ކ. މާލެ
|
2 ޑިސެންބަރ 2019 | ހޯމަ 18:04
މިނިވަން މުއައްސަސާތަކާއި ބެހޭ ކޮމިޓީގެ ބައްދަލުވުމުގެ ތެރެއިން
މިނިވަން މުއައްސަސާތަކާއި ބެހޭ ކޮމިޓީގެ ބައްދަލުވުމުގެ ތެރެއިން
މަޖިލިސް
ރައްޔިތުންގެ މަޖިލިސް
މިނިވަން މުއައްސަސާތަކަށް އެންމެ ގާބިލު ބޭފުޅުން ކަނޑައެޅުމުގައި ކޮމިޓީއަށް ހުރަސްތަކެއް
 
ރަނގަޅަށް އިންޓަވިއު ކުރެވިގެން އެންމެ ރަނގަޅު މީހަކު ހޮވޭނެ ގޮތަށް އުސޫލު އޮންނަންޖެހޭ ކަމަށް އަސްލަމް ވިދާޅުވި
 
އެންމެ މެންބަރަކަށް މުޅި ކޮމިޓީގެ ނިންމުން ބަދަލުކުރުމުގެ ފުރުސަތު ލިބިގެންދާ ކަމަށް ރޮޒައިނާ ވިދާޅުވި
 
މިހާރު ގަވާއިދުގައިވާ ގޮތުން ކޮމިޓީގެ ތިންބައި ކުޅަ ދެ ބައިގެ އަޣްލަބިއްޔަތު ލިބިގެން ނޫންގޮތަކަށް ނަމެއް ތަޅުމާ ހަަމައަަށް ނާދޭ

ރައްޔިތުންގެ މަޖިލީހުގެ ޤަވާއިދު މިހާރު އޮތް ގޮތުން މިނިވަން މުއައްސަސާތަކަށް މެންބަރުން ޢައްޔަނުކުރުމުގައި އެންމެ ޤާބިލު ފަރާތްތަކުގެ ނަންތައް ތަޅުމާ ހަމައަށް އައުމުގައި ހުރަސްތަކެއް ކުރިމަތިވާކަމަށް މިނިވަން މުއައްސަސާތަކާބެހޭ ކޮމިޓީގެ މުޤައްރިރު އަދި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޤަވާއިދުގައި މީގެކުރިން އޮންނަނީ މިނިވަން މުއައްސަސާތަކަށް މެމްބަރުން ޢައްޔަނު ކުރުމަށްޓަކައި ކޮމިޓީން މާކްސްދޭ ގޮތަށެވެ. އަދި އެއަށްފަހު ކޮމިޓީން އިސްކަންދޭ ތަރުތީބުން މަޖިލީހުގެ ތަޅުމަށް ހުރިހާ ނަންތައް ފޮނުވާގޮތަށެވެ. 19 ވަނަ ރައްޔިތުންގެ މަޖިލީހުން ޤަވާއިދަށް ގެނައި އިޞްލާޙާއެކު ޤަވާއިދުގެ 201 ވަނަ މާއްދާގެ ޅ ގައި ބުނަނީ މަޤާމުގެ ޝަރުޠުހަމަވާ ކަމަށް ކޮމިޓީއަށް ނަން ހުށަހަޅާފައިވާ ކޮންމެ ފަރާތެއް އެ މަޤާމަށް ޢައްޔަނުކުރުމާމެދު ނުވަތަ ރުހުން ދިނުމަށް ފެންނަކަމާމެދު ކޮމިޓީގެ މެމްބަރުންގެ މެދުގައި ވޯޓު ނަގަންވާނެކަމަށެވެ. އަދި މަޖިލީހުގެ ތަޅުމަށް ފޮނުވަން ފާސްވާނީ ކޮމިޓީގެ ތިންބައިކުޅަ ދެބައިގެ ވޯޓުން ފާސްވާ ނަންތަކެވެ. އަދި ކޮމިޓީ ރިޕޯޓުގައި އެކަން ފާހަގަކުރަންވާނެ އެވެ.

