ކާރިސާތަކުގައި އެންމެން އެކައްޗެއް ގޮތުގައި މަސައްކަތް ކުރުން މުހިއްމު: ޗީފް އޮފް ޑިފެންސް
އެދުވަހުގެ ހާދިސާ ޝަމާލް ވަނީ ހިއްސާ ކުރައްވާފައި
ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް
ޤައުމަށް ދިމާވާ ބޮޑެތި ކާރިޘާތަކުގައި ހުރިހާ އެންމެން އެކައްޗެއް ގޮތުގައި މަސައްކަތް ކުރުމަށް ޗީފް އޮފް ޑިފެންސް ފޯރސް ޢަބްދުﷲ ޝަމާލް އިލްތިމާސް ކުރައްވައިފިއެވެ.
ރާއްޖެއަށް ސުނާމި އެރިތާ 15 އަހަރު ފުރުމާއި ގުޅިގެން ރާއްޖެއިން ބޭރުގައި ހުންނަވާ ދެއްވި ފޯން އިންޓަވިއުއެއްގައި ސުނާމީ ކާރިޘާގައި އެންމެ އިސް ސަފުގައި މަސައްކަތް ކުރެއްވި ޝަމާލް ވަނީ އެ ދުވަހުގެ އިހްސާސްތައް ޙިއްސާކުރައްވާފައެވެ.
ޝަމާލް ވިދާޅުވީ، ސުނާމީގެ ޚަބަރު ލިބުމާއެކު ހެލިކޮޕްޓަރުގައި ރަށްރަށުގެ ޙާލަތު ބަލަން ދިޔައިރު ތ. ވިލިފުށްޓާއި، މ .ކޮޅުފުށި އޮތީ ވަރަށް ޙާލުގައި ކަމަށެވެ. މި ދެ ރަށަކީވެސް ސުނާމީ ގައި އެންމެ ބޮޑަށް ގެއްލުންވި ރަށްތަކުގެ ތެރެއިން ދެ ރަށެވެ.
އެ ކާރިޘާ ހިނގި ހިސާބުން ފެށިގެން ޝަމާލް މަސައްކަތް ކުރެއްވި އިންޑިއާއި، ބަންގްލަދޭޝް އާއި އެމެރިކާ ސިފައިންނާއިކުއެވެ. ކޮންމެ ދުވަހަކު ކަހަލަށް ގޮތަކަށް ކެނޑިނޭޅި ރަށްރަށަށް ގޮސް އެހީ ފޯރުކޮށްދިނުމަށް މަސައްކަތް ކުރެއްވިއެވެ. ގިނަ ދުވަސްތަކެއް ވަންދެން ސިފައިންގެ ޚިދުމަތުގައި މަސައްކަތް ކުރެއްވަމުން ގެންދަވާ ޝަމާލް، އެ ދުވަސް ސިފަކުރައްވަނީ ހުރިހާ ފަންތީއެއްގެ ސިފައިން ރައްޔިތުންނާއި ވަރަށް ކައިރިން މަސައްކަތް ކުރި ދުވަހެއް ގޮތުގައެވެ.
ޝަމާލް ވިދާޅުވީ، އޭރާ އަޅައި ބަލާއިރު މިއަދު ސިފައިންގެ ފައުޖުތައްވެސް މުޅިންގެން ބަަދަލުވެފައިވާ ކަމަށެވެ. ޤައުމަށް ދިމާވާ ބޮޑެތި ކަންތައްތަކުގައި، ހުރިހާ ރައްޔިތުންނަކީވެސް އެކައްޗެއްގެ ގޮތުގައި މަސައްކަތް ކުރުމުގެ މުހިއްމު ކަމުގެ ރޫޙު އޮތުން މުހިއްމު ކަމަށެވެ. ކުރިޔަށް އޮތް ތަނުގައި އެކަން ފެނިގެންދާނެ ކަމަށް ޗީފް އޮފް ޑިފެންސް ފޯރސް ވިދާޅުވިއެވެ.
މީގެ 15 އަހަރު ކުރިން 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހު އެރި ސުނާމީގައި ޖުމުލަ 84 މީހުން މަރުވެ 24 މީހަކު ވަނީ ގެއްލިފައެވެ. އަދި 15،000 ދިވެހި ރައްޔިތުންގެ ގެދޮރު ގެއްލުނެވެ. ރާއްޖޭގެ އާބާދީގެ 62 އިންސަތަ މީހުންނަން މި ހިތްދަތި ކާރިޘާގައި އެކި ކަހަލަ ގެއްލުންތަކާއި ކުރިމަތިވިއެވެ.
