކުށުގެ ވެށިގައި ހިންގަމުންގެންދިޔަ ކަންކަން މަދުކުރުމަށް ފެށި މަސައްކަތުގައިވެސް ސަރުކާރުން ކާމިޔާބު އައްސޭރިއަކަށް ވާސިލްވިއިރު، ކުށުގެ އަދަދު ވަނީ 50 އިންސައްތަ ދަށްކޮށްފަ އެވެ. މިހެންގޮސް ކިތަންމެ ކާމިޔާބެއްގެ ވާހަކަ ސަރުކާރުގެ އައު އަހަރުގެ ކާމިޔާބީގެ ލިސްޓަށް އެއްކުރެވިދާނެއެވެ.

2019 ވަނަ އަހަރުގައި ފެނުނު މަންޒަރާއެކު ރައްޔިތުންނަށް ޔަޤީންކޮށްދިން ކަމަކީ ސަރުކާރަކީ ވައުދުވެ، އެ ވައުދު ފުއްދުމުގެ މަސައްކަތްކުރާނެ ސަރުކާރެއްކަމެވެ. ވައުދަކީ ހަމައެކަނި ލިޔެކިޔުމުގައި އޮންނަ އެއްޗެއްގެ ގޮތުގައި އޮތް އޮތުމަށް ނިންމުމެއް ގެންނާނެކަމެވެ.