ކ. މާލެ
|
9 ޑިސެންބަރ 2019 | ހޯމަ 19:04
އެންޓިކޮރަޕްޝަން ކޮމިޝަންގެ ބައެއް މެމްބަރުން، ރައީސް ސޯލިހާއެކު
އެންޓިކޮރަޕްޝަން ކޮމިޝަންގެ ބައެއް މެމްބަރުން، ރައީސް ސޯލިހާއެކު
ރައީސް އޮފީސް
އެންޓި ކޮރަޕްޝަނުގެ ދުވަސް
ދަޢުލަތަށް ގެއްލިގެންދާ މުދަލާއި ފައިސާ އެއްވެސް ޝަރުތެއްނެތި ދައުލަތަށް ލިބެންޖެހޭ: އޭސީސީ
 
ކޮރަޕްޝަން ނައްތާލުމަށް ކުރާ މަސައްކަތަކީ ކޮންމެ ދުވަހަކުވެސް ކުރެވޭ މަސައްކަތެއް
 
ފަސާދައިގެ ޢަމަލުތަކަކީ މުޖުތަމަޢު ނުރައްކަލުގެ ތެރެއަށް ހުށަހެޅިގެންދާ ކަމެއް
 
ސީސީގެ ތަސައްވުރަކީ ދިވެހި މުޖުތަމަޢުއަކީ ކޮރަޕްޝަނުގެ ޢަމަލުތަކުން ސަލާމަތްވެފައިވާ ނަޒާހަތްތެރި މުޖުތަމަޢަކަށް ހެދުން

ކޮރަޕްޝަން ޢަމަލުތައް ހިންގާ ފަރާތްތަކާމެދު އިންސާފުވެރި ޝަރީޢަތެއްކޮށް, އަދަބު ދިނުމުގެ އިތުރުން ދަޢުލަތަށް ގެއްލިގެންދާ މުދަލާއި ފައިސާ އެއްވެސް ޝަރުތެއްނެތި ދައުލަތަށް އަނބުރާ ލިބެންޖެހޭކަމަށް އެންޓި ކޮރަޕްޝަން ކޮމިޝަނުގެ ރައީސާ މަރިޔަމް ޝިއުނާ ވިދާޅުވެއްޖެ އެވެ.

ފަސާދައާ ދެކޮޅަށް މަސައްކަތްކުރުމުގެ ބައިނަލްއަޤުވާމީ ދުވަހުގެ މުނާސަބަތުގައި ދިވެހި ރައްޔިތުންނަށާއި، ފަސާދައާ ދެކޮޅަށް މަސައްކަތްކުރާ އެންމެހާ ފަރާތްތަކަށް ދުވަހުގެ ތަހުނިޔާ ދަންނަވައި ދުވަހުގެ މުނާސަބާގައި އޭސީސީގެ ރައީސް މަރިޔަމް ޝިއުނާ ދެއްވި ހިތާބުގައި ވިދާޅުވީ ފަސާދައާ ދެކޮޅަށް މަސައްކަތް ކުރުމުގައި ބައިނަލްއަޤުވާމީ ފެންވަރުގައި ވަކި ދުވަހެއް ފާހަގަކުރަމުން ދިޔަނަމަވެސް، ކޮރަޕްޝަން ނައްތާލުމަށް ކުރާ މަސައްކަތަކީ ކޮންމެ ދުވަހަކުވެސް ކުރެވޭ މަސައްކަތެއްކަމަށެވެ. ފަސާދައިގެ ޢަމަލުތަކަކީ މުޖުތަމަޢު ނުރައްކަލުގެ ތެރެއަށް ހުށަހެޅިގެންދާ ކަމެއްކަން ފާހަގަކުރައްވައި ޝިއުނާ ވިދާޅުވީ މިފަދަ ޢަމަލުތަކުގެ ސަބަބުން، ވަކި ދާއިރާއެއް ނުވަތަ ވަކި ފަރާތެއް އިސްތިސްނާވުމެއްނެތި އެކަމުގެ ނޭދެވޭ އަސަރު ކުރާކަމީ ދެބަސްވެވެން ނެތް ޙަޤީޤަތެއްކަމަށެވެ.

ޝިއުނާ ވިދާޅުވީ ކޮރަޕްޝަނާ ދެކޮޅަށް ކުރެވޭ މަސައްކަތަކީ ގިނަ ބަޔަކު ފަހުރުވެރިވާ މަސައްކަތެއް ނަމަވެސް، މަދު ބަޔަކު ނަފްރަތުކުރާ މަސައްކަތެއްކަމަށާއި ކޮރަޕްޝަނާ ދެކޮޅަށް މަސައްކަތްކުރާ ފަރާތަތްކަށް ތަފާތު ފާޑުކިޔުންތައް އަމާޒުވާކަމަށެވެ.

ޝިއުނާ ވަނީ ކޮރަޕްޝަނުގެ ޢަމަލުތައް ހިންގާ ފަރާތްތަކަށް ހަރުކަށި އަދަބު ދެވިގެން ނުދިއުމަކީ ނުވަތަ އެފަދަ ފަރާތްތަކާމެދު ފިޔަވަޅު އެޅުން ލަސްވެގެން ދިއުމަކީ އޭސީސީއަށް ފާޑުކިޔުންތައް އަމާޒުވާ މައިގަނޑު ސަބަބެއްގެ ގޮތުގައި ފާހަގަކުރައްވާފައެވެ. އޭސީސީންވެސް ޤަބޫލުކުރާ އިންސާފު ހިއްސާކޮށް ޝިއުނާ ވިދާޅުވީ ކޮރަޕްޝަނާ ދެކޮޅަށް ކުރާ މަސައްކަތުގައި އެކަށީގެންވާ ނަތީޖާއެއް ފެންނަންޖެހޭކަމަށާއި އެފަދަ ޢަމަލުތައް ހިންގާ ފަރާތްތަކާމެދު އިންސާފުވެރި ޝަރީޢަތެއްކޮށް އަދަބު ދިނުމުގެ އިތުރުން ދަޢުލަތަށް ގެއްލިގެންދާ މުދަލާއި ފައިސާ އެއްވެސް ޝަރުތެއްނެތި ދައުލަތަށް އަނބުރާ ލިބެންޖެހޭކަމަށެވެ.

ހިތާބުގައި ޝިއުނާ ވަނީ ދިވެހިރާއްޖޭގައި ފަސާދައިގެ ޢަމަލުތައް ހުއްޓުވުމާއި މަނާކުރުމަށް ޤާނޫނަކުން ވަކި މުޢައްސަސާއެއް ކަނޑައަޅާފައިވީނަމަވެސް، މި މަސައްކަތްތަކުގައި އޭސީސީއާއެކު އެއް ވިސްނުމެއްގައި ކޮރަޕްޝަނުގެ ޢަމަލުތަކާ ދެކޮޅަށް މަސައްކަތް ކުރާނެ ފަރުދުން ބޭނުންވާކަމަށް ވިދާޅުވެފައެވެ. އަދި ކޮރަޕްޝަނުގެ ޢަމަލުތަކަށް ޖާގަ ނުދިނުމަށް ދައުލަތުގެ މުއައްސަސާތަކުގެ މުވައްޒަފުން އަޒުމް ކަނޑައަޅަންޖެހޭކަމަށާއި މިފަދަ ޢަމަލުތަކުގެ ސަބަބުން ގެއްލިގެންދާ ޙައްޤުތަކާއި މުދަލާއި ފައިސާއަށް އެކަށީގެންވާ އިންސާފު ހޯދުމުގައި ކަމާ ގުޅުންހުރި މުޢައްސަސާތަކުގެ މަސައްކަތް އިތުރަށް ހަރުދަނާކޮށް މުޅި ނިޒާމް އެކީގައި އެއް ވިސްނުމެއްގައި މަސައްކަތް ކުރެވެންޖެހޭކަމަށް ހިތާބުގައި ޝިއުނާ ވަނީ ފާހަގަކުރައްވާފައެވެ.

ޤައުމުގެ ތަފާތު ދާއިރާތަކުގައި އެކި ފެންވަރުގައި ޒިންމާ އުފުލަން މާދަމާގައި ތިބޭނީ މިއަދުގެ ދަރިވަރުންކަން ފާހަގަކޮށް ޝިއުނާ ވިދާޅުވީ އެންމެ ތުއްތު ޢުމުރު ފުރައިން ތަޢުލީމީ ހަޔާތް ނިމި މުޖުތަމަޢުގެ ތެރެއަށް ނުވަތަ ވަޒީފާގެ މާހައުލަށް ނުކުތުމުގެ ކުރިން ކޮންމެ ދަރިވަރަކީވެސް ނަޒާހަތްތެރި ދަރިވަރަކަށް ވާންޖެހޭކަމަށެވެ. އަދި އެ އައުޒުމުގައި ދަރިން ތަރުބިއްޔަތު ކުރުމުގައި މައިންބަފައިން ގެ ޒިންމާ ވަރަށް ބޮޑުކަމަށާއި ގޭތެރޭގައި އުޅޭއުޅުމުގައި ނަޒާހަތްތެރި ސިފަތަކަށް ދަރިން ލޯބި ޖެއްސުމުގެ އިތުރުން ގެއިން ބޭރުގައި އުޅޭއުޅުމުގައިވެސް ދަރިންނަށް ފާރަވެރިވާންޖެހޭކަމަށް ޝިއުނާ ވަނީ ވިދާޅުވެފައެވެ.

މީގެއިތުރުން، ދަރިވަރުންގެ ތަޢުލީމީ ހަޔާތުގެ ދުވަސްވަރުގައި އެ ދަރިވަރުންގެ ކިބައިގައި ނަޒާހަތްތެރިކަމުގެ ސިފަ އަށަގެންނެވުމަށް މުދައްރިސުންގެ ޒިންމާ ބޮޑުކަން ފާހަގަކޮށް ޝިއުނާ ވިދާޅުވީ ނަޒާހަތްތެރިކަމުގެ ނަމޫނާ ބަޔަކަށް މުދައްރިސުން ވާންޖެހޭކަމަށައި މައިންބަފައިންނާއި މުދައްރިސުންގެ އެންމެ އިސް ވާޖިބަކަށް ވާންޖެހޭނީ، އެ ދަރިވަރުންނަކީ ޤައުމު ފަހުރުވެރިވާ ނަޒާހަތްތެރި ދަރިންތަކަކަށް ހެދުމަށްކަމަށެވެ. ޝިއުނާ ވިދާޅުވީ އޭސީސީގެ ތަސައްވުރަކީ ދިވެހި މުޖުތަމަޢުއަކީ ކޮރަޕްޝަނުގެ ޢަމަލުތަކުން ސަލާމަތްވެފައިވާ ނަޒާހަތްތެރި މުޖުތަމަޢަކަށް ހެދުންކަމަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
100%
0%
0%
0%
0%
ކޮމެންޓް