މޯލްޑިވްސް ބިޒްނަސް އެވޯޑްސް: އަހަރުގެ ވިޔަފާރި ކުންފުނި އުރީދޫ!

މޯލްޑިވްސް ބިޒްނަސް އެވޯޑްސް ހަފްލާ ހޮނިހިރު ދުވަހުގެ ރޭ މޯލްޑިވްސް ކްރޮސްރޯޑްސްގައި ބާއްވާފައިވާއިރު އަހަރުގެ ވިޔަފާރި ކުންފުނީގެ އެވޯޑު އުރީދޫ އަށް ލިބިއްޖެއެވެ.

މޯލްޑިވްސް ބިޒްނަސް އެވޯޑްސް 2019 ގެ ގާލާގައި "ބިޒްނަސް އޮފް ދި އިޔަރ" އެވޯޑާއި އުރީދޫގެ ފަރާތުން ހަވާލުވެވަޑައިގަތީ އެ ކުންފުނީގެ ހެޑް އޮފް ސޭލްސް ހުސެއިން ނިޔާޒެވެ. އަހަރުގެ ވިޔަފާރި ކުންފުނީގެ އެވޯޑުގެ އިތުރުން އުރީދޫން ވަނީ، މިއަހަރު އަލަށް ތައާރަފްކުރި ޕީޕަލްސް ޗޮއިސް އެވޯޑްސް ކެޓަގަރީން އެންމެ ރަނގަޅު ސީއެސްއާރު ޕްރޮގްރާމުގެ އެވޯޑު ވެސް ހޯދާފައެވެ.

މި ހަފްލާގެ ތެރެއިން އަހަރުގެ ވިޔަފާރިވެރިޔާގެ އެވޯޑު އިސްމާއިލް ހަމީދު (ހައިރައިޒް އިއްސެ) އަށް ވަނީ ލިބިފައެވެ. އަދި އިވެންޓްގެ ޓައިޓްލް ސްޕޮންސަރގެ އެވޯޑް މިއަހަރު ވެސް ލިބިފައިވަނީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށެވެ.

އިވެންޓް އިންތިޒާމު ކުރި ބްލޭޒަން އިންކްގެ ފަރާތުން ބުނީ މިފަހަރުގެ އެވޯޑް ހަފްލާގައި 200 އަށްވުރެ ގިނަ ފަރާތްތަކުން ބައިވެރިވި ކަމަށާއި އެވޯޑުތަކަށް 150 އަށްވުރެ ގިނަ ފަރާތްތަކުން ކުރިމަތިލާފައިވާ ކަމަށެވެ. އަދި އޭގެ ތެރެއިން 50 އަށްވުރެ ގިނަ ފަރާތްތަކަށް އެވޯޑް ލިބިފައިވާ ކަމަށް އެ ކުންފުނިން ބުންޏެވެ.

މިފަހަރުގެ އެވޯޑް ހަފްލާގައި ޖުމްލަ 28 ދާއިރާއަކުން އެކި ފަރާތްތަކަށް އެވޯޑުތައް ދީފައިވެއެވެ.

ރާއްޖެއެމްވީއަށް މަޢުލޫމާތު ދެއްވަމުން ބްލޭޒަން އިންކުގެ ޗީފް އެގްޒެކްޓިވް އޮފިސަރ ހަސަން އަބްދުﷲ ހިލްމީ ވިދާޅުވީ އެވޯޑު ހަފްލާ ވަރަށް ކާމިޔާބު ކަމަށާއި އެވޯޑުގެ ޖަޖިން ދިޔަ ގޮތާމެދު ވަރަށް ހިތްހަމަޖެހޭ ކަމަށް ވަރަށް ގިނަ ފަރާތްތަކުން ބުނި ކަމަށެވެ. އެވޯޑަށް ކުރިމަތިލުމުގެ ޝަރުތުތަކަަށް، އަދި ކެޓަގަރީތަކަށް އަންނަ އަހަރު ބަދަލުތައް އަންނާނެކަން ފާހަގަކުރައްވާ ހަސަން ވިދާޅުވީ އަންނަ އަހަރުގެ އެވޯޑް ހަފްލާ އަހަރުގެ މެދު ތެރޭގައި ބޭއްވުމަށް ނިންމާފައިވާ ކަމަށެވެ.

ހަސަން އިތުރަށް ވިދާޅުވީ ޖަޖުންގެ ޕެލަންގައި މިއަހަރު ތިބި މީހުންގެ ތެރެއިން ގިނަ ފަރާތްތައް އަންނަ އަހަރުގެ ޕެނަލްގައި ވެސް ހިމެނޭނެ ކަމަށެވެ.

މޯލްޑިވްސް ބިޒްނަސް އެވޯޑަސްއަކީ ރާއްޖޭގެ އިޤްތިޞާދުގައި ހިމެނޭ އެކި އިންޑަސްޓްރީތަކުން ފާހަގަކޮށްލެވޭ ވިޔަފާރިތަކަށް ދޭ އެވޯޑެކެވެ. މި އެވޯޑުގެ ބޭނުމަކީ އެ ވިޔަފާރިތަކުގެ ސަބަބުން އިޤްތިޞާދަށް އަންނަ ހެޔޮ ބަދަލުތަކާއި ރާއްޖޭގެ ވިޔަފާރީގެ ދާއިރާ ތަރައްޤީ ކުރުމަށް ކުރަމުންދާ މަސައްކަތް ފާހަގަކޮށް، އެހެން ވިޔަފާރިތައް ތަރައްޤީ ވުމަށް ހިތްވަރުދިނުމެވެ.

މޯލްޑިވްސް ބިޒްނަސް އެވޯޑްސް ބާއްވަން ފެށީ މިދިޔަ އަހަރެވެ. ފުރަތަމަ އެވޯޑްސް ޙަފުލާގެ ތެރެއިން ތަފާތު 23 ދާއިރާއަކުން އެކި ފަރާތްތަކަށް އެވޯޑު ދިނެވެ.