ރ.މަޑުއްވަރީ: ވެކްސިން ދިނުމަށް އިންކާރުކުރި އާއިލާއަތުން ކުއްޖާ އަތުލައިފި!
20 ޑިސެމްބަރު 2019 | ހުކުރު 15:38އަތުލާފައިވަނީ އަންހެން ކުއްޖެއް
މަޑުއްވަރީގައި ފުލުހުން ހިންގި އޮޕަރޭޝަންގެ ތެރެއިން
ރ. މަޑުއްވަރީގައި ފުލުހުން ހިންގާ އޮޕަރޭޝަންގައި ކުޑަކުދިން ކިޔަވަން ފޮނުވުމާއި ވެކްސިން ދިނުމަށް އިންކާރު ކުރި އާއިލާއަކަށް ނިސްބަތްވާ ކުޑަ އަންހެން ކުއްޖަކު އައިލާއަތުން ނަގައިފިއެވެ.
ހުކުރު ދުވަހުގެ ރޭ ފުލުހުން ނެރުނު ނޫސްބަޔާނެއްގައި ބުނެފައިވަނީ، ކުޑަކުދިން ކިޔަވަން ފޮނުވުމާއި ވެކްސިން ދިނުމަށް އިންކާރު ކުރި އާއިލާއަކަށް ފުލުހުންގެ ހާޒިރުގައި މިނިސްޓްރީ އޮފް ޖެންޑަރ، ފެމިލީ އެންޑް ސޯޝިއަލް ސަރވިސަސްގެ ފަރާތުން ތަކުރާރުކޮށް ނަސޭހަތް ދިނުމުންވެސް އެކަމަށް އިންކާރުކުރި އާއިލާއަކަށް ނިސްބަތްވާ ކުޑަ އަންހެން ކުއްޖަކު 20 ޑިސެމްބަރު 2019 ވަނަ ދުވަހު ފުލުހުންގެ އެހީތެރިކަމާއެކު މައިންބަފައިންގެ އަތުން ކުއްޖާ ނެގުމަށްފަހު ކުއްޖާގެ ބޮޑުދައިތައަށް ކުއްޖާ ހަވާލުކޮށްފައިވާކަމަށެވެ.
އިތުބާރު ހުރި މަސްދަރަކުން ރާއްޖެއެމްވީއަށް މައުލޫމާތު ދެއްވަމުން ބުނެފައިވަނީ، ބޮޑު ދައިތައާއި ހަވާލުކުރެވުނު އަންހެން ކުއްޖާއަކީ ހުކުރު ދުވަހު ފުލުހުން ބަލައި ފާސްކުރި ގެތަކުގެ ތެރެއިން، މަޑުއްވަރީ ދެކުނު ސަރަހައްދުގައި ހުންނަ ގެއެއްގެ ކުއްޖެއްކަމަށެވެ. އެފަރާތުން ވަނީ ބޮޑުދައިތައާއި ހަވާލުކުރެވުނު ކުއްޖާއަކީ ޖެންޑަރ މިނިސްޓްރީގެ ބެލުމުގެ ދަށަށް ގެނެވުނު 13 އަހަރު ކުއްޖާ ނޫންކަން ކަށަވަރުކޮށްދީފައެވެ. ރާއްޖެއެމްވީއިން ކުރި މަސައްކަތުން ފުލުހުންގެ އިތުރުން ޖެންޑަރ މިނިސްޓްރީންވެސް މިކަމާއި ބެހޭ އިތުރު ތަފްސީލެއް ހިއްސާކޮށްފައެއް ނުވެއެވެ.
ބުރާސްފަތި ދުވަހު ފުލުހުން ވަނީ ކުޑަ ކުދިންނަށް ވެކްސިން ދިނުމަށް ދެކޮޅު ހަދަމުން ދިޔަ މީހަކު ފުލުހުންގެ ބެލުމުގެ ދަށަށް ގެނައުމަށްފަހު، ޖެންޑަރ މިނިސްޓްރީގެ ފަރާތުން އެމީހުންނަށް ނަސޭހަތްތެރިވި ކަމަށް ބުނެފައެވެ، .ފުލުހުން ބުނީ އެގޭ ކުޑަކުދިންނަށް ވެކްސިން ދޭން އެކުދިންގެ ބެލެނިވެރިން އެއްބަސްވުމުން ތިން އަހަރު ދަށުގެ ކުޑަ ކުދިންނަށް މިހާރު ވެކްސިން ދީފައިވާ ކަމަށެވެ. ފުލުހުން ބުނީ ވެކްސިން ދީފައިވަނީ ތިން ކުދިންނަށް ކަމަށެވެ. އެއީ ހަތަރު އަހަރުގެ ފިރިހެން ކުއްޖަކާއި، ދެއަހަރުގެ ފިރިހެއް ކުއްޖެއްގެ އިތުރުން އެއް މަހުގެ އަންހެން ކުއްޖަކަށް ކަމަށެވެ.
މިއީ މިހާރު ފުލުހުން ހަރުކަށި ފިކުރު ގަބޫލުކުރާ މީހުން ހޯދުމަށް ފުލުހުންނާއި އެމްއެންޑީއެފް ގުޅިގެން ހިންގާ އޮޕަރޭޝަންގެ ތެރެއިން، ފެންމަތިވީ މައްސަލައެކެވެ. މިއޮޕަރޭޝަން ގައި މިހާރު ވަނީ 3 މީހަކު ހައްޔަރުކޮށް އެމީހުންގެ ބަންދަށް 10 ދުވަސް ޖަހާފައެވެ. މިއޮޕަރޭޝަންގައި ލިބިފައި ހުރި މައުލޫމާތުގެ އަލީގަ ކުޑަ ކުދިންނަށް ވެކްސިން ދިނުމާއި ތައުލީމުން މަހުރޫމް ކުރެވިފައިވާކަން ފާހަގަކުރެވިފައިވާ ކަމަށް ފުލުހުން ވަނީ ހާމަކޮށްފައެވެ. މިއީ އަންހެނުންނާއި ކުޑަކުދިންގެ ރައްކާތެރިކަން ކަށަވަރުކުރުމުގެ ގޮތުން ހިންގާ އޮޕަރޭޝަނެއް ކަމަށްވެސް ފުލުހުން ވަނީ މައުލޫމާތު ދީފައެވެ.
މަޑުއްވަރީގައި ފުލުހުން ހިންގާ "އައްސޭރި އޮޕަރޭޝަންގެ ދަށުން މިހާތަނަށް ވަނީ 13 އަހަރުގެ އަންހެން ކުއްޖަކު ޖެންޑަރ މިނިސްޓްރީގެ ބެލުމުގެ ދަށަށް ގެނެސްފައެވެ.