މިނިވަން މުއައްސަސާތަކާއި ބެހޭ ކޮމިޓީގައި ތިއްބަވަނީ 12 މެމްބަރުންނެވެ. އެކޮމިޓީގެ އަޣްލަބިއްޔަތަކީ 8 މެމްބަރުންނެވެ. ހޯމަ ދުވަހުގެ ޖަލްސާއަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އަށް އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް މިނިވަން މުއައްސަސާތަކާއި ބެހޭ ކޮމިޓީން ދިރާސާކުރުމަށްފަހު އެރިޕޯޓު ހުށަހަޅުއްވަމުން ރޮޒައިނާ ވަނީ ރައީސުލްޖުމްހޫރިއްޔާ ފޮނުއްވާ ނަންތަކުގެ ތެރެއިން ހުރިހާ ނަމެއް މަޖިލީހުގެ ތަޅުމަށް މަޖިލީހުގެ މެމްބަރުން އެއާދޭތެރޭ ގޮތެއް ނިންމުމަށް ގެނެވޭގޮތަށް މަޖިލީހުގެ ޤަވައިދުގައި ނެތުމުގެ ސަބަބުން އެކަމުގެ ކަންބޮޑުވުން ފާޅުކުރައްވާފައެވެ.

އެއީ މިހާރު މަޖިލީހުގެ ޤަވާއިދު އޮންނަގޮތުން ކޮމިޓީގެ މެމްބަރުން ވޯޓު ދެއްވާ ވޯޓުގެ އަޣްލަބިއްޔަތު ނުލިބޭ ފަރާތަކީ ކިތަންމެ ޤާބިލު ފަރާތެއް ކަމުގައިވިޔަސް އެނަމެއް ތަޅުމާ ހަމައަށް އައުމުގެ ފުރުޞަތު ނޯންނާތީކަމަށް ރޮޒައިނާ ވިދާޅުވި އެވެ. އެގޮތަށް އެކަން އޮތުމުގެ ސަބަބުން އެންމެ މެންބަރަކަށް މުޅި ކޮމިޓީގެ ނިންމުން ބަދަލުކުރުމުގެ ފުރުޞަތު ލިބިގެންދާ ކަމަށް ރޮޒައިނާ ވިދާޅުވި އެވެ. އެގޮތަށް ދިމާވާ ސަބަބު ހާމަކުރައްވަމުން ރޮޒައިނާ ވިދާޅުވީ ތިން ބައިކުޅަ ދެބައިގެ އަޣްލަބިއްޔަތުން ފާސްކުރަން ބަލާއިރު އިންޓަރވިއު ކުރާއިރު ކޮމިޓީގެ ބައްދަލުވުމުގައި މެމްބަރުން ހާޒިރުވެވަޑައިގެން ތިއްބަވަނީ އެކި މިންވަރަށްކަމަށެވެ. 8 މެމްބަރުން ތިއްބަވާ ވަގުތެއްގައި އެންމެ މެމްބަރަކު ވޯޓު ނުދިންކަމުގައި ވިޔަސްވެސް އެބޭފުޅެއްގެ ނަން ތަޅުމާ ހަމައަށް އައުމުގެ ފުރުޞަތު ގެއްލޭއިރު 12 މެމްބަރުން ތިއްބަވައިގެން އިންޓަރވިއު ކުރާ ގަޑިއެއްގައި އެއް މެމްބަރަކަށް އަދި ނުފެނުނު ކަމުގައިވިޔަސް އެފަރާތެއްގެ ނަން ތަޅުމަށް އައުމުގެ ފުރުޞަތު ލިބިގެންދާތީ ކަމަށް ރޮޒައިނާ ވިދާޅުވި އެވެ.

އަދި މިއީ އެންމެ އިންސާފުން މިކަން ހިނގާގޮތްކަމަށް ދެކެވަޑައިނުގަންނަވާ ކަމަށް ރޮޒައިނާ ވިދާޅުވި އެވެ.

