އެމްޑީއެން އާއި ސަލަފު އުވާލަންޖެހޭކަމަށް ގަބޫލެއްނުކުރަން، އެއީ ނުރައްކާތެރި ވިސްނުމެއް: ރައީސް ނަޝީދު

މޯލްޑިވިއަން ޑިމޮކްރެސީ ނެޓްވަރކް (އެމްޑީއެން) އާއި ސަލަފު ޖަމްޢިއްޔާ އުވާލުކީ ވަރަށް ނުރައްކާތެރިކަމެއްކަމަށާއި، އެދެ ޖަމްޢިއްޔާ އުވާލަންޖެހޭ ކަމަށް ޤަބޫލުފުޅުވެސް ނުކަރައްވާކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ދައުރު ނިމުމާއި ގުޅިގެން މަޖިލީހުން ރައްޔިތުންނަށް އާސްކް ސްޕީކަރގެ ނަމުގައި މަޖިލީހުގެ ރައީސާއި ސުވާލުކުރުމަށް ފުރުޞަތު ހުޅުވައި ހޮނިހިރު ދުވަހުގެ ރޭ ގެނެސްދިން ޕްރޮގުރާމުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ކްލަބް، ޖަމްޢިއްޔާއާއި، ޕާޓީތައް އުވާލުމުގެ ވިސްނުމަކަށް ދިއުމަކީ ވަރަށް ވިޔާނުދާ ވިސްނުމެއްކަމަށާއި އެއީ ވަރަށް ނުރައްކާތެރި ވިސްނުމެއްކަމަށެވެ.

Advertisement

ރައީސް ނަޝީދު ވިދާޅުވީ ޖަމްޢިއްޔާއެއް ކުށްވެރި ނުވާނެކަމަށާއި ޤާނޫނުލްއުޤޫބާތާއި ޚިލާފު އަމަލެއް ޖަމްޢިއްޔާއެއްގައި މަސައްކަތްކުރާ ފަރާތަކުން ހިންގައިފިކަމުގައިވާނަމަ، އެ ފަރާތަކާއި މެދު ފިޔަވަޅުއަޅަންޖެހޭނެކަމަށެވެ. ޢާންމު ރައްޔިތުންނަށް ހުޅުވާލައިގެން ބޭއްވި މި ޕްރޮގުރާމުގައި ރައީސް ނަޝީދަށް ވަނީ ތަފާތު އެކި ސުވާލުތަށް ކުރިމަތިކުރުވާފައެވެ. އެގޮތުން އެމްޑީއެންއާއި ސަލަފު ޖަމްޢިއްޔާ އުވާލުމުގައި ރައީސް ނަޝީދުގެ ވިސްނުންފުޅަކީ ކޮބައިކަން ސުވާލަކަށް އައިސްފައިވާއިރު، އެ ސުވާލަށް ޖަވާބު ދެއްވަމުން އެމަނިކުފާނު ވަނީ ދެޖަމްޢިއްޔާވެސް އުވާލައިގެން ނުވާނެކަމަށް ވިދާޅުވެފައެވެ.

ދެތަންވެސް އުވާލައިގެން ނުވާނޭ އަޅުގަޏދުގެ ވާހަކައަކީ. ސަލަފުވެސް އުވާލައިގެން ނުވާނޭ. އެމްޑީއެންވެސް އުވާލައިގެން ނުވާނޭ. ޖަމިއްޔާއެއް ހުރެފައި ކުއްވެރިއެއް ނުވާނޭ އިނގޭތޯ. ޖަމިއްޔާގެ ހުރި ކަމެއް ކުރި މީހެއްގެ މައްޗަށް ގާނޫނީ ފިޔަވަޅު އަޅަންޖެހޭނީ. ކްލަބް ޖަމިއްޔާ ޕާޓީތައް އުވާލުމުގެ ވިސްނުމަކަށް ދިއުމަކީ ވަރަށް ވިޔާނުދާ ވިސްނުމެއް. ނުރައްކާތެރި ވިސްނުމެއް. އަޅުގަނޑަށް ފެންނަ ފެނުމުގައި ސަލަފުވެސް އުވާކުން އެއީ ރަނގަޅު ކަމެއް ނޫން. އަދި އެމްޑީއެން އުވާލުންވެސް އެއި ރަނގަޅު ކަމެއް ނޫން. ސަލަފުގެވެސް އެމްޑީއެންގެވެސް ކުށްކޮއްފިއްޔާ ކޮންމެ މީހަކަށްވެސް ހައްގު އަދަބު ދެވެން ޖެހޭނެ.

