އޮޅުމެއްގެ ތެރެއިން، އެމެރިކާގެ ޓްރޭޑް ޕާރޓްނަރުންގެ ލިސްޓުގަ "ވަކަންޑާ" ހިމެނިއްޖެ

އެމެރިކާގެ އެގްރިކަލްޗަރަލް ޑިޕާރޓްމަންޓުން "އޮޅިގެން" ފޯކްލޯރ (ޚިޔާލީ) ޤައުމެއް ކަމަށްވާ ވަކަންޑާއަކީ އެމެރިކާގެ ޓްރޭޑް ޕާރޓްނަރެއްގެ ގޮތުގައި ހިމެނިއްޖެއެވެ.

ހޮލީވުޑްގެ މަޝްހޫރު ފިލްމެއް ކަމަށްވާ "ބްލެކް ޕެންތަރ" އިން ފެންނަ އެފްރިކާ ބައްރުގެ ޚިޔާލީ ޤައުމެއް ކަމަށްވާ ވަކަންޑާއަކީ އެމެރިކާގެ ޓްރޭޑް ޕާރޓްނަރުންގެ ލިސްޓުގައި ހިމެނިފައިވާ ޤައުމެއްކަމަށް ވުމުން ގިނަ ބަޔަކަށް ވަނީ ހައިރާންކަން ލިބިފައެވެ. އަދި އެވާހަކަތައް މީޑިއާގެ ސަމާލުކަމަށް އައުމުން އެ ޤައުމުގެ ކަމާބެހޭ ފަރާތްތަކުން މިވަނީ އެކަން ވީ ގޮތް އޮޅުންފިލުވައިދީ މާފަށް އެދިފައެވެ.

އެކަމާ ގުޅޭގޮތުން މީޑިއާތަކަށް މަޢުލޫމާތު ދެއްވަމުން އެމެރިކާގެ އެގްރިކަލްޗަރަލް ޑިޕާރޓްމަންޓުގެ ތަރުޖަމާނު ވިދާޅުވީ، ވެބްސައިޓުގައި ވަކާންޑާ ހިމެނީ އަޖުމަ ބެލުމުގެ މަރުޙަލާގައި ބޭނުންކޮށްލުމަށް ކަމަށާއި، ނަމަވެސް ފަހުން އޮޅިގެން އެ ލިސްޓުން ވަކާންޑާ އުނި ނުކުރެވި އިނީ ކަމަށެވެ.

ވެބްސައިޓުގައި އަޖުމަ ބެލުމުގެ މަރުޙަލާގައި ހިމަނާފައިވާ މަޢުލޫމާތުތައް ބުނާގޮތުން އެމެރިކާއާއި، ވަކާންޑާއާ ދެމެދު ވިޔަފާރީގެ މުޢާމަލާތްތައް ކޮށްފައިވާއިރު، އަސްދޫންޏާއި، ގެރިފަދަ ޖަނަވާރުތައް ވިޔަފާރީގައި ބޭނުން ކޮށްފައިވެއެވެ. ނަަމަވެސް އެއީ ވިޔަފާރިތައް ބެލެހެއްޓުމަށްޓަކައި ބޭނުންކުރާ މި ވެބްސައިޓުގެ އަޖުމަ ބެލުމުގެ މަރުޙަލާގައި ހަމައެކަނި މުވައްޒަފުންގެ ބޭނުމަށް ހިމެނި މަޢުލޫމާތުތަކެއްކަން މިހާރު މިވަނީ ހާމަވެފައެވެ.

އެގޮތުން އެކަން ސަމާލުކަމަށް އައުމުން ވަގުތުން އެ ލިސްޓުން ވަކާންޑާ ވަނީ އުނިކޮށްފައެވެ. ނަމަވެސް އެކަން ގިނަ ބަޔަކަށް މަޖާ ކަމަކަށްވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަކާންޑާއާއި ދެމެދު ވިޔަފާރީގެ ގުޅުންތައް ވަރުގަދަ ކުރަމުންދާކަމަށް ބުނެ ގިނަ ބަޔަކު ދަނީ މީސްމީޑިއާގައި އެކަމަށް މައްލަވަ ކުރަމުންނެވެ.

ބްލެކް ޕެންތަރ އަކީ ގިނަ ބައެއްގެ މަޤުބޫލުހޯދާފައިވާ އަދި ގިނަ އެވޯރޑުތަކެއް ޙާޞިލުކޮށްފައިވާ ފިލްމެކެވެ. އެގޮތުން މި އަހަރު ބޭއްވި 91 ވަނަ އޮސްކާ އެވޯޑުގަވެސް އެ ފިލްމަށް ތިން އެވޯޑެއް ލިބުނެވެ،

ވަކާންޑާއަކީ މި ފިލްމުގައި ބަޠަލުގެ ރޯލު ކުޅޭ ބްލެކް ޕެންތަރ ނިޞްބަތްވާ ޤައުމެވެ.