ސައުތު އޭޝިއަން ގޭމްސް: ކުޅުނު ދެވަނަ މެޗުން ވެސް ބަލިވެ އަންހެން ހޭންޑް ބޯޅަ ޓީމު މުބާރާތުން ކަޓައިފި

އަންހެން ޤައުމީ ހޭންޑް ބޯޅަ ޓީމު ކުޅުނު ދެވަނަ މެޗުންވެސް ބަލިވެ މުބާރާތުން ކަޓައިފިއެވެ.

ރާއްޖެ ހިމެނޭ ގުރޫޕްގައި ހިމެނެނީ ރާއްޖޭގެ އިތުރުން މިސަރަހައްދުގެ ގަދަ ދެ ބާރު ކަމުގައިވާ އިންޑިއާއާއި ޕާކިސްތާންއެވެ.

ރާއްޖެއިން ގުރޫޕްގެ ފުރަތަމަ މެޗުގައި ބުދަ ދުވަހު އިންޑިއާ އާ ވާދަކޮށް ބަލިވެފައި ވާއިރު، މިގުރޫޕްގެ ފަހު މެޗުގައި ބުރާސްފަތި ދުވަހު ޕާކިސްތާނާއި ވާދަކޮށް ދިވެހި ޓީމު ބަލިވީ 32 ލަނޑު 27 ލަނޑުންނެވެ.

މިމެޗުން މޮޅުވެގެން އަންހެން ޤައުމީ ހޭންޑް ބޯޅަ ޓީމަށް ސެމީއަށް ދިއުމުގެ ފުރުސަތު އޮތެވެ. ވާދަވެރި ކުޅުމެއް ފެނިގެންދިޔަ މިމެޗުގައި ޕާކިސްތާނު ޓީމުގެ ފާރާތުން އަވަސް ކުޅުމެއް ފެނިގެންދިޔައެވެ.

މެޗުގެ ފުރަތަމަ ހާފުގައި ޕާކިސްތާނުންވަނީ 16 ލަނޑު ޖަހާފައެވެ. އަދި ފުރަތަމަ ހާފުގައި ރާއްޖެއަށް ޖެހުނީ 12 ލަނޑެވެ. މެޗުގައި ރާއްޖެއަށް ލަނޑު ޖަހަން ލިބުނު ފުރުސަތުތަކުގެ ހުރަހަކަށްވީ ޕާކިސްތާނުގެ ޑިފެންޑަރުންނެވެ. 4 ލަނޑުގެ ތަފާތުން ދިވެހިރާއްޖެ ފުރަތަމަ ހާފުގައި ބަލިވިނަމަވެސް، ދެވަނަ ހާފުގައި ރާއްޖޭންވަނީ ކުޅުން ރަނގަޅުކޮށްފައެވެ. ނަމަވެސް ޕާކިސްތާނުގެ ހަށިގަނޑުން ވަރުގަދަ ކުޅުންތެރިންވަނީ ރާއްޖޭގެ ކުޅުންތެރިން ކުޅެމުންދިޔަ އެޓޭކިންގ ގޭމު ހުއްޓުވައިފައެވެ. މެޗުގެ ދެވަނަ ހާފުގައި ދިވެހި ޓީމުން ވަނީ ފުރަތަމަ ހާފަށް ވުރެ ރަނގަޅަށް ކުޅެފައެވެ.

މިބައްޔާއެކު ރާއްޖޭގެ އަންހެނުންގެ ހޭންޑް ބޯޅަ ޓީމަށް ވަނީ މުބާރާތް ނިމިފައެވެ.