ކުރިޔަށް އޮތް 24 ގަޑިއިރު މޫސުން ގޯސްވާނެތީ މޫސުމަށް ސަމާލުވާން އިލްތިމާސްކޮށްފި

ކުރިޔަށް އޮތް 24 ގަޑިއިރު މޫސުން ގޯސްވާނެތީ މޫސުމަށް ސަމާލުވުމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް) އިން އިލްތިމާސްކޮށްފި އެވެ.

މެޓުން ބުނީ އާދީއްތަ ދުވަހުގެ 10:00 އާ ހަމައަށް ރާއްޖޭގެ އެކި ހިސާބުތަކަށް ވިއްސާރަކުރުމާއެކު ގުގުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށްވެސް މެޓް އޮފީހުން ބުނެއެވެ.

ދެކުނުގެ އަތޮޅުތަކަށް އިރާއި އިރުދެކުނުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް މެޓް އޮފީހުން ލަފާކުރެ އެވެ. އެހެން ހިސާބުތަކަށް އިރުއުތުރާއި އިރުން ގަޑިއަކު 15 މޭލާއި 25 މޭލާ ދެމެދުގެ ބާރު މިނުގައި ވައި ޖެހޭނެ ކަމަށް މެޓް އޮފީހުން ބުނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވުން އެކަށީގެން ވާ ކަމަށްވެސް މެޓް އޮފީހުން ބުނެއެވެ.

ރާއްޖެއަށް މިހާރު ކުރަމުންދާ ވިއްސާރާގައި ރާއްޖޭގެ އެކި ރަށްރަށަށް އެކިވަރުގެ ގެއްލުން ވަމުންދާއިރު ކަނޑުމަތީގެ ޙާދިސާތައްވެސް އަންނަނީ ހިނގަމުންނެވެ. އެގޮތުން އދ. މާމިގިލިން ފުރައިގެން ފ. ފީއައްޔަށް ދަތުރުކުރަމުން ދަނިކޮށް ޑިންގީ އެއްގެ މިސްރާބު އޮޅި ގެއްލިގެން ހޯދާފައިވެއެވެ. ޑިންގީގައި ދަތުރުކުރީ ތިން ކުޑަކުދިންނާއި ބޮޑު މީހަކެވެ.