އެހެންވީމާ މިއީ އެމްޑީޕީގެ މެމްބަރެއްގެ ޙައިޞިއްޔަތުންވެސް އަޅުގަނޑު ވަރަށް ކަންބޮޑުވާކަމެއް. 12 މެންބަރުން ތިބޭ ކޮމިޓީއެއްގައި ހުރިހާ ވަގުތެއްގައި އިންޓަރވިއު ކުރާ ގަޑީގައި ހުރިހާ މެންބަރުންނެއް ނުތިއްބަވާ. ނުތިއްބެވީމާ ވާ ގޮތަކީ އެންމެ އިންސާފުވެރިކޮށެއް ނޫން މިވަނީ އިންޓަރވިއު ކުރެވޭ ބޭފުޅުންނާ ދޭތެރޭ. އެއީ އެއް ބޭފުޅަކަށް އިންޓަރވިއު ކުރާއިރު 12 މެމްބަރުން އަނެއް ބޭފުޅަކާއި އިންޓަރވިއު ކުރާއިރު 8 މެމްބަރުން ތިބެފައި ދެން އެވޯޓު ނެގިގެން ދާއިރުގައި އެހެން އެކަން ވެގެން އެމީހެއްގެ ނަން ތަޅުމާ ހަމައަށް އައުމުގެ ފުރުޞަތު ނުލިބިގެން ދިޔުމަކީ އަޞްލު އެންމެ ރަނގަޅު މީހާވެސް ކަޓުވާލަން ބޭނުންވަންޏާ ކޮމިޓީގައި އެމީހަކު ވޯޓުނުލާ ކަޓުވާލުމުގެ ފުރުޞަތު އެބަލިބޭ. އެހެންކަމަށްވާނަމަ ތަޅުމާ ހަމައަށް އެނަމެއް ނާދޭ.
މިނިވަން މުއައްސަސާތަކާބެހޭ ކޮމިޓީގެ މުގައްރިރު ރޮޒައިނާ އާދަމް

ރޮޒައިނާ ވިދާޅުވީ މިގޮތަށް މިކަން ހިނގާތީ މިކަން ބަދަލުކުރުމަށް ޢާންމު ކޮމިޓީއަށް ފޮނުވާފައިވާކަމަށާއި ޤަވާއިދަށް ވީ އެންމެ އަވަހަކަށް ޢާންމު ކޮމިޓީން ބަދަލު ގެންނެވުމަށް އެދިވަޑައިގަންނަވާ ކަމަށެވެ.

ރޮޒައިނާގެ މިކަންބޮޑުވުންތަކަށް ތާޢީދު ކުރައްވާ ވާހަކަ ދައްކަވަމުން ހިތަދޫ އުތުރު ދާއިރާގެ އެމްޑީޕީ މެންބަރު މުހައްމަދު އަސްލަމް ވިދާޅުވީ މިހާރު ޢަމަލުކުރަމުންދާ އިންތިޒާމުތަކުގެ ތެރެއިން ޢަދުލުވެރިކަމާއެކު މިކަން ކުރިޔަށް ދިޔުމުގެ ފުރުޞަތު ކުޑަކަމުގައި ވަނީނަމަ އެއަށް ބަދަލު ގެންނަންޖެހޭ ކަމަށް ޤަބޫލުކުރައްވާ ކަމަށެވެ.

މިނިވަން މުއައްސަސާތަކަށް މެމްބަރުން ޢައްޔަނުކުރުމުގައި މަޖިލީހުގެ ދައުރެއް އޮތުމުގެ އެންމެ ބޮޑު މަޤުޞަދަކީ ރައީސް އޮފީހުން އެކަން ކުރެއްވުމަށްވުރެ ބޮޑަށް ޢަދުލުވެރިކަން ގެނައުން ކަމަށް އަސްލަމް ވިދާޅުވިއެވެ. އަދި މިކަމުގައި ރަނގަޅަށް އިންޓަވިއު ކުރެވިގެން އެންމެ ރަނގަޅު މީހަކު ހޮވޭނެ ގޮތަށް އުޞޫލު އޮންނަންޖެހޭ ކަމަށް އަސްލަމް ވިދާޅުވި އެވެ.

އެނޫންގޮތަކަށް އެތައި ތިއްބަވާ ވަކި މެންބަރަކު ވަޑައިނުގެން އެގޮތަށް ވޯޓު ނުދެއްވުމުގެ ސަބަބުން ޤާބިލު ބޭފުޅަކަށް ފުރުޞަތު ގެއްލިގެންދާ ގޮތަށް އޮތުމަކީ ދެރަ ކަމެއް ކަމުގައި ދެކެން. އެހެންކަމުން އެއްގޮތަކީ މިކަން ރައީސް ފޮނުއްވާ ނަންފުޅުތައް ދިރާސާކުރުމުގެ މަރުޙަލާ ރައީސް އޮފީހުގެތެރެއިން ވެސް ވަރުގަދަ ވެފައި އޮތުން. އަދި ވަކިން ޚާއްޞަކޮށް ރައީސް ނަންފުޅެއް ފޮނުއްވީމައި ކޮމިޓީން އެއްގޮތަކަށްވެސް ތަޅުމާ ހަމައަށް އަންނަވަރުގެ ނަމަކަށް ނުވާނަމަ، އެއީ ވަރަށް ދެރަކޮށް ވާކަމެއް ކަމަށް ދެކެނީ. އެއީ މުޅިން ވާންޖެހޭ ގޮތެއްކަމަށް ނޫންކަމަށް ދެކެނީ. އެންމެ ނަންފުޅެއްވެސް މަޖިލީހުގެ ފްލޯރ އާއި ހަމައަށް ނާންނަ ގޮތަށް ޤަވާއިދު އޮތުމަކީ މައްސަލަ އެއް ކަމަށް ދެކެނީ.
ހިތަދޫ އުތުރު ދާއިރާގެ މެމްބަރ މުހައްމަދު އަސްލަމް

މިނިވަން މުއައްސަސާތަކަށް މެންބަރުން ޢައްޔަނުކުރުމުގައި ޢަމަލުކުރަމުންދާ ގޮތާއި ގުޅޭ ގޮތުން ވާހަކަދައްކަވަމުން މެދުހެންވޭރު ދާއިރާގެ މެމްބަރ އަދި އެމްޑީޕީގެ ޕީޖީ ލީޑަރު ޢަލީ އާޒިމް ވަނީ ތަފާތު ޚިޔާލެއް ފާޅުކުރައްވާފަ އެވެ. އެގޮތުން އާޒިމް ވިދާޅުވީ ފާއިތުވި 7 އަހަރު މިނިވަން މުއައްސަސާތަކަށް މެންބަރުން ޢައްޔަނުކުރުމުގައި މަޖިލީހުން ގެންގުޅުނު އުޞޫލު ފެެއިލްވެފައިވާކަން ފާއިތުވި 7 އަހަރު މިނިވަން މުއައްސަސާތައް މަސައްކަތް ކޮށްފައިވާ ގޮތުން އެނގިގެންދާ ކަމަށެވެ. ފާއިތުވި ދެ މަޖިލީހުގައިވެސް މަސައްކަތް ކުރައްވާފައިވާކަމަށް ވިދާޅުވެ އާޒިމް ވިދާޅުވީ އޭރު ވަރަށް މަތިން ކޮމިޓީން މާކްސް ލިބޭ ފަރާތްތައް ތިއްބާ އެއަށްވުރެ ދަށްކޮށް މާކްސް ލިބޭ ފަރާތްތަކުގެ ނަންތައް ތަޅުމަށް ގެނެސްގެން ހޮވާފައި އެބަހުރި ކަމަށެވެ.

