2015ވަނަ އަހަރު އިދިކޮޅު ކެންޑިޑޭޓެއްގެ ގޮތުގައި ސިރިސޭނާ ނެރުމަކީ ހެދުނު ގޯހެއް: ފޮންސެކާ

2015ވަނަ އަހަރު އަވަށްޓެރި ސްރީލަންކާގައި ބޭއްވި ރިޔާސީ އިންތިޚާބުގައި އިދިކޮޅު ފަރާތްތަކުން ގުޅިގެން މައިތިރިޕާލާ ސިރިސޭނާ ނެރުވުނީ ގޯހަކުންކަމަށް ލަންކާގެ އިދިކޮޅު ލީޑަރެއްކަމަށްވާ ސަރަތު ފޮންސެކާ ވިދާޅުވެއްޖެއެވެ.

ލަންކާގައި ބޭއްވި މަސަައްކަތްތެރިންގެ އެއްވުމެއްގައި ވާހަކަ ދައްކަވަމުން ފޮންސެކާ ވިދާޅުވީ ރައީސްކަމުގެ މަޤާމަށް އިދިކޮޅު ކެންޑިޑޭޓެއްގެ ގޮތުގައި ނިކުމެވަޑައިގަތުމަށް މިހާރުގެ ބޮޑުވަޒީރު ރަނިލް ވިކްރަމަ ސިންހައަށް ދެންނެވިކަމަށެވެ. އެހެން ނަމަވެސް އިދިކޮޅު ފަރާތްތަކުން ބޭނުންވީ ސިރިސޭނާ ނެރުމަށްކަން އޭނާ ފާހަގަކުރެއްވިއެވެ.

ފޮންސެކާ އަކީ 2009ވަނަ އަހަރު ލަންކާގެ ދާޚިލީ ހަނގުރާމަ ނިމުމަކަށް ގެނައުމުގެ އޮޕަރޭޝަން ހިންގިއިރު އެއްގަމު ސިފައިންގެ ވެރިޔާއެވެ. ހަނގުރާމަ ނިމުނުތަނާހެން އޭރުގެ ރައީސް މަހިންދަ ރާޖަޕަކްސަ ވަނީ އެއްގަމު ސިފައިންގެ ވެރިޔާގެ މަޤާމުން، މުޅި އަސްކަރިއްޔާގެ ވެރިޔާގެ މަޤާމަށް ޕްރޮމޯޓްކުރައްވާފައެވެ. އެހެން ނަމަވެސް، އެމަޤާމަކީ މަސްއޫލިއްޔަތުތަކެއް ނެތް މަޤާމެކެވެ.

2010 ވަނަ އަހަރު ލަންކާގެ ރިޔާސީ އިންތިޚާބުގައި ފޮންސެކާ ވަނީ ރާޖަޕަކްސައާއި ވާދަކުރައްވާފައެވެ. އެހެން ނަމަވެސް އޭނާއަށް އިންތިޚާބުގައި ކުރިމަތިވެވަޑައިގެންނެވި ނާކާމިޔާބީއާއިއެކު، ޖެހިގެން އައި އަހަރު އާއްމު އިންތިޚާބުގައި ވާދަކޮށް، ޤާނޫނު ހަދާ މަޖިލީހުގެ ގޮނޑިއެއް ހޯއްދެވިއެވެ. އެހެންނަމަވެސް މާގިނަ ދުވަސްތަކެއް ނުވެ، ފޮންސެކާ ޖަލަށް ލެވި، ޤާނޫނު ހަދާ މަޖިލީހުގެ ގޮނޑި ގެއްލުނެވެ.

ބޮޑުވަޒީރު ރަނިލްގެ ޔޫއެންޕީއާއި ފަހުން ގުޅިވަޑައިގެން ސިޔާސީ މައިދާނަށް އަލުން ނިކުމެވަޑައިގެންނެވި ފޮންސެކާއަށް މިމަހުގެ 1 ވަނަ ދުވަހު ލަންކާގެ އައު ކެބިނެޓްގެ ވައިލްޑްލައިފް އެންޑް ސަސްޓެއިނަބަލް ޑިވެލޮޕްމަންޓް މިނިސްޓަރކަން ވަނީ ދެއްވާފައެވެ.

ސިރިސޭނާއަށް ފާޑުވިދާޅުވެ ފޮންސެކާ ވާހަކަ ދެއްކެވިއިރު، ރައީސް ސިރިސޭނާއާއި ބޮޑުވަޒީރު ރަނިލް އާއި ދެމެދު ވަނީ ބޮޑެތި މައްސަލަތަކެއް ޖެހިފައެވެ. އަދި ދާދިފަހުން ސިރިސޭނާގެ ފްރީޑަމް ޕާޓީގެ އިސްނެގުމަކަށް ރަނިލްގެ އިތުބާރު ނެތްކަމުގެ މައްސަލަ ޤާނޫނު ހަދާ މަޖިލީހަށް ވެއްދިއެވެ. އެހެން ނަމަވެސް ރަނިލް ވަނީ އެވޯޓު ކާމިޔާބުކުރައްވާފައެވެ.