ފުލުހުންނަށް އަހަރަކު ބިލިއަނަކަށް ވުރެ ގިނަ ރުފިޔާ ދެނީ ހަމައެކަނި ރައީސް ޔާމީން ޙިމާޔަތްކުރާކަށް ނޫން!

އަންނަ އަހަރުގެ ބަޖެޓްގައި ދިވެހި ފުލުހުންނަށް 1.3 ބިލިއަން ރުފިޔާ ކަނޑައަޅާފައިވެއެވެ. ޤާނޫނު ތަންފީޒްކުރުމުގެ މަސައްކަތް ފުރިހަމަޔަށް ކުރާ ތަނަކަށް މިއީ ރާއްޖެ ކަހަލަ ކުޑަ ޤައުމެއްގައި އެކަށީގެންވާ އަދަދެކެވެ. ތިރީސް ބިލިއަން ހަމަނުވާ ޖުމްލަ ބަޖެޓެއްގައި މިއީ އެކަމަކު ބޮޑު އަދަދެކެވެ. އެހެންކަމުން މިވަރުގެ ބަޖެޓެއް ފުލުހުންނަށް ދިނުމުން، ޚިދުމަތް ރަނގަޅުވާނެ ކަމަށް އުއްމީދުކުރެވުނެވެ.

ފުލުހުން މިހާރު ދޭ ޚިދުމަތަކީ ސިޔާސީ ކުލަ ޖެހިފައިވާ ޚިދުމަތެއް ކަމަށް ސިޔާސީ ބޭފުޅުންނާއި އާއްމުން ބުނަނީ ކަމެއް ވީމައެވެ. ފުލުހުންގެ ބައެއް ނިންމުންތަކުގައި ސިޔާސީ ކުލަ ޖެހިފައި ވާތީއެވެ. "ޓު ޕްރޮޓެކްޓް އެންޑް ސަރވް" އޭ ބުނާއިރު، "ޓު ޕްރޮޓެކްޓް އެންޑް ސަރވް ދަ ގަވަރމަންޓް" އޭ ހީވާ ފަދަ ގޮތަކަށް ފުލުހުންގެ ޢަމަލުތައް ހުންނާތީއެވެ.

ބުރާސްފަތި ދުވަހު ޚަބަރުގައި އަޑުއިވުނު ވާހަކަޔަކީ ގދ. މަޑަވެލީގައި ފުލުހުން ތިބޭ ތަނަށް ކައުންސިލުން ކުލި ނުދައްކައިގެން އެރަށުގައި ފުލުހުންގެ ޚިދުމަތް ދިނުން ހުއްޓާލާ ވާހަކައެވެ. މިއީ ހައިރާންވާން ޖެހޭ ކަމެކެވެ. މުވައްޒަފުންގެ މުސާރަ ކިރިޔާ ހަމަޖައްސާލެވޭ ވަރަށް ރަށްރަށުގެ ކައުންސިލްތަކަށް ބަޖެޓް ހަމަޖައްސަމުންދާއިރު، އެރަށްރަށުގައި ތިބޭ ފުލުހުންނަށް ވެސް ޚަރަދުކުރަން ޖެހެނީ ކައުންސިލުން ތޯއެވެ؟ އެކަން ހުއްޖަތެއްގެ ގޮތުގައި ނަގައި، މަޑަވެލީގެ ރައްޔިތުންނަށް ފުލުހުންގެ ޙިމާޔަތާއި ރައްކާތެރިކަން ދިނުން ހުއްޓާލުން ބުއްދީގެ ހަމަތަކުގެ މަތިން ޤަބޫލުކުރާނީ ކިހިނެއްތޯއެވެ؟ މަޑަވެލީގެ ރައްޔިތުން ވެސް ދައުލަތަށް ޓެކްސް ދައްކައެވެ. ޖޫރިމަނާ ވެސް ދައްކައެވެ. ދެން ވެސް ސަރުކާރުން ދައްކަން ބުނިއްޔާ ބުނި އެއްޗެއް ދައްކައެވެ. އެހެން ނަމަވެސް ފުލުހުން އެރަށުގައި ތިބޭ ތަނަށް ދެއްކޭނެ ކުލި ނެތިގެނ ފުލުހުން އެރަށުން ފައިބަން ޖެހެނީއޭ ބުނީމާ އެއްކަލަ އެއް ބިލިއަން ރުފިޔާއަށް ހަދާ ގޮތެއް ބަލަން ރައްޔިތުން ވެއްޖެ ނޫންތޯއެވެ؟ އެ ވަރުގެ ބޮޑު ބަޖެޓެއް ކަނޑައަޅާފައި ފުލުހުންގެ ޚިދުމަތް ހޯދަން ބޭނުން ރަށްރަށުން ފުލުހުން ތިބޭނެ ތަންތަނާއި ކާންބޯން ކުރާ ޚަރަދާއި އެ މީހުންގެ މުނިފޫހިފިލުވުމުގެ ހަރަކާތްތަކާއި އެ ނޫން ވެސް ދެން ހުރި ހުރިހާ ކަމެއްގެ ޚަރަދު ދޭންޖެހޭ ސަބަބެއް ހަމަ އެއްގޮތަކަށް ވެސް ނުވިސްނެއެވެ.

ކުލި ދައްކާނެ ފައިސާ ނެތިގެން ރަށްރަށުގައި ފުލުހުންގެ ޚިދުމަތް ހުއްޓާލަން ޖެހުނުއިރު، ގެއެއްގެ ދެތިން މަހުގެ ކުލި ދެއްކޭހާ ފައިސާ ޚަރަދުކޮށްގެން ރައީސް ޔާމީން ރަށަކަށް އަރާވަޑައިގަތުމުގެ ކުރިން އެރަށަށް ފުލުހުންގެ ބޮޑު ފައުޖެއް އަރުވައެވެ. އެއީ ރަސްމީ ނޫނަސް ޕާޓީގެ ބޭނުމެއްގައި ކުރައްވާ ދަތުރުފުޅަކަސް އެކަން އޮންނަނީ އެހެންނެވެ. ރައީސް ޔާމީނާ އެކު ހަތިޔާރު އެޅި ސިފައިން ވެސް ދެއެވެ. ދެން ބޭކާރު ޚަރަދުކޮށްފައި ކީއްކުރަން ގެންދާހާ ފުލުހުންނެއްތޯއެވެ؟ އެފުލުހުން ގޮސް ކުރާހާ ވެސް ކަމަކީ މަޑުމަޑުން ޚިޔާލު ފާޅުކޮށްލަން ތިބޭ މީހުންނަށް ހުރަސް އެޅުމެވެ. އަދި މި ދަތުރުތަކުގައި ތަންކޮޅެއް ދުރުގައި އޮތް ރަށަކަށް ގޮސް އެހޯދާ ކޯޓު އަމުރު ހޯދަން އެކުރާ ދަތުރަށް ވެސް ގައިމު އެއް މަހުގެ ގޭ ކުލި ދެއްކޭހާ ފައިސާ ޚަރަދުވާނެއެވެ.

މި ހުންނަނީ 21 ވަނަ ޤަރުނުގައި ސިންގަޕޫރު ކަމަށް ހެދިގެން އުޅޭ ޤައުމެއްގައި ދެން ދައްކައި އުޅޭ ޒާތުގެ ވާހަކައެއް ވެސް ނޫނެވެ. އެހެން ނަމަވެސް ރާއްޖޭގެ ޙާލަތު މިއޮތީ މިފަދަ ވާހަކަތައް ނުދައްކައި ދޫކޮށްލެވޭ ގޮތަކަށް ނޫނެވެ.

ދިވެހި ފުލުހުންނޭވެ. ތިޔަ ބޭފުޅުންނަކީ ރައްޔިތުން ޤަދަރުކުރާ ބަޔެކެވެ. ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދޭނެ ކަމަށް ރައްޔިތުން އުއްމީދުކުރާ ބަޔެކެވެ. އެހެން ނަމަވެސް ފަހަކަށް އައިސް ފެނުނީ މުޅިން ތަފާތު މަންޒަރުތަކެކެވެ. ކާނަލް ނާޒިމް ޖަލުގައި އެހުންނަވަނީ ގައިމު ފުލުހުންގެ ސްވޮޓާއި އެސްއޯގެ ތެރެއިން ގޯހެއް ހަދައިގެން ނޫންތޯއެވެ. ކުރީގެ ނާއިބު ރައީސް އަދީބު ހައްޔަރުކުރުމަށް ފަހު ފުލުހުންގެ ކޮރަޕްޝަންގެ ވާހަކަ ދެއްކެވީ ހަމަ މިސަރުކާރުން ނޫންތޯއެވެ؟ ކޮމިޝަނަރ އޮފް ޕޮލިސްކަމުން ހުސެން ވަހީދު ދުރުކުރެއްވީ ގައިމު އެބޭފުޅާ ސީޕީ ކަމުގައި ހުންނެވުމަށް ވުރެ ހައުސިން މިނިސްޓްރީގައި ހުންނެވުމަށް ޤާބިލްކަމަށް ސަރުކާރަށް ފެނިގެނެއް ނޫނެވެ.

ފުލުހުން ތަބާ ވާން ޖެހޭނީ ޤާނޫން އަސާސީ އާއި ޤާނޫންތަކަށެވެ. ހަމަ ވެރިޔަކު ވިދާޅުވާ އިރަށް އެވިދާޅުވާ ގޮތަކަށް އުޅޭކަށް ނުޖެހެއެވެ. ފުލުހުންގެ ތެރޭގައި މިއަދު ގިނައީ މިކަންކަން ޤަބޫލުކުރައްވާ ބޭފުޅުންނެވެ. ފުލުހުންގެ އިސްވެރިން ސިޔާސީ ކުލަ ޖެހިގެން އެކުރައްވާ ކަންކަމަށް ނުރުހޭ ބޭފުޅުންނެވެ. ދާދިފަހުން ފުލުހުންގެ ވެރިންގެ އަމުރަށް އިންޓަގްރިޓީ ކޮމިޝަނުގެ މަސައްކަތްތަކަށް ފުލުހުންގެ ބަޔަކު ހުރަސްއެޅި މައްސަލައިގައި އެކޮމިޝަންގެ ރައީސް ފުލުހުންގެ މައްޗަށް ޤާނޫނު ހިނގާނެކަމުގެ އިންޒާރު ދެއްވުމުން އެބޭފުޅާ ވެސް މަޤާމުން ވަކިކުރެއްވީއެވެ. މިއީވެސް ފުލުހުންގެ ގިނަ ބަޔަކު ރުހިގެން ތިބިކަމެއް ނޫނެވެ.

ފުލުހުންނަކީ ރައީސް ޔާމީނާއި ސަރުކާރަށް ޚިދުމަތް ކުރާ ބައެއްގެ ބަދަލުގައި ރައްޔިތުންނާއި ދައުލަތަށް ޚިދުމަތްކުރާ ބަޔަކަށް ވާން ޖެހެއެވެ. އަޅުގަނޑުމެން ދައްކާ ޓެކްސް ފައިސާއިން ތިޔަބޭފުޅުންނަށް އަހަރަކު ބިލިއަނެއްހާ ރުފިޔާ މިދެނީ ހަމައެކަނި ނޫކުލައިގެ ޔުނިފޯމް ލައިގެން މާލޭގެ މަގުތަކުގައި ދެކޮޅަށް ސައިކަލުގައި ނުވަތަ ވެހިކަލްގައި ދުއްވާކަށް ނޫނެވެ. ނުވަތަ ހަމައެކަނި މާލޭގައި ފުލުހުންގެ ޚިދުމަތް ފޯރުކޮށްދޭކަށް ނޫނެވެ. ޓެކްސް ދެއްކުމުގައި މާލޭގައި ދިރިއުޅޭ މީހުންނެކޭ މަޑަވެލީގައި ދިރިއުޅޭ މީހުންނެކޭ ވަކި ތަފާތެއް ނެތެވެ. އެހެން ކަމުން ފުލުހުންގެ ޚިދުމަތް ހޯދަން މާލޭގައި ދިރިއުޅޭ މީހުން ފުލުހުންގެ ހުރިހާ ޚަރަދެއް ކުރަން ނުޖެހޭ ފަދައިން އެ ޚިދުމަތް ހޯދަން މަޑަވެލީ ކައުންސިލްގެ ބަޖެޓުން ޚަރަދުކޮށް ނުވަތަ ރައްޔިތުންގެ އަތުން ޚަރަދުކުރަންޖެހޭ އެއްވެސް ސަބަބެއް ނެތެވެ. ފުލުހުންނަކީ ހަމައެކަނި ސިޔާސީ މީހުން ހިމާޔަތްކުރަން ތިބެންޖެހޭ ބައެއް ނޫނެވެ. ރަށުފުށުގައި ދިރިއުޅޭ އެންމެ އާދައިގެ މީހާ އަށް ވެސް ފުލުހުން ޚިދުމަތް ކޮށްދޭންޖެހެއެވެ. ހިމާޔަތް ހޯދައިދޭންޖެހެއެވެ. ބިލިއަން ރުފިޔާގެ ބަޖެޓަކީ ހަމައެކަނި ސިޔާސީ މީހުން ދައްކާ ޓެކްސް އިން ހޯދާފައިސާއެއް ނޫނެވެ. އެއީ އާންމު ރައްޔިތު މީހާ ވެސް ދައްކާ ފައިސާ އިން ދައުލަތަށް ލިބޭ އާންމުދަނީން ކަނޑައަޅާ ބަޖެޓެކެވެ.