އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި އެކުއެޓިކް ފިޒިއޮތެރަޕީގެ ޚިދުމަތް ފަށައިފިއެވެ.
އައިޖީއެމްއެޗުން ބުނީ އެކުއެޓިކް ފިޒިއޮތެރަޕީގެ ޚިދުމަތް އައިޖީއެމްއެޗުގެ ދަރުމަވަންތަ ކޮމްޕްލެކްސްގައިދޭން ފަށާފައިވާ ކަމަށެވެ.
މިއީ ވާންވެފައިވާ ހުޅުތަކުގައި ހުންނަ ރިހުންތަކާއި މަސްފަށަލަތަކަށް ދޫޖެއްސުމަށް އެހީތެރިވެދޭ ފަރުވާއެއް ކަމަށް އައިޖީއެމްއެޗުން ބުނެއެވެ. އައިޖީއެމްއެޗުގެ މީޑީއާ އޮފިޝަލް ރާއްޖެއެމްވީއަށް ވިދާޅުވީ އެކުއެޓިކް ފިޒިއޮތެރަޕީގެ ޚިދުމަތް ފެށީ ހޯމަ ދުވަހު ކަމަށެވެ.
އޮފިޝަލް ވިދާޅުވީ ހުޅުތަކުގެ ރިހުން ހުންނަ މީހުންނާއި، މަސްފަށަލަތަކަށް މައްސަލަ ޖެހޭ މީހުން ޑޮކްޓަރަށް ދެއްކުމަށްފަހު، ފިޒިއޮތެރަޕިސްޓެއްގެ އިރުޝާދުގެ ދަށުން ކޮންމެ ދުވަހަކު ވެސް އެކުއެޓިކް ފިޒިއޮތެރަޕީގެ ޚިދުމަތް ލިބޭނެ ކަމަށެވެ.
އެކުއެޓިކް ފިޒިއޮތެރަޕީއަކީ 34 ޑިގްރީ ސެލްސިއަސްގެ ހޫނު މިނުގައި ހުންނަ ފެންގަނޑެއް ތެރޭ ކުރާ ކަސްރަތެކެވެ.
