އާޒިމް، ޖަމީލަށް: މަޖިލީހުގެ ކަންކަމާނުބެހި ގޭގައި ހުރެބަލަ!
11 ޑިސެމްބަރު 2019 | ބުދަ 09:04ޖަމީލު ވަނީ ރައްޔިތުންގެ މަޖިލީހުގެ އިންތިހާބުގައި ވާދަކުރައްވާފައި، އަދި އެ އިންތިހާބުން ވަނީ ފެއިލްވެވަޑައިގަންނަވާފަ
ރައްޔިތުންގެ މަޖިލީހުގެ މެޖޯރިޓީ ލީޑަރު އަލީ އާޒިމް އާއި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު
ރައްޔިތުންގެ މަޖިލީހުގެ ކަންކަމާ ނުބެހި ހުންނެވުމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދަށް ގޮވާލައްވައިފި އެވެ.
އެމްޑީޕީގެ ޕާލަމެންޓްރީ ގްރޫޕުގެ ލީޑަރު، އަދި މަޖިލީހުގެ މެޖޯރިޓީ ލީޑަރު އަލީ އާޒިމް، ޖަމީލަށް އެގޮތަށް ގޮވާލެއްވީ، ޖަމީލު ކުރެއްވި ޓްވީޓަކާ ގުޅިގެންނެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދުއާއި މަޖިލީހުގެ މެންބަރުންތަކެއް އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ފޮޓޮއަކާއެކު ޖަމީލު ކުރެއްވި ޓްވީޓެއްގައި ވިދާޅުވެފައިވަނީ، ރައްޔިތުންގެ މަޖިލީހުގެ އިދާރީ ޕްރޮޓޮކޯލް އޮންނަ ގޮތް ކިޔާ ނުދެނީބާ؟ އޭ ވިދާޅުވެ ސުވާލެއް އުފައްދަވާފަ އެވެ. އަދި ބަސް އަހާތޯ ބަލަން މަޖިލީހުގައި އަޞްލުވެސް ޕްރިންސިޕަލެއް ހުންނަންޖެހޭ ކަމަށް ޖަމީލު ވިދާޅުވެފައި ވެއެވެ.
ޖަމީލުގެ އެޓްވިޓަރ ގުޅިގެން އާޒިމް ކުރެއްވި ޓްވީޓްގައި ވިދާޅުވެފައިވަނީ، ތިޔައީ ރައްޔިތުންގެ ތާޢީދެއް ލިބުނު ބޭފުޅެއް ނޫންކަމަށާއި، މަޖިލީހަށް ކުރިމަތިލެއްވީމައި ލިބިލެއްވީ 40 ވޯޓު ކަމަށެވެ. އަދި މަޖިލީހުގެ ކަންކަމާ ނުބެހި ގޭގައި ހުންނެވުމަށްވެސް އާޒިމް ގޮވާލައްވާފައި ވެއެވެ.
އާޒިމްގެ އެ ޓްވީޓާ ގުޅިގެން ޖަމީލު ކުރެއްވި އެހެން ޓްވީޓެއްގައި ވިދާޅުވީ، އާޒިމްގެ ހަނދާން މާބަލި ކަމަށެވެ. މި ވެރިކަން އައިގޮތާއި ހިޔަނި ކެބިނެޓެއް ހަދާ، އެމްޔޫއޯގެ ލީޑަރުގެ ފަހަތަށް އެރީ ކީއްވެބާ؟ އޭ ވިދާޅުވެ ސުވާލު އުފައްދަވާފަ އެވެ. އެންމެ ވޯޓެއް ނުލިބޭ މީހާއަށްވެސް މަޖިލީހުގެ ކަންތަކާ ބެހެވޭނެ ކަމަށާއި، ތިހާ ދުވަސްވީއިރު، އެވަރު ނޭނގޭ ކަމަށް ވިދާޅުވެ ޖަމީލު ވަނީ ސުވާލު އުފައްދަވާފަ އެވެ. އަދި މުސާރަ ތިޔަ ނަންގަވަނީ ރައްޔިތު މީހާގެ ޖީބުން ކަމަށްވެސް ޖަމީލު ވިދާޅުވި އެވެ.
ޖަމީލުގެ އެޓްވީޓާ ގުޅިގެން އާޒިމް ކުރެއްވި ޓްވީޓްގައި ވިދާޅުވީ، ހިޔަނި ކެބިނެޓް ހަދާ، ލީޑަރެއްގެ ފަހަތަށް އެރީ އޭނާގެ އަތުގައި ހުރިކަން ދެކިގެން ކަމަށާއި އަސްލު މި އެނގުނީ ގޮނޑިއަށް ކުރިމަތި ލެއްވީމާ ދެއްތޯއޭ ވިދާޅުވެ އާޒިމްވެސް ވަނީ ސުވާލު އުފައްދަވާފަ އެވެ.
ޖަމީލާއެކު އޭރުގެ އިދިކޮޅު ފަރާތްތަކުން މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ)ގެ ނަމުގައި ހަރަކާތްތައް ފެށީ ނައިބު ރައީސް ކަމުގެ މަޤާމުން ޖަމީލު ވަކި ކުރުމާއި ގުޅިގެން ނެވެ. އަދި އެމްޔޫއޯގެ ލީޑަރުކަމަށް ޖަމީލު ހަމަޖައްސި ނަމަވެސް މާގިނަ ދުވަހު އިދިކޮޅު ފަރާތްތަކާއެކު އެކަށީގެންވާ ގޮތެއްގައި މަސައްކަތްތަކެއް ކުރެވިފައެއް ނުވެއެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ ވިލިމާލެ ދާއިރާގެ ގޮނޑިއަށް ޖަމީލު ވާދަ ކުރެއްވި ނަމަވެސް، ވަނީ ބޮޑު ނާކާމިޔާބަކާ ކުރިމަތިވެ، ފެއިލް ވެވަޑައިގަންނަވާފަ އެވެ. ވިލިމާލެ ދާއިރާގެ ގޮނޑި ކާމިޔާބު ކުރައްވާފައިވަނީ ޖަމީލާ ވާދަކޮށް، މިނިވަން ކެންޑިޑޭޓެއްގެ ގޮތުގައި ވާދަ ކުރައްވި އަހުމަދު އުޝާމެވެ.
އިންތިޚާބުން ފެއިލްވެވަޑައިގެންނެވުމާއެކު، ޖަމީލު މަސައްކަތް ކުރައްވަމުން ގެންދަވަނީ ކުރީގެ ރައީސް އަބްދުﷲ ޔާމީނުގެ އަރިހުގައި ޤާނޫނީ ވަކީލެއްގެ ގޮތުގައި މަސައްކަތް ކުރައްވަމުން ނެވެ.
