އިންޑިއާގެ ރަށްވެހިކަމުގެ ޤާނޫނަށް ގެނައި ބަދަލާއެކު އެޤައުމުގެ އެކި ހިސާބުތަކުގައި ކުރަމުންދާ މުޒާހަރާތަކުގައި މިހާތަނަށް 1500 އަށްވުރެ ގިނަ މީހުން ހައްޔަރުކޮށްފިއެވެ.

އިންޑިއާގެ އޮފިޝަލުންނާއި ހަވާލާދީ ބޭރުގެ ނޫސްތަކުން ރިޕޯރޓް ކޮށްފައިވާގޮތުން އިންޑިއާގައި ކުރަމުންދާ މުޒާހަރާތަކާއި ގުޅިގެން ފާއިތުވި 10 ދުވަސް ތެރޭގައި 1500 އަށްވުރެ ގިނަ މީހުން ވަނީ ހައްޔަރުކޮށްފައެވެ.

އެގޮތުން މިހާރު 1500 އަށްވުރެ ގިނަ މީހުން ހައްޔަރުގައި ތިބި ނަމަވެސް މުޒާހަރާތައް ފެށިގެންއައިއިރު 4000 އަށްވުރެ ގިނަ މީހުން ބަންދުކުރި ކަމަށާއި، ނަމަވެސް އެ މީހުން މިހާރު ދޫކޮށްލާފައިވާކަމަށް ރިޕޯރޓްތައް ބުނެއެވެ. އަދި ދޫކޮށްލި ފަރާތްތަކުންވެސް އަލުން މުޒާހަރާތަކާއި ގުޅެމުންދާކަން ފާހަގަވެފައިވާކަމަށް އޮފިޝަލުން ވަނީ ބުނެފައެވެ.

މިހިނގާ ޑިސެމްބަރު މަހުގެ 11 ވަނަ ދުވަހު އިންޑިއާގެ ޤާނޫނު ހަދާ މަޖިލީހުން ރަށްވެހިކަމުގެ ޤާނޫނަށް ބަދަލު ގެނެސް ފާސްކޮށްފައިވާއިރު، އެކަމާ ގުޅިގެން ކުރަމުންދާ މުޒާހަރާތަކުގައި މިހާތަނަށް 19 މީހަކު މަރުވެފައިވާކަމަށް އޮފިޝަލުން ބުނެއެވެ.

ޕާކިސްތާން، ބަންގްލަދޭޝް އަދި އަފްޢާނިސްތާނުގެ މުސްލިމުންނަށް ރަށްވެހިކަން ނުލިބޭ ގޮތަށް ފާސްކުރި މި ބިލާއި ދެކޮޅަށް އަޑުއުފުލާ ފަރާތްތަކުން ބުނަމުންދަނީ މި ބިލަކީ އިންޑިއާގެ ޤާނޫނުގައި އެއްވެސް ދީނަކަށް ބެލުމެއް ނެތި، ހަމަހަމަކަމާއި އެކު އެންމެންނާ މެދު އަމަލުކުރަން ބުނެފައިވާ ބުނުމާއި ދެކޮޅަށް ފާސްކޮށްފައިވާ ބިލެއް ކަމަށެވެ.

މުސްލިމުން އިސްތިސްނާވި ނަމަވެސް މި ބިލު ގާނޫނަކަށް ވެގެން ދިޔުމުން 2015 ވަނަ އަހަރު ކުރިން އެ ތިން ގައުމުން އިންޑިއާ އަށް ހިޖުރަ ކޮށްފައިވާ ބުޑިސްޓުން، ކްރިސްޓިއަނުން، ހިންދޫން، ޖެއިން އަދި ޕާރިސީސްގެ އިތުރުން ސިކުންނަށް އިންޑިއާގެ ރައްޔިތުކަން ލިބޭނެއެވެ.