ބަހުގެ ހިދުމަތްތައް އޮންލައިންކޮށް ބެލޭ ''ބަސް އެޕް'' ލޯންޗުކޮށްފި
25 ޑިސެމްބަރު 2019 | ބުދަ 14:17އައު ވެބްސައިޓްވެސް ވަނީ ލޯންޗުކޮށްފައި
އެމްޕީއެލްގެ މޯބައިލް ބަސް އެޕް
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ދެމުންގެންދާ ބަހުގެ ހިދުމަތްތަކުގެ މައުލޫމާތު އާއްމުންނަށް ފަސޭހައިން ލިބޭ ގޮތަށް މޯބައިލް ''ބަސް އެޕްލިކޭޝަން'' ލޯންޗު ކޮށްފިއެވެ.
ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތެއްގައި ''ބަސް އެޕްލިކޭޝަން''ގެ އިތުރުން އެމްޕީއެލްގެ އައު ވެބްސައިޓް ލޯންޗު ކޮށްދެއްވީ ޓްރާންސްޕޯޓް މިނިސްޓަރު އައިޝަތު ނަހުލާއެވެ.
ބަސް އެޕްލިކޭޝަން މެދުވެރިކޮށް ބަސް އޮންނަ ތަނާއި، ބަހުގެ ޝެޑިއުލްގެ އިތުރުން ބަސް ކާޑު ރީޗާޖު ކުރެވޭނެއެވެ. އަދި ޕަބްލިކް ޓްރާންސްޕޯޓާއި ބެހޭ ގިނަ މައުލޫމާތުތަކެއް އެ އެޕް މެދުވެރިކޮށް ލިބެނޭ ކަމަށް އެމްޕީއެލުން މައުލޫމާތުދެއެވެ.
''މާލެ ބަސް'' އެޕުން މިހާރު އެންޑްރޮއިޑް ފޯނުތަކުން ޑައުންލޯޑް ކުރެވޭނެއެވެ. އައިފޯނުގެ އެޕްސްޓޯރުން ތިން ދުވަހެއްގެ ތެރޭގައި އެޕް ޑައުންލޯޑްކުރެވެން ހުންނާނެއެވެ.
އަލަށް ތައާރަފް ކުރެވުނު ހިދުމަތްތަކުގެ ޕްރެޒެންޓޭޝަނެއް އެމްޕީއެލުން ވަނީ ދައްކާލާފައެވެ. ހިދުމަތްތަކުގެ ތަފްސީލު ދެއްވަމުން އެމްޕީއެލްގެ ޑޭޓާ ބޭސްޑް އިންޖިނިއަރ އިލްޔާސް މުހައްމަދު ވިދާޅުވީ، އެ އެޕް މެދުވެރިކޮށް ބަސް ޑްރައިވަރުން ދުއްވަން ކަނޑައަޅާފައިވާ ވަރަށް ވުރެ މަތީ ސްޕީޑެއްގައި ދުއްވާނަމަ އެ ވަގުތު ހުންނަ ސުޕަވައިޒަރަށް އެޕްލިކޭޝަން މެދުވެރިކޮށް ނޮޓިފިކޭޝަނެއް ލިބޭނެ ކަމަށެވެ. އަދި ވަގުތުން އެ ދުއްވާ ސްޕީޑު ދަށްކުރުމަށް އިރުޝާދު ސުޕަވައިޒަރު ޑްރައިވަރަށް ދޭނެ ކަމަށެވެ.
އެމްޕީއެލްގެ އައު ވެބްސައިޓާ ޕޯޓަލްގެ މައުލޫމާތު ދެއްވަމުން އޭނާ ވިދާޅުވީ، ޕޯޓަލް އަކީ މުދާ ގަންނަ ފަރާތްތަކުން ރަޖިސްޓްރީ ކުރުމަށް ހަދާފައިވާ ޕޯޓަލްއެއް ކަމަށެވެ. އެ ޕޯޓަލް މެދުވެރިކޮށް ކޯޓޭޝަން އޮންލައިންކޮށް ސަބްމިޓްކޮށް ކުރެވޭނެއެވެ. ކޮންމެ ފަރާތަކަށްވެސް ކޯޓޭޝަންތައް ސަބްމިޓް ކުރުމަށް ވަކި މުއްދަތެއް ލިބޭނެއެވެ. އެމްޕީއެލުން ބުނީ އައު ވެބްސައިޓްގެ ''ވެސެލް މޫވްމެންޓް'' މެދުވެރިކޮށް ރާއްޖެެއާއި ބޭރުން އަންނަ ބޯޓު ފަހަރުގެ ތަފްސީލު ލިބިގެންދާނެ ކަމަށެވެ. އަދި ކޮންޓެއިނަރތަކުގެ މައުލޫމާތުގެ އިތުރުން ވެހިކަލް ކިޔޫވެސް ވެބްސައިޓް މެދުވެރިކޮށް ބެލޭނެއެވެ.
އެމްޕީއެލުން އަލަށް ތައާރަފް ކުރެވުނު ހިދުމަތްތަކާއި ބެހޭ ގޮތުން ވާހަކަ ދައްކަވަމުން އެ ކުންފުނީގެ ސީއީއޯ ޝާހިދު އަލީ ވިދާޅުވީ، އައު ވެބްސައިޓް މެދުވެރިކޮށް އެމްޕީއެލްއާ ބެހޭ މައުލޫމާތުތައް ފަސޭހައިން ދެނެވިގަނެވޭނެ ކަމަށެވެ. އެމްޕީއެލްގެ ވެބްސައިޓް ފަރުމާކޮށްފައިވަނީ އެއްތަނަކުން އެތައް މައުލޫމާތުތަކެއް ލިބޭ ގޮތަށެވެ. ޝާހިދު ވިދާޅުވި ގޮތުގައި، ވެބްސައިޓްގައި ހިމެނޭ ވެންޑަރ ޕޯޓަލް އިން އެ ކުންފުނިން ހިދުމަތް ހޯދާ ފަރާތްތަކަށް އޮންލައިންކޮށް އެ ކުންފުނީގެ ޕްރޮކިއުމެންޓް ސިސްޓަމްގައި ރަޖިސްޓަރ ކުރެވޭނެ ކަމަށެވެ.
އެމްޕީއެލްގެ މަގުސަދަކީ ކުންފުނީގެ ސިޔާސަތާއި އެއްގޮތަށް ފޯރުކޮށްދޭ ހިދުމަތަކީ ދެފުށް ފެންނަ ގޮތަށް ކުންފުންޏަށް ވެސް ހަރަދު ކުޑަ ގޮތަކަށް ހަދައި އެންމެ ރަނގަޅު ގޮތަކަށް ތަކެތި ހޯދޭގޮތް ހެދުމެވެ.
