އިންޑިއާ އަންހެނެއްގެ ބޮލުތެރެއިން ދިރޭ ކުރަތްޕެއް ޑޮކްޓަރުން ނަގައިފި

ނިދާފާ އޮއްވާ ތޮރުފިގެން ނޭފަތައް ކުރަފި ވަންނަ ވާހަކައާއި އަދި އެސޮރު ފޮރުވިގެން އޮވެ، ކުރިމަތި ކުރުވާ އުނދަގޫތަކަކީ މީހާ މޮޔަކޮށްލާވަރުގެ ކަމެއްގެ ގޮތުގައި ޚިޔާލީ ވާހަކަތަކުގައި ލިޔެފައި ހުރެއެވެ. ނަމަވެސް މިހާރު މިއީ މުޅިން ޚިޔާލީ ކަމެކޭ ބުނެވޭކަށް ނެތެވެ.

މިކަން ހަގީގަތެއްގެ ގޮތުގައި ސިފަވެގެން ދިޔައީ އިންޑިއާގެ އަންހެނެއްގެ ބޮލުތެރެއިން ޑޮކްޓަރުން ދިރޭ ކުރަތްޕެއް ނެގުމުންނެވެ.

އުމުރުން 42 އަހަރުގެ މި އަންހެން މީހާ ޑޮކްޓަރަށް ދިޔައީ ލޮލާ ދިމާ އަޑިން މޫނުގައި އުނދަގޫ ހިރުވުމެއް ނުފިލާ ހުންނާތީއެވެ.

އަވަސް އަވަހަށް ކްލިނިކަށް ގޮސް ދެއްކުމުން ނޭފަތް ދޮވުމަށްފަހު ގެއަށް ފޮނުވާލީއެވެ.

އެކަމަކުވެސް ހިރުވުމަކަށް ލުޔެއް ނުލިބުނެވެ.

ހިރުވުމުގެ އަސްލު ސަބަބު ހާމަވި ހިސާބަކީ ކަރާ ކަންފަތާ ނޭފަތުގެ ޚާއްސަ ޑޮކްޓަރަކަށް ދެއްކުމުން އެންޑޯސްކޮޕީ ހެދި ހިސާބުންނެވެ.

ޗެންނާއީގެ ސްޓޭންލީ މެޑިކަލް ކޮލެޖް ހޮސްޕިޓަލުގެ ޑޮކްޓަރ ޝަންކަރު އޭ.އެފް.ޕީ އަށް މިކަން ހިނގައިދިޔަ ގޮތް ކިޔައިދެމުން ބުނީ އޭނާއަށް ފެނުނީ ހަރަކާތް ކުރަމުން ދިޔަ ކުދިކުދި ފައިތަކެއް ކަމަށެވެ.

އިތުރަށް ބެލި ބެލުމުން އެ ފެނުނު އެއްޗަކީ ކުރަތްޕެއް ކަމަށް ޑރ. ގަބޫލު ކުރެވުނެވެ.

ކުރަފި އަންހެން މީހާގެ ބޮލުގެ ނާށިގަނޑާ ހަމައަށް ވަދެފައި އޮތް ކުރަފި 12 ގަޑީއިރު ވީ އިރުވެސް އޮތީ މަރުނުވެ ކަމަށް ޑޮކްޓަރު ބުންޏެވެ.

ވެކިއުމް ކްލީނަރެއް މަސައްކަތް ކުރާ ގޮތައް މަސައްކަތް ކުރާ އާލާތެއް ބޭނުން ކޮށްގެން ކުރަފި ބޭރަށް ދަމައިގަތް އިރުވެސް އޮތީ މަރުނުވެ ކަމަށާއި، ބަރާބަރަށް ހަރަކާތް ކުރަމުން ދިޔަ ކަމަށްވެސް ޑޮކްޓަރު ކިޔައިދިނެވެ.

ތިރީހަށް ވުރެ ގިނަ އަހަރު ވަންދެން ޑޮކްޓަރެއްގެ ގޮތުގައި މަސައްކަތް ކުރި އިރުވެސް މިފަދަ ކަމެއް ދިމާނުވާ ކަމަށް ޑޮކްޓަރު ބުންޏެވެ.

ބޮލުގެ ނާށިގަނޑާ ހަމައަށް ތޮރުފިގެން ވަދެ އޮތް ކުރެފި ދަމާ ނެރެވުނީ 45 މިނެޓްގެ ޕްރޮސީޖަރަކުންނެވެ.

ކުރަފީގެ ސަބަބުން އަންހެން މީހާއަށް ސިއްހީ ގެއްލުމެއް ނުލިބުނު ނަމަވެސް މިހާދިސާއާ ގުޅިގެން އަންހެން މީހާ ހުރީ ވަރަށް ލަދުގަނެފައި ކަމަށްވެސް ޑޮކްޓަރު ކިޔައިދިނެވެ.