މުޅި ރިސޯޓް އެއްކޮށް މަރާމާތު ކުރުމަށްފަހު ބޮޑެތި ބަދަލުތަކާއެކު ސިނަމަން ހަކުރާ ހުރާ މޯލްޑިވްސް އަލުން ހުޅުވައިފި އެވެ.

މ އަތޮޅުގައި ހިންގާ މިރިސޯޓް މަރާމާތުކުރުމަށް ބަންދުކުރީ 2018 ވަނަ އަހަރު އެވެ. އެއަށްފަހު މިމަހުގެ 16 ވަނަ ދުވަހު ރިސޯޓް އަލުން ހުޅުވާފައިވާއިރު އަލަށް 2.5 ހެކްޓަރ ވަނީ ރިސޯޓަށް އިތުރުކޮށްފަ އެވެ. މައި ރަށާއި އެ ރަށާ އިންވެގެން ހަދާފައިވާ ރަށް ވަނީ ވޯކްވޭއަކުން ގުޅާލާފަ އެވެ. ބޮޑެތި މީހުންނަށް ޚާއްޞަ ޕްރައިވެޓް އައިލެންޑެއް މިރިސޯޓުގައި އަަލަށް ތަރައްޤީކޮށްފައިވެއެވެ.

ހަކުރާ ހުރާ އިން ބުނީ މައި ރަށުގައި ހުންނާނީ ބީޗް ބަންގަލޯ އާއި ވޯޓަރ ބަންގަލޯ ކަމަށެވެ. އެގޮތުން 70 ވޯޓާ ބަންގަލޯ އެރަށުގައި ހުންނާނެ ކަމަށް ހަކުރާ އިން ބުނެއެވެ. އަދި ބޮޑެތި މީހުންނަށް ޚާއްޞަ ރަށުގައި ހުންނާނީ ޕްލެޓިނަމް ބީޗް ބަންގަލޯ ކަމަށް ހަކުރާ ހުރާ އިން ބުނެއެވެ. އެރަށުގައި 20 ޕްލެޓިނަމް ބީޗް ބަންގަލޯ ހުންނާނެކަމަށް ހަކުރާއިން ބުނެއެވެ. މި ބަންގަލޯ ތައް ޚާއްސަކުރެވިފައިވަނީ ދެމީހުންނަށާއި ގްރޫޕު ހަދައިގެން ރިސޯޓަށް ޗުއްޓީ ހޭދަކޮށްލަން އަންނަ ފަރާތްތަކަށްކަމަށްވެސް ހަކުރާއިން ބުނެއެވެ. މި ބަންގަލޯތައް ޚާއްސަކުރެވިފައިވަނީ 18 އަހަރުން މަތީގެ ބޮޑެތި މީހުންނަށެވެ. އަދި މިރަށުގައި ހުންނަ ޕޫލް އާއި ރެސްޓޯރެންޓަކީ ހަމައެކަނި ޕްލެޓިނަމް ބީޗް ބަންގަލޯ ގައި ތިބޭ ގެސްޓުންނަށް ޚާއްސަ ތަންތަންކަމަށް ހަކުރާއިން ބުނެއެވެ.

މީގެއިތުރުން މައި ރަށުގައި ތިން ރެސްޓޯރެންޓެއް، ކޮންމެ ރެސްޓޯރެންޓަކަށް ވަކި ޚާއްޞަ މެނޫތަކަކާއެކު ހުންނާނެ ކަމަށް ހަކުރާއިން ބުނެއެވެ.

ސިނަމަން ހަކުރާ ހުރާ އަކީ ސްރީލަންކާގެ ޖޯން ކީލްސް އިން ރާއްޖޭގައި ހިންގަމުން އަންނަ ހަތަރު ރިސޯޓުގެ ތެރެއިން އެއް ރިސޯޓެވެ. ދެން މިކުންފުނިން ރާއްޖޭގައި ހިންގަނީ ސިނަމަން ދޮންވެލި މޯލްޑިވްސް އާއި އެއްލައިދޫ މޯލްޑިވްސް ބައި ސިނަމަން އަދި ދާދިފަހުން ހުޅުވި ސިނަމަން ވިލުފުށި މޯލްޑިވްސް އެވެ.