ޖަމްއިއްޔާ އުވާލީ ޖަވާބުދާރީވާން ފުރުސަތު ނުދީ: އެމްޑީއެން
20 ޑިސެމްބަރު 2019 | ހުކުރު 12:09ދީނަށް ފުރުއްސާރަ ކޮށްފައިނުވާނެ ކަމަށް ބުނެ ދިފާއުކޮށްފައިވޭ
އެމްޑީއެނުން ނެރެފައިވާ ރިޕޯޓް
މޯލްޑިވިއަން ޑިމްކޮރަސީ ނެޓްވޯކް (އެމްޑީއެން) އުވާލާފައިވަނީ ޖަވާބުދާރީވާން ފުރުސަތުނުދީ ކަމަށް އެ ޖަމްއިއްޔާއިން ބުނެފިއެވެ.
ޖަމްއިއްޔާތަކުގެ ބެލެނިވެރިފަރާތް ކަމަށްވާ ޔޫތް މިނިސްޓްރީން، އެމްޑީއެން ރަސްމީކޮށް އުވާލިކަން އިއުލާންކޮށްފައިވަނީ ބުރާސްފަތި ދުވަހު އެވެ. އެކަން އިއުލާން ކުރަމުން މިނިސްޓްރީން ނެރެނު ބަޔާނެއްގައި ބުނެފައިވަނީ، ޖަވާބުދާރީވުމަށް 45 ދުވަހުގެ މުއްދަތު ޖަމްއިއްޔާއަށް ދިން ކަމަށެވެ. ނަމަވެސް އެމްޑީއެންއިން އެ މުއްދަތުގެ ތެރޭގައި ޖަވާބުދާރީވެވިފައިނުވާ ކަމަށް މި މައްސަލައާއި ގުޅިގެން ޔޫތް މިނިސްޓްރީން ނެރުނު ބަޔާނުގައި ބުނެފައިވެއެވެ.
ޔޫތް މިނިސްޓްރީގެ ބަޔާން ދޮގުކުރަމުން އެމްޑީއެންއިން ބުނީ، ނިމިގެން ދިޔަ ނޮވެމްބަރު މަހުގެ ފަސްވަނަ ދުވަހު ޔޫތް މިނިސްޓްރީން އެ ޖަމްއިއްޔާއަށް ފޮނުވާފައިވާ ސިޓީއެއްގައި އެމްޑީއެން ގާނޫނާ ހިލާފުވެފައިވާ ކަަމަށް ބުނެފައިވާ ކަމަށެވެ.
އެކަމަކު ގާނޫނާ ހިލާފަށް ކޮށްފައިވަނީ ކޮންކަމެއްކަން އެ ސީޓީގައި ބަޔާން ކޮށްފައިނުވާ ކަމަށެވެ. އެމްޑީއެންއާ ބެހޭ ގޮތުން ފުލުހުން ތަހުގީގެއް ހިންގި ކަމަށް އެ ސިޓީގައި ބުނެފައިވާކަން ފާހަގަކޮށް ބަޔާނުގައި ބުނީ، އެ ތަހްގީގުން ފެނުން އެއްޗެއް ބަޔާންކޮށްފައިނުވާ ކަމަށާއި ރިޕޯޓާއި ގުޅިގެން ކުރެވޭ ތުހުމަތާއި ގުޅިގެން ޔޫތް މިނިސްޓްރީން އެ ޖަމްއިއްޔާއާ ސުވާލުކޮށްފައިނުވާ ކަަމަށެވެ.
އެމްޑީއެންގެ ބަޔާނުގައިވާ ގޮތުން އެ ޖަމްއިއްޔާއިން ވަނީ، ނޮވެމްބަރު މަހުގެ ފަސްވަނަ ދުވަހު ޔޫތް މިނިސްޓްރީން ފޮނުވި ސިޓީއަށް އަށް ޖެހިގަން އައި ނޮވެމްބަރު މަހުގެ ހަވަނަ ދުވަހު ޖަވާބު ފޮނުވާފައެެވެ.
އެމްޑީއެނުން ބުނީ، ޖަމްއިއްޔާ އުވާލާފައިވަނީ ޖަވާބު ދިނުމަށް ފުރުސަތެއް ނުދީ ކަމަށެވެ. ދީނަށް ފުރުއްސާރަކޮށް ނެެރުނު ރިޕޯޓް ދިފާއުކޮށް އެމްޑީއެނުން ބުނެފައިވަނީ، އެ ރިޕޯޓުގައި އިސްލާމްދީނާ ހިލާފު އެއްވެސް ވާހަކައެއް ނޯންނާނެ ކަމަށެވެ.
އެމްޑީއެންއިން މިހެން ބުނިނަމަވެސް، އިސްލާމިކް މިނިސްޓްރީ އާއި ފުލުހުންވެސް ވަނީ މި ރިޕޯޓްގައި ދީނަށް ފުރައްސާރަކުރިކަމަށް ބުނެފައެވެ. އަދި އެ މައްސަލައާއި ގުޅިގެން ފުލުހުންގެ ތަހުގީގަށް މި ރިޕޯޓް ހެދުމުގައި ބައިވެރިވި ޝަހިންދާ އިސްމާއިލް އަދި ޑރ. އަޒްރާއަށް ފުރުސަތު ދެވުނުނަމަވެސް، އެކި ސަބަބުތަކާއިހުރެ ހާޒިރުވެފައެއް ނުވެއެވެ.
