ސްޕެނިޝް ލަލީގާގައި ބާސެލޯނާ އާއި އަލްވޭސް ބައްދަލުކުރި މެޗު ފަސޭހަކަމާއިއެކު ބާސެލޯނާއިން ކާމިޔާބުކޮށް ތާވަލުގެ އެއްވަނައަށް ޖެހިލައިފިއެވެ.

ބާސާގެ އަމިއްލަ ދަނޑުގައި ކުޅުނު މި މެޗު ބާސާއިން ކާމިޔާބުކުރީ 4-1 ގެ ނަތީޖާއަކުންނެވެ.

މެޗު ފަށައިގެން ބާސާއިން މޮޅު އެޓޭކިންގ ގޭމެއް ކުޅުނުއިރު މެޗުގެ 14 ވަނަ މިނެޓުގައި ބާސާއިން ވަނީ ލަނޑުޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ފްރާންސްގެ އިތުބާރު ފޯވާޑް އެންޓޮއިން ގްރީޒްމަން އެވެ. މި ލަނޑަށްފަހުވެސް ބާސެލޯނާއިން ގެންދިޔައީ އަލްވޭސްގެ ގޯލަށް ނުރައްކާ ކުރަމުންނެވެ. އެގޮތުން މެޗުގެ 38 ވަނަ މިނެޓުގައި ބާސާގެ ކެޕްޓަން ލިއޮނަލް މެސީއަށް ވަނީ ލަނޑުޖަހަން ރަނުގެ ފުރުސަތެއްލިބި ބޭކާރު ވެފައެވެ. މެޗުގެ ފުރަތަމަ ހާފު ނިމުމުގެކުރިން ބާސެލޯނާއިން ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ. މި ލަނޑު މެޗުގެ 45 ވަނަ މިނެޓުގައި އެޓީމަށް ކާމިޔާބު ކޮށްދިނީ ވިޑާލް އެވެ.

މެޗުގެ ދެވަނަ ހާފު ފަށައިގެން އަލްވޭސް އިން އެޓީމުގެ ކުޅުން ރަނގަޅު ކޮށްފައިވާއިރު މެޗުގެ 56 ވަނަ މިނެޓުގައި އަލްވޭސްއިން ވަނީ ލަނޑު ޖަހާ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޕެރޭ ޕޮންސް އެވެ. މި ލަނޑާއިއެކު ބާސެލޯނާއިން އެޓީމްގެ އެޓޭކްތައް އިތުރަށް ވަރުގަދަކުރި އެވެ. އެގޮތުން މެޗުގެ 69 ވަނަ މިނެޓުގައި ލިއޮނަލް މެސީ ވަނީ ލަނޑުޖަހާ ބާސާގެ ލީޑު ފުޅާކޮށްފައެވެ. މިއީ 2019 ވަނަ އަހަރު މެސީޖެހި 50 ވަނަ ލަނޑެވެ. ބާސާގެފަހު ލަނޑު މެޗުގެ 75 ވަނަ މިނެޓުގައި އެޓީމަށް ކާމިޔާބުކޮށްދިނީ ލުއިސް ސުއަރޭޒް އެވެ.

މި ނަތީޖާ އާއިއެކު ބާސެލޯނާއިން ލީގު ތާވަލުގެ އެއް ވަނައިގައި އޮތީ 39 ޕޮއިންޓާއި އެކުގައެވެ. ދެވަނައިގައި ރެއާލް މެޑްރިޑް އޮތީ އެއް މެޗު މަދުންކުޅެ 36 ޕޮއިންޓާއިއެކުގައެވެ. އަދި ތިން ވަނައިގައި އޮތް ސެވިއްޔާއަށް ލިބިފައިވަނީ 34 ޕޮއިންޓެވެ.