''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ނަމުގައި މޯލްޑިވިއަން ޑިމޮކްރެސީ ނެޓްވާރކް (އެމްޑީއެން) ފަރާތުން ޢާންމުކުރި ރިޕޯޓުގައި މާތްﷲ އަށާއި ރަސޫލާ އަށް ފުރުއްސާރަކޮށްފައިވާތީ އެ ޖަމްޢިއްޔާ އުވާލައިފައިވާއިރު، މި ދަނޑިވަޅުގެ ބޭނުން ހިފައި އިދިކޮޅު ސިޔާސީ ފަރާތްތަކުން ވަނީ ދީން އައްޑަނައަކަށް ނަގައި ވެރިކަން ވައްޓާލައި ޤައުމުގެ ޞުލްޙަ މަސްލަސްކަން ނަގާލުމަށްޓަކައި އެކި ފަހަރު މަތިން ދީން ދިފާޢުކުރުމުގެ ނަމުގައި މުޒާހަރާތަށް ބާއްވާފައެވެ.

ރައީސް ނަޝީދު މިހެން ވިދާޅުވެފައިވަނީ ދީނީ ޖަމާޢަތްތަކުންނާއި، އިދިކޮޅު ބައެއް މެންބަރުންގެ ފަރާތުން ސަރުކާރުން ރާއްޖޭގައި އިސްލާމްދީން ނޫން އެހެން ދީންތައް ފަތުރަން މަސައްކަތްކުރަމުންދާކަމަށް ތުހުމަތުކޮށްފައިވާ ދަނޑިވަޅެއްގައިކަން ފާހަގަކޮށްލެވެއެވެ. ރައީސް ނަޝީދު ވިދާޅުވީ ކްލަބު، ޖަމްޢިއްޔާ ނުވަތަ ޕާޓީތައް އުވާލުމުގެ ވިސްނުމަކަށް ދިއުމަކީ ވަރަށް ވިޔާނުދާ ވިސްނުމެއްކަމަށެވެ. ރައީސް ނަޝީދު ވިދާޅުވީ ސަލަފު ނުވަތަ އެމްޑީއެންއަށް ނިޞްބަތްވާ ފަރާތަކުންވެސް ކުށެއްކޮށްފިނަމަ، އެމީހަކަށް ޙައްޤު އަދަބު ދެވެން ޖެހޭނެކަމަށެވެ.

ކުރީގެ ރައީސް އަދި ރައްޔިތުން މަޖިލީހުގެ ރައީސް މުޙައްމަދު ނަޝީދުގެ މައްޗަށް ފިޔަވަޅު އަޅައި ދިނުމަށް ޖަމިއްޔަތުއް ސަލަފުން ވަނީ މީގެކުރިން އިސްލާމިކް މިނިސްޓަރަށް ހުށަހަޅައިފައެވެ. ޖަމިއްޔަތުއްސަލަފުން މިނިސްޓަރު ޒާހިރަށް ފޮނުއްވާފައިވާ ސިޓީގައި ބުނެފައިވަނީ މޯލްޑިވިއަން ޑިމޮކްރަސީ ނެޓްވާރކް (އެމްޑީއެން) އިން އިސްލާމްދީނަށާއި, ކީރިތި ރަސޫލާއަށް ފުރައްސާކޮށް ނެރެފައިވާ ''ޕްރީލިމިނަރީ އެސެސްމަންޓް އޮފް އޮފް ރެޑިކަލައިޒޭޝަން އިން މޯލްޑިވްސް'' ރިޕޯޓު ދިފާޢުގައި ރައީސް ނަޝީދު ވާހަކަފުޅުދައްކަވާ ކަމަށެވެ.