ހަރުކަށި ފިކުރު ބޮއްސުންލައިގެން ދިޔުމުގެ ޒިންމާ ކުރީގެ ސަރުކާރުތަކުން ނަގަންޖެހޭ!

"ރާއްޖޭގެ އެކި ކަންކޮޅުތަކުގައި އިސްލާމީ ހަރުކަށި ފިކުރަށް ތަބާވެ، ޖެހިގެން ހުރި މީހާގެ ފުރާނަ ނަގާލަން ފަސްނުޖެހޭ ވަރަށް އެފިކުރުގެ ތެރެއަށް ވަދެފައިވާ 1400 އާ ގާތްކުރާ އަދަދެއްގެ ދިވެހިން އުޅޭ" ޕޮލިސް ކޮމިޝަނަރ މުހައްމަދު ހަމީދު ވިދާޅުވުމަކީ ކުޑަކަމެއް ނޫނެވެ. ގާތްގަނޑަކަށް އާބާދީގެ ކޮންްމެ 300 މީހަކަށް، އެއްވެސް ހައްގަކާ ނުލާ މީހަކު މަރާލަން ފަސްނުޖެހޭ ބަޔަކު ތިބުމަކީ ބިރުގަނެ، ފަސްޖެހޭ ވަރުގެ ކަމެކެވެ.

ތުންތުން މަތިން އަބަދުވެސް، ރާއްޖޭގައި ހަރުކަށި ފިކުރުގެ މީހުން އުޅޭ ވާހަކަތަކާއި، ބޭރުގެ ޓެރަރިސްޓް ޖަމާއަތްތަކާއި ގުޅިގެން ހަނގުރާމަކުރާ ވާހަކަ އަޑުއިވޭތާ މިހާރު ވިއްސަކަށް އަހަރުވެދާނެއެވެ. މި ގަރުނު ފެށުނީއްސުރެން އެ ޒާތުގެ ވާހަކަތައް އަޑު އިވުނަސް، ގިނަ ދިވެހިންގެ ޒަމީރު އެކަން ގަބޫލުކުރާކަށް ބޭނުމެއް ނުވިއެވެ.

ނުވެސް ވާނެތާއެވެ. މަތިވެރި އިސްލާމް ދީނުގެ ހިދާޔަތް މީގެ 600 އަހަރު ކުރިން ލިބުނީއްސުރެން ދިވެހިންނަކީ، އެ ދީނުގެ އަގީދާގެ މަތީގައި ސާބިތުވެތިބެގެން، ސުލްހަވެރި ގައުމެއްގައި ދިރިއުޅޭ ރައްޔިތަކު އުޅޭ ގައުމަކަށް ވީތީއެވެ. މި ގައުމުގެ ތާރީހަށް ބަލާލާކަމުގައިވަނީނަމަ، އެއްވެސް އިރެއްގައި އިސްލާމް ދީނާ ގުޅޭ ދީނީ ހަމަނުޖެހުމެއް މި ގައުމުގައި ހިނގާފައި ނެތެވެ. ކަމެއް ހިނގާފައިވަނީނަމަ، އެކަން ކޮށްފައި އޮތީ ދީނުގެ ދިފާއުގައެވެ.

ކޮންމެއަކަސް، އަދުގެ ސަރުކާރުން ހަރުކަށި ފިކުރާ ދެކޮޅަށް ފަށައިގެން މިއުޅޭ މަސައްކަތުގެ ތެރެއިން އިވޭ ވާހަކަތަކާއި ލިބޭ މައުލޫމާތުތަކުން ބިރުވެސް ގަނެއެވެ. ކަމެއް ދިމާވާނީ ބުނެފައެއް ނޫނޭ މުސްކުޅިން ބުނެއުޅޭ ބީދާއިން، ދެން މިކަހަލަ ކަމެއްގައި ގަތުލުކުރާނީ ކާކުބާއޭ ހިތަށް އަރައެވެ. ފުން ހިތާމަޔާއި ކުރިމަތިލާން ޖެހޭނީ ކޮން އާއިލާއަކުންބާއޭ ހިތަށް އަރައެވެ.

މިހެން މިކަން ހުރިއިރު، ޖަވާބު ބޭނުންވާ އެތައް ސުވާލެއް އެބަހުއްޓެވެ. ކަންކަން މިހާ ހިސާބަށް ދިޔައިރު، ދިވެހިންގެ ރައްކާތެރިކަން ކަށަވަރުކޮށްދޭން ތިބި މުއައްސަސާތައް ކޮބައިތޯއެވެ؟ އެވެރިންނާއި ހަވާލުކުރެވުނު ޒިންމާ އަދާނުކުރެވުނުއިރު، ހަމަ އެއިން ބަޔަކަށް ހަމަ އެއްކަމެއްވެސް ނޭނގެނީތޯއެވެ؟ ނޫނީ ހަމަ އެހާ ނުކުޅެދިފައި، މަސްއޫލިއްޔަތު ހަވާލުކުރެވުނު ފަރާތްތައް ހަމަ އެހާ ގަމާރީތޯއެވެ؟ ސެލްތަކާއި އަމީރުންނާއި މީހުންގެ ވާހަކަ މިހާރު ތިލަވާއިރު، އެއިރު ހަމަ އެއިން އެކައްޗެއްވެސް ނޫނީ ބަޔަކުވެސް ހަމަ ނެތީތޯއެވެ؟

މިކަމުގެ ޒިންމާ ނަގަންޖެހޭނެ ބަޔަކާއި މެދު ވިސްނާލިއިރު، މި ގައުމު ހިންގުމާއި ހަވާލުވެގެން ތިބި ވެރިން ނޫން ބަޔަކާއި ދިމާލަށް ތުހުމަތުގެ އިނގިލި ދިއްކުރެވޭކަށެއް ނެތެވެ. މިކަން ހިނގަން ފެށި ފަހުން ގައުމުގެ ވެރިކަން ހަތަރު ރައީސަކު ކުރައްވާފައިވާއިރު، އެއްވެސް ބަޔަކަށް މިކަން ހުއްޓުވިފައި ނުވާތީ، މިކަމުގެ ޒިންމާ އެ ފަރާތްތަކުން އުފުލަން ޖެހެއެވެ.

އެކިއެކި ސަބަބުތަކާއިހުރެ، އަތުން ދޫވެގެން މި ހިސާބަށް މިކަން އައުމުން، ތިމަންމެން ކުރާނެ ކަމެއް ނެތޭ ބުނެ ފަރުޖައްސާލެވޭކަށް ނެތެވެ. ދައުލަތެއް ބޭނުމަކީ، ދިވެހިންގެ ރައްކާތެރިކަން ކަށަވަރުކޮށް ދިނުމެވެ. ދިރިއުޅޭނެ އަމާން ވެއްޓެއް ގާއިމުކޮށް ދިނުމެވެ. އެކަން ނުކުރެވި މި ހިސާބަށް އައުމުން އެއޮތީ ފެއިލްވެފައެވެ. ޒިންމާ ނަގަން ޖެހޭނެއެވެ.

މިކަން ބޮއްސުން ލައިގެން ދިޔައީ، ހަމަ މި ގައުމުގައި ވެރިކަންކުރި ސަރުކާރުތަކުގެ ނުކުޅެދުމުންނެވެ. އެއްބަޔަކު އެއީ ނުވާކަމެކޭ ބުނެ ހަށި ފޮޅާލިއިރު، އަނެއް ބަޔަކު އެކަމަށް ވާގިވެރިވީއެވެ. ދިވެހިން މިތިބީ މިއަދު ބިރުވެރިކަމެއްގެ ތެރޭގައެވެ. މިއީ ހަވާލުކުރެވުނު ޒިންމާ ރަނގަޅަށް އަދާކުރެވުނުނަމަ، އަދި މިކަމުގެ "ޅަފަތުގައި" ބުޑުން ލުހެލެވުނުނަމަ، މި ގައުމަށް ކުރިމަތިވާނެ ހާލަތެއް ނޫންކަން ޔަގީނެވެ. ހިތަށް ކުޑަނަމަވެސް ތަސައްލީއެއް ލިބެނީ މިހާރުނަމަވެސް، ބަޔަކު މިކަމާ ދެކޮޅަށް މަސައްކަތްތަކެއް ކުރާތީއެވެ.