އިނގިރޭސި ޕްރިމިއަރ ލީގް: ޔުނައިޓެޑާއި ވިލާ، އަދި އާސެނަލްއާއި ނޯވިޗްގެ މެޗުތައް އެއްވަރު

އާދިއްތަ ދުވަހުގެ ކުރިއަށް ދިޔަ އިނގިރޭސި ޕްރިމިއަރ ލީގުގައި ވަރުގަދަ މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗް އެސްޓަން ވިލާއިން އެއްވަރު ކޮށްފިއެވެ.

އޯލްޑް ޓްރެފޯޑުގައި ކުޅުނު މި މެޗު ނިމިފައިވަނީ 2-2ގެ ނަތީޖާއަކުންނެވެ.

މެޗު ފެށުމަށް ފަހު 11 ވަނަ މިނެޓުގައި، އެސްޓަން ވިލާއިން ލީޑް ނަގާފައިވާއިރު ޔުނައިޓެޑުން ފަހަތުން އަރާ 2-1ގެ ލީޑް ނެގިއެވެ. ނަމަވެސް މި މެޗު ނިމިފައިވަނީ ޓައިރޯން މިންގްސްގެ ގޯލަކާއެކު މެޗު އެއްވަރު ވެގެންނެވެ.

މި ނަތީޖާއާއެކު ޔުނައިޓެޑް މިހާރު އޮތީ ލީގުގެ ތާވަލުގެ ނުވަ ވަނައިގައެވެ. އެއީ 18 ޕޮއިންޓާއެކުއެވެ. މިއީ ތާވަލުގެ އެންމެ ކުރީގައި އޮތް ލިވަޕޫލްއަށް ވުރެ 22 ޕޮއިންޓް މަދުންނެވެ. އެސްޓަން ވިލާ އޮތީ ތާވަލުގެ 15 ވަނައިގައެވެ.

އާދިއްތަ ދުވަހު ދެން ކުޅުނީ އާސެނަލްއާއި ނޯވިޗް ސިޓީއެވެ. މި މެޗުވެސް ނިމިފައިވަނީ 2-2ގެ ނަތީޖާއަކުންނެވެ.

މި މެޗުގައި ފުރަތަމަ ކުރި ހޯދާފައިވަނީ ނޯވިޗްއިންނެވެ. އެއީ 21 ވަނަ މިނެޓުގައި ޓީމޫ ޕުއްކީގެ ގޯލަކުންނެވެ. ނަމަވެސް އޭގެ 8 މިނެޓް ފަހުން އާސެނަލުން ވަނީ ލިބުނު ޕެނަލްޓީއެއް ކާމިޔާބުކޮށް މެޗު އެއްވަރުކޮށްފައެވެ. މެޗުގެ ފުރަތަމަ ހާފު ނިމިފައިވަނީ ނޯވިޗްގެ އިތުރު ގޯލަކާއެކު 2-1 ގެ ނަތީޖާއަކުންނެވެ. އެހެންނަމަވެސް، ދެވަނަ ހާފު ފަށުމަށް ފަހު 57 ވަނަ މިނެޓުގައި އާސެނަލް އިން ވަނީ މެޗް އެއްވަރުކޮށްފައެވެ.

19 ޕޮއިންޓާއެކު އާސެނަލް އޮތީ ޕްރިމިއަރ ލީގު ތާވަލުގެ 8 ވަނައިގައެވެ. އަދި ނޯވިޗް އޮތީ 19 ވަނައިގައެވެ. އެއީ 11 ޕޮއިންޓާއެކުއެވެ.