ޤައުމަށް ދިމާވާ ބޮޑެތި ކަންތައްތަކުގައި ޤައުމީ އެއްބައިވަންތަކަން އިސްކުރުމަށް އެމްއާރުއެމުން ގޮވާލައިފި
ދުވަހުގެ ތަހުނިޔާ އެންމެހައި ލޮބުވެތި ދިވެހި ރައްޔިތުންނަށް ވަނީ ފޮނުވާފައި
އެމްއާރުއެމްގެ ޖަލްސާ ކުރިއަށް ދަނީ
ޤައުމަށް ދިމާވާ ބޮޑެތި ކަންތައްތަކުގައި ޤައުމީ އެއްބައިވަންތަ ކަމަށް އިސްކަން ދިނުމަށް މޯލްޑިވްސް ރީފޯމް މޫވްމަންޓް (އެމްއާރުއެމް) އިން ގޮވާލައިފި އެވެ.
ޤައުމީ އެއްބައިވަންތަކަމުގެ ދުވަހާއި ގުޅިގެން އެމްއާރުއެމުން ޢާންމުކުރި ބަޔާނުގައި ޤައުމަށް ދިމާވާ ބޮޑެތި ކަންތައް ތަކުގައި ސިޔާސީ ފިކުރު ތަކާއި ޚިޔާލު ތަފާތުވުންތައް އެއްފަރާތްކޮށް ސަރުކާރާއި ރައްޔިތުންގެ އެންމެން އެއްބައެއްގެ ގޮތުގައި މަސައްކަތް ކުރުމުގެ ބޭނުންތެރިކަމަށް އަލިއަޅުވާލާފައިވެއެވެ.
ދިވެހިންގެ އިޞްލާޙީ ޙަރަކާތް ތަކަކީ އެކުވެރިކަމާއި އެއްބައިވަންތަ ކަމާއެކު މަޝްވަރާ ކޮށްގެން ކުރާ މަސައްކަތްތަކެއް ކަމުގައި ހެއްދެވުމަށް އެމްއާރުއެމް އިން ވަނީ ގޮވާލާފައެވެ. އަދި މާޒީގެ ޢިބްރަތުން ލިބިފައިވާ ފިލާވަޅުތައް މުސްތަޤުބަލް ބިނާކުރުމުގައި ބޭނުން ކުރުމަށް ވަނީ އެދިފައެވެ.
އިތުރަށް ބަޔާނުގަ މީގެ ފަނަރަ އަހަރު ކުރީން އައި ޑިސެމްބަރުމަހުގެ ސައްބީސްވަނަ ދުވަހު ދިވެހިރާއްޖެއަށް ކުރިމަތިވި ސުނާމީގެ ނުރައްކާތެރި ކާރިޘާއާއި ގުޅިގެން އެދުވަހު ދިވެހި ޤައުމުގެ ލޮބިވެތި ރައްޔިތުން ދެއްކި ޤައުމީ އެއްބައިވަންތަ ކަމުގެ ޒިކުރާ އާކޮށްފައިވެއެވެ. އަދި މިއަދަކީ، އެދުވަހު މި ދުނިޔެއާއި ވަކިވެގެންދިޔަ އަޚުންނާއި އުޚުތުންގެ ފުރާނައަށް ﷲ ސުބުޙާނަހޫ ވަތަޢާލާގެ މަތިވެރި ރަޙުމަތާއި ޘަވާބަށް އެދި ދުޢާކުރުމުގެ ދުވަސް ކަމަށް ބުނެފައިވެއެވެ.
މިއަދު މިދުވަސް ފާހަގަކުރަމުން ދާއިރު، ހިތައް ގެންނަންވީ އެދުވަހު އެ ކާރިޘާ އާ ގުޅިގެން މުޅި ޤައުމަށް ވެރިވެފައި އޮތް ނާމާން ކަމާއި ހިތްދަތިކަމާ ކުރިމަތި ލުމުގައި ދިވެހިރައްޔިތުން ދެއްކެވި ހަރުދަނާ ޤައުމީ އެއްބައިވަންތަ ކަން ކަމަށް އެމްއާރު އެމްގެ ބަޔާނުގައި ވެއެވެ. އަދި އިސްލާމީ ވަރުގަދަ ޢަޤީދާ އާއެކު ދިވެހި ރައްޔިތުން ސާބިތުކޮށްދިން ކެތްތެރި ކަމާއި، ހިތްވަރު ގަދަކަމާއި، ކިޔަމަންތެރި ކަމާއި، އިޚުލާޞްތެރިކަން ކަމުގެ ނަތީޖާއަކަށްވީ އެދުވަހު ޙާލުގައި ޖެހުނު އަޚުންނާއި އުޚުތުންނަށް ބޭނުންވި އެހީ ހަމަ ވަގުތުން އެފަރާތްތަކަށް ފޯރުކޮށްދިނުން ކަމަށާއި އަދި އެކަމުން ލިބުނު ގެއްލުންތައް ބަލާ ފުރިހަމަ ރޭވުންތަކާއެކު އެކަންކަން ރަނގަޅު ކޮށްދިނުން ކަމުގަވެސް ބަޔާނުގައި ވެއެވެ.
އެމްއާރުއެމުން ބުނީ 2004 ވަނަ އަހަރު ޑިސެމްބަރު މަހުގެ 26 ވަނަ ދުވަހު ރާއްޖެއަށް ދިމާވި ސުނާމީ ކާރިޘާއަކީ ﷲ ސުބުޙާނަހު ވަތަޢާލާ ކުރިމަތި ކުރެއްވި ވަރަށް ވަރުގަދަ އިމްތިޙާނެއް ކަމަށެވެ. އެ އިމްތިޙާނުން ޙާޞިލުވި އެންމެ މަތިވެރި އިބުރަތަކީ ޤައުމީ އެއްބައިވަންތަ ކަމުގެ މުހިންމު ކަން ކަމަށް ބަޔާނުގައި ވެއެވެ.
ރާއްޖެ ޤުދުރަތީ ކާރިޘާތަކަށް ލޯ ހުޅުވިގެން ދިޔައީ 2004 ވަނަ އަހަރު އެރި އިންޑިއަން އޯޝަން ސުނާމީ ކާރިޘާއިންނެވެ. އޭރު ރާއްޖޭގެ ރިޔާސަތުގައި ހުންނެވީ އެމްއާރްއެމްގެ އިންތިޤާލީ ރައީސް މައުމޫން ޢަބްދުލް ޤައްޔޫމެވެ.
