ރައީސް ނަޝީދުގެ ވެރިކަމާއި ދެކޮޅަށް އޭރު ސަލަފުން ކޮށްފައިވަނީ ބަޢާވާތެއް: މަކްތަބާ ސަލަފިއްޔާ
2011 ވަނަ އަހަރު ދީނީ އިލްމުވެރިންތަކެއް "ދީނީ ޓެގް" އަޅުވައިގެން ނުކުތް ކަމަށް ބުނި
2011 ވަނަ އަހަރު ދީނީ އިލްމުވެރިންތަކެއް ބޭއްވި އެއްވުމުގެ ތެރެއިން
ކުރީގެ ރައީސް މުހައްމަދު ނަޝީދުގެ ވެރިކަމާއި ދެކޮޅަށް ޖަމިއްޔަތުއްސަލަފުން އޭރު ކޮށްފައިވަނީ ބަޢާވާތެއްކަމަށް ދޭހަވާ މޭރުމުން މަކްތަބާ ސަލަފިއްޔާއިން ވާހަކަ ދައްކައިފިއެވެ.
އާދިއްތަ ދުވަހު ހޮޓެލް ޖެންގައި ބޭއްވި ނޫސްވެރިންގެ ބައްދަލުވުމެއްގައި މަކްތަބާ ސަލަފިއްޔާގެ އިލްމުވެރިއެއް ކަމަށްވާ ޝެއިޙް މުހައްމަދު ހަސަން ވިދާޅުވީ، މުސްލިމު ވެރިއަކާއި ދެކޮޅަށް ނުނުކުމެވޭނެ ކަމަށާއި، ނަމަވެސް 2011 ވަނަ އަހަރު ދީނީ އިލްމުވެރިންތަކެއް "ދީނީ ޓެގް" އަޅުވައިގެން އޭރު ހުންނެވި ވެރިޔާއާއި ދެކޮޅަށް ނުކުތް ކަމަށެވެ. އެގޮތުން އެވާހަކަ ދައްކަވަމުން ޝެއިޙް ހަސަން ވަނީ ޖަމިއްޔަތުއް ސަލަފުގެ ނައިބްރައީސް ޝެއިޙް ހަސަން މޫސާ ފިކުރީއާއި، ސަލަފުގެ އިލްމުވެރިއެއް ކަމަށްވާ ޝެއިޙް އަލީ ޒާހިރުގެ އިތުރުންވެސް ގިނަ ޢިލްމުވެރިންތަކެއް އޭރު ރައީސް ނަޝީދާއި ދެކޮޅަށް ކުރެއްވި މުޒާހަރާތަކުގެ ފޮޓޯތައް ނޫސްވެރިންނާއި ހިއްސާކުރައްވާފައެވެ.
ރާއްޖޭގައި ހަރުކަށި ފިކުރު ފަތުރާކަމުގެ ބޮޑެތި ތުހުމަތުތަކެއް މަކްތަބާ ސަލަފިއްޔާއިން ސަލަފް ޖަމިއްޔާގެ ގިނަ އިލްމުވެރިންތަކެއްގެ މައްޗަށް ކޮށްފައިވާއިރު، ޖަމިއްޔަތުއް ސަލަފްގެ ރައީސް ޝެއިޙް އަބްދުﷲ ބިން މުހައްމަދު އިބްރާހިމް (ބިން ޖަނާބް) އާއި ގުޅޭގޮތުން މަކްތަބާ ސަލަފިއްޔާއިން ބުނީ، ޓެރަރިޒަމްގެ އަމަލުތަކަށް ހިތްވަރުދީ ބިން ޖަނާބް އެތައް ފަހަރަކު ވާހަކަ ދައްކަވާފައިވާ ކަމަށެވެ.
މަކްތަބާ ސަލަފިއްޔާއިން އެހެން ބުނެފައިވާއިރު، ރައީސް ނަޝީދުގެ ވެރިކަމާއި ދެކޮޅަށް 2011 ވަނަ އަހަރުގެ ސެޕްޓެމްބަރު މަހުގެ ތެރޭގައި ދީނީ އިލްމުވެރިންތަކެއް ނުކުމެ ވަނީ އަޑުއުފުލާފައެވެ. އެގޮތުން އޭރު ނުކުތް މީހުންގެ ތެރޭގައި ކުރީގެ އިސްލާމިކް މިނިސްޓަރ ޑރ މުޙައްމަދު ޝަހީމް އަލީ ސައީދުވެސް ހިމެނިވަޑައިގަންނަވައެވެ.
އޭރު ރައީސް ނަޝީދުގެ ވެރިކަމަށް ސަލަފް ޖަމިއްޔާއިން ވަރަށް ބޮޑަށް ފާޑުކިޔައި ނޫސްބަޔާންތައްވެސް ނެރިފައިވާއިރު، ރާއްޖެއިން އިސްލާމް ދީން ފުހެލުމަށް ބަޔަކު ފާޅުގައި މަސައްކަތްކުރާކަމަށާއި، އެކަމަށް ސަރުކާރުގެ މުއައްސަސާއަކުން ފިޔަވަޅުއަޅާފައިނުވާކަމަށް ބުނެ އޭރު ސަލަފުން ވަނީ އެކަންކަމަށް ފާޑުކިޔައި އެކަމަށް ފިޔަވަޅު އަޅައިދެއްވުމަށް ރައީސް ނަޝީދުގެ ކިބައިން އެދިވަޑައިގެންފައެވެ. އަދި އެކަންކަން ކުރުމަށް މަސްއޫލުވާ ފަރާތްތަކުން "އަޒުލު ކުރަން ޖެހިއްޖެ ހާލަތެއްގައި އަޒުލު ކުރުމަށް ފަސްނުޖެހުމަށްވެސް" ސަލަފުން ވަނީ ރާއްޖޭގެ ކޯޓުތަކާއި ފަނޑިޔާރުންނަށްވެސް ގޮވާލާފައެވެ.
