މިނިވަން މުއައްސަސާތަކާއި އެކިއެކި ބޯޑުތަކަށް ކުރިމަތިލާ ފަރާތްތަކުން މެމްބަރުންނަށް ގުޅައިގެން ލޮބީ ނުކުރުމަށް މެދުހެންވޭރު