ސަރަހައްދީ ކަންކަމުގައި ރާއްޖޭގެ އަޑު އުފުލުމުގެ ޝައުގުވެރިކަން ބޮޑު: ރައީސް
އައޯރާގެ އެންމެ އާ މެންބަރުގެ ހައިސިއްޔަތުން ސަރަހައްދީ ކަންކަމުގައި ރާއްޖޭގެ ފަރާތުން އަޑު އުފުލުމުގެ ޝައުގުވެރިކަން ބޮޑު
ރައީސް އިބްރާހިމް މުހައްމަދު ސޯލިހު
އިންޑިއާ ކަނޑުގެ ޞަރަޙައްދީ ކަންކަމުގައި ރާއްޖޭގެ އަޑު އުފުލުމުގެ ޝައުޤުވެރިކަން ބޮޑުކަމަށް ރައީސް އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
އިންޑިއާއާއި ރާއްޖެއާއި ދެމެދު މުހިންމު ހަތަރު އެއްބަސްވުމެއް ބަދަލުކުރުމަށް ރައީސް އޮފީހުގައި ބޭއްވި ޚާއްޞަ ރަސްމިއްޔާތުގައ ރައީސް ވިދާޅުވީ އިންޑިއަން އޯޝަން ރިމް އެސޯސިއޭޝަން ނުވަތަ އައޯރާގެ އެންމެ އާ މެންބަރުގެ ހައިސިއްޔަތުން ވެސް ޞަރަޙައްދީ ކަންކަމުގައި ރާއްޖޭގެ ފަރާތުން އަޑު އުފުލުމުގެ ޝައުޤުވެރިކަން ބޮޑު ކަމަށެވެ.
މި މޭރުމުން ވާހަކަ ދައްކަވަމުން ރައީސް ވިދާޅުވީ އިންޑިއާ ކަނޑުގެ ޞަރަޙައްދުގައި ކަނޑުގެ ސަލާމަތާއި ރައްކާތެރިކަމާއި ވިޔަފާރީގެ ދާއިރާގައި އޮންނަ ގުޅުންތައް ވަރުގަދަ ކުރުމަށް އިންޑިއާ ސަރުކާރާ އެކު މަސައްކަތް ކުރުމަށް ބޭނުންފުޅުވެވަޑައިގަންނަވާ ކަމަށެވެ.
ރައީސް ވިދާޅުވީ އިންޑިއާއާއެކު ބާއްވާ ގުޅުމަށް އަބަދުވެސް ބޮޑު އިސްކަމެއް ދެއްވާ ކަމަށެވެ. އަދި ދެޤައުމުގެ ދެމެދުގައި އޮތް ޒަމާންވީ ގުޅުން އަލުން ވަރުގަދަވެގެންދާ ތަން ބަލައިގަންނަ ކަމަށާއި، ދެޤައުމުގެ ދެމެދުގައި އޮތް ގުޅުން ކުރިއަށް އޮތްތަނުގައި އިތުރަށް ބަދަހިވެގެންދާނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ.
އިންޑިއާއާއި ރާއްޖެއާއި ދެމެދު ވަނީ މުހިންމު ހަތަރު އެއްބަސްވުމެއް ބަދަލުކޮށްފައެވެ. އެގޮތުން އައްޑޫ ސިޓީގެ 3 ސަރަޙައްދެއްގައި "ގޭދޮށު މަސް ޕްލާންޓް" ޤާއިމުކުރުމުގެ އެއްބަސްވުމަކާއި، ރުޕޭކާޑު ރާއްޖޭގައި ތަޢާރަފުކުރުމާ ބެހޭ އެއްބަސްވުމާއި، މާލޭގެ މަގުބައްތިތައް ލެޑް ބައްތިއަށް ބަދަލުކުރުމުގެ މަޝްރޫއު އިފްތިތާޙުކުރުމުގެ އެއްބަސްވުމާއި، އިންޑިޔާއިން ރާއްޖޭގެ ކޯސްޓްގާޑަށް ހަދިޔާކުރި ކޯސްޓްގާޑު އައިޕީވީ ކާމިޔާބު ރާއްޖެއާ ރަސްމީގޮތުން ޙަވާލުކުރުމުގެ އެއްބަސްވުންވެސް ހިމެނެ އެވެ.