އެހެންކަމުން 19 ވަނަ ރައްޔިތުންގެ މަޖިލީހުން މަސައްކަތްކުރީ ޤަވާއިދަށް ބަދަލުގެނެސްގެން އެކަން ރަނގަޅު ކުރުމަށްކަމަަށް އާޒިމް ވިދާޅުވި އެވެ. މިހާރު މިއޮތްގޮތްވެސް ބަދަލު ކުރެވިދާނެ ކަމަށާއި ނަމަވެސް މިވަގުތަށް މިހާރު ޤަވާއިދުގައިވާ ގޮތަށް އެކަން ތަޖުރިބާ ކުރުމަށް އެދިވަޑައިގަންނަވާކަމަށް އާޒިމް ވިދާޅުވި އެވެ.

ޤާބިލު ފަރާތްތައް ތިއްބާ މީގެ ކުރިން އޮތީ ނާޤާބިލު ފަރާތްތައް އެތަންތަނަށް ލައިގެން ފެއިލްވެގެން ގޮސްފައި. ހިނގާށޭ އަޅުގަނޑުމެން ޤާބިލު ފަރާތްލާން. އަޅުގަނޑުމެން މި ތަޅުމުން ކަންކަން ނިންމަން. ހަމައެކަނި ކޮމިޓީއަކުން އަދި ކަމެއް ނިންމާފައި ދޫކޮށްލިއަސް އަޅުގަނޑުމެންނަށް ނެތް އެގޮތަށް ކަންކަން އެއްބަސްވެވޭކަށް. ނެތްކަމަކީ މީގެކުރިން އެކަން އަޅުގަނޑުމެން ތަޖުރިބާކޮށްފައި ހުރީމާ. އެހެންވީމާ އެއް ފަހަރަކު އަޅުގަނޑުމެން ބަލާލާފައި 19 ވަނަ މަޖިލީހުން މިނިވަން މުއައްސަސާތަކަށް އެކިއެކި ބޯޑުތަކަށް މިނަގާ މީހުން އަޅެ ފެއިލްވެގެންދޭތޯ. އަޅުގަނޑުމެން ކުރަންޖެހޭ ކަންކަންކޮށްފައި ބަލާފައި ދެން އަނެއްކާވެސް މިޤަވާއިދަށް ބަދަލުގެންނަން ޖެހުމަކީ އަޅުގަނޑު ޤަބޫލުކުރާ ގޮތުގައި ކުރަންޖެހިއްޖެނަމަ ކުރަންޖެހޭ ކަމެއްކަމަށް އަޅުގަނޑު ޤަބޫލުކުރަން.
މެދުހެންވޭރު ދާއިރާގެ މެމްބަރ އަލީ އާޒިމް

ބްރޯޑްކޮމްއަށް ޢައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންތަކުގެ ތެރެއިން އެއް ލިސްޓުގައިވާ ނަންތަކަށް ކޮމިޓީގެ އަޣްލަބިއްޔަތު ނުލިބިގެން ތަޅުމާ ހިސާބަށް އެއްވެސް ނަމެއް އައިސްފަ އެއް ނުވެއެވެ. އަނެއް ދެ ލިސްޓުން ކުރީގައި އުޅެނީ ޝިފްލާ އިބްރާހީމް އާއި އަހުމަދު ގައިސް އާއި މަރިޔަމް ވަހީދާ އަދި އައިމިނަތު އަމީނާ(އަނާ) އެވެ. މިނަންތަކަށް އަންގާރަ ދުވަހު އޮންނަ ޖަލްސާގައި ވޯޓަށް އަހާނެއެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: ޒިހްނަތު ހަސަން
0%
0%
0%
0%
0%
0%
ކޮމެންޓް
2 ޑިސެންބަރ 2019 | ހޯމަ 18:21
އިބްރާހިމް ނޫރައްދީން
ތިޔަ ދިރާސާކުރާގޮތެއް އެބަޖެހެއެއްނު އެނގެން. ކަޓުވާލަން ބޭނުންވީމަ ކޮމިޓީ ރޫމަކު ނުތިބޭނެ. ތިބޭނީ ކުޑަދޮށުގަ