އިޒްރޭލުން މިދިޔަ ނޮވެމްބަރ މަހުގެ 14 ވަނަ ދުވަހު ގައްޒާއަށް ދިން ހަމަލާތަކެއްގައި އެއް އާއިލާއެއްގެ 9 މެމްބަރަކު ޝަހީދުވި ހަމަލާއަކީ އާންމުންނަށް ނުރައްކާ އޮތް މިންވަރާއި ގުޅޭގޮތުން ހެދި އެސެސްމެންޓުން ލިބުނު ނުބައި މައުލޫމާތެއްގެ ސަބަބުން ދިން ހަމަލާއެއް ކަމަށް އިޒްރޭލްގެ ސިފައިން އެއްބަސްވެއްޖެ އެވެ.

މިހަމަލާ ދީފައިވަނީ ރަސްމި އަބު މަލްހޫސް ގެ ގެއަށެވެ. އޭނާއަކީ ގައްޒާގެ ފަލަސްތީން އޮތޯރިޓީގައި ވަޒީފާ އަދާ ކުރާ މީހެކެވެ. އޭނާގެ ގެއަށް އިސްރޭލުން ހަތަރު ހަމަލާއެއް ދީފައިވެއެވެ. މިހަމަލާތަކުގައި އޭނާގެ އާއިލާގެ 9 މެމްބަރުން ޝަހީދުވެގެން ދިޔައިރު އޭގެ ތެރޭގައި 5 ކުޑަކުދިން ހިމެނެއެވެ.

މިހަމަލާތަކުގައި ޝަހީދުވީ ރަސްމި އާއި އޭނާގެ ދެވަނަ އަނބި މީހާ އާއި ރަސްމިގެ ބޭބެ މުހައްމަދު އާއި އޭނާގެ އަނބިމީހާ އެވެ.

މިހަމަލާތަކަކީ މިދިޔަ ނޮވެމްބަރ މަހު އިޒްރޭލާއި އިސްލާމިކް ޖިހާދު ގްރޫޕާ ދެމެދު ހިނގައިދިޔަ ހަމަލާ ބަދަލުކުރުންތަކުގެ ތެރޭގައި ދިން ހަމަލާއެކެވެ. މިހަމަލާތަކުގައި ފަލަސްތީންގެ 34 މީހުން ޝަހީދުވެފައިވެ އެވެ.

ރަސްމިގެ ގެއަށް ދިން ހަމަލާތަކާއި ގުޅިގެން އިޒްރޭލުން ކުރިން ބުނެފައިވަނީ އެގެއަށް ހަމަލާދިނީ އެގެއަކީ ފަލަސްތީންގެ އިސްލާމިކް ޖިހާދު ގްރޫޕްގެ ކޮމާންޑަރެއްގެ ގެއެއް ކަމަށްވާތީ ކަމަށެވެ. ނަމަވެސް ރަސްމިގެ އާއިލާއިން ވަނީ އެކަން ދޮގުކޮށްފަ އެވެ.

އަންގާރަދުވަހު އިޒްރޭލްގެ ސިފައިން ނެރުނު ބަޔާނެއްގައި ބުނެފައިވަނީ ހަމަލާތައް ދިނުމުގެ ކުރިން އެގައުމުގެ އިންޓަލިޖެންސަށް މައުލޫމާތު ލިބިފައިވަނީ އެ ގެ ހުންނަ ސަރަހައްދަކީ އިސްލާމިކް ޖިހާދު ގްރޫޕުން ހަނގުރާމަ އަށް ބޭނުންކުރާ ހިސާބެއް ކަމަށެވެ. އަދި އެ ސަރަހައްދުގައި އާންމުން ނޫޅޭނެ ކަމަށް ލިބިފައިވާތީ މައުލޫމާތުން އެނގިފައިވާތީ ދޭ ހަމަލާއެއްގެ ސަބަބުން އާންމުންނަށް ގެއްލުން ނުވާނެ ކަމަށް އިޒްރޭލްގެ ސިފައިންނަށް ގަބޫލުކުރެވިފައިވާ ކަމަށް ބަޔާނުގައި ބުނެފައިވެއެވެ.

ނަމަވެސް މިހަމަލާތަކަށް ފަހު ބެލިބެލުމުން އެނގުނީ އެސަރަހައްދަކީ ހަނގުރާމައިގެ ބޭނުމަށް ބޭނުންކުރާ ސަރަހައްދެއް ކަމަށްވިޔަސް އެސަރަހައްދުގައި އާންމުން އުޅޭ ކަމުގަ އެވެ. އަދި މިހެދުނު ގޯހުން ފިލާވަޅު ލިބިގަނެ މިފަދަ އެހެން ހާދިސާތައް ތަކުރާރުވިޔަ ނުދިނުމަށް މަސައްކަތް ކުރާނެ ކަމަށްވެސް ބަޔާނުގައި ބުނެފައިވެއެވެ. އަދި އާންމުންނަށް ގެއްލުން ނުވާނެ ގޮތަށް މިފަދަ ހަމަލާތައް ދިނުމަށް މަސައްކަތް ކުރާނެކަމަށްވެސް ބަޔާނުގައި ބުނެފައިވެ އެވެ. ނަމަވެސް އިޒްރޭލްގެ ސިފައިންގެ މިބަޔާނުގައި އިސްލާމިކް ޖިހާދު ގްރޫޕުން އާންމުން ނިވާފަތް ގަނޑަކަށް ބޭނުންކޮށްގެން ހަމަލާތައް ދެމުންދާ ކަމަށާއި އާންމުން ގިނައިން އުޅޭ ސަރަހައްދުތަކުގައި އެގްރޫޕްގެ އަސްކަރީ ހަރަކާތްތައް ކުރިޔަށްގެންދާ ކަަމަށް ބުނެފައިވެއެވެ.