ކުޅިވަރުގައި ހުނަރުވެރި ފަރާތްތައް އެބަތިބި، ބޭނުންވަނީ ސަރުކާރުގެ އެއްބާރުލުން: މިނިސްޓަރ މާރިޔާ
މިނިސްޓަރ ވަނީ ޓީމަށް މަރުޙަބާ ދަންނަވާފައި
އަންހެން ބާސްކެޓް ބޯޅަ ޓީމަށް މިނިސްޓަރ މާރިޔާ މަރުޙަބާ ދަންނަވަނީ
ރާއްޖޭގެ ކުޅިވަރުގެ މައިދާނުގައި ކުޅަދާނަ ފަރާތްތައް އެބަތިބި ކަމަށާއި، އެ ފަރާތްތަކަށް ބޭނުންވަނީ ސަރުކާރުގެ ފުރިހަމަ އެއްބާރުލެއްވުން ކަމަށް ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.
ނޭޕާލުގައި ކުރިއަށްދިޔަ ސައުތު އޭޝިއަން ގޭމްސްގައި ރާއްޖޭގެ އަންހެން ބާސްކެޓް ބޯޅަ ޓީމުން ހޯދި ކާމިޔާބީއަށް ފަހު އެނބުރި ރާއްޖެއައުމުން މިނިސްޓަރ ވަނީ ވެލާނާ އިންޓަރނޭޝަނަލް އެއާޕޯރޓަށް ވަޑައިގެން ޓީމަށް މަރުޙަބާ ދަންނަވާފައެވެ.
ކުޅުންތެރިންނަށް މަރުޙަބާ ދެންނެވުމަށްފަހު "ރާއްޖެއެމްވީ" އަށް ދެއްވި ޚާއްސަ އިންޓަރވިއުއެއްގައި މިނިސްޓަރ ވިދާޅުވީ، ކުޅިވަރުގެ މައިދާނުގައި އަންހެން ކުދިން ހޯދަމުންދާ ކާމިޔާބީތަކާމެދު ފަޚުރުވެރިވާ ކަަމަށާއި، ރާއްޖޭގައިވެސް ކުޅިވަރުގެ ދާއިރާގައި ފާހަގަކޮށްލެވޭ ހުނަރުވެރި އަދި ކުޅަދާނަ ފަރާތްތައް އެބަ ތިބި ކަމަށެވެ. އަދި އެ ފަރާތްތަކަށް ސަރުކާރުން އެކަށީގެންވާ އެއްބާރުލުން ދިނުން މުހިއްމުކަމަށް މިނިސްޓަރ ވިދާޅުވިއެވެ.
އޭގެ އިތުރުން، ސްޕޯރޓްސް މިނިސްޓްރީންނާއި، ސަރުކާރުން ކުޅިވަރަށް ދޭ އަހައްމިއްޔަތުކަން މިނިސްޓަރ ވަނީ ފާހަގަ ކުރައްވާފައެވެ.
މިނިސްޓަރގެ ވާހަކަފުޅުގައި ވަނީ ކުޅިވަރުގެ ދާއިރާއިން މިންތީގެ ހަމަހަމަކަން ގެނައުމަށް ސަރުކާރުން ގެންގުޅުއްވާ ޕޮލިސީ ފާހަގަކުރައްވައި އެކަމަށް ތައުރީފު ކުރައްވާފައެވެ.
ސައުތު އޭޝިއަން ގޭމްސްގެ އަންހެން ބާސްކެޓް ބޯޅައިގެ ތިންވަނަ ހޮވާ މެޗުން ބޫޓާން ބަލިކޮށް ރާއްޖޭގެ އަންހެން ބާސްކެޓް ޓީމުން ފުރަތަމަ ބައިނަލްއަގުވާމީ މެޑެއްޔެއް ހޯދާފައިވާއިރު، ނޭޕާލްގެ ނެޝަނަލް ބާސްކެޓް ބޯޅަ ހޯލުގައި ކުޅުނު މި މެޗު ރާއްޖެ ކާމިޔާބުކުރީ 83 ޕޮއިންޓް 46 ޕޮއިންޓުންނެވެ. އެގޮތުން މިއީ އަންހެން ބާސްކެޓް ބޯޅައިގެ ތާރީޚުގައި ރާއްޖެއިން ހޯދި ފުރަތަމަ މެޑައްޔެވެ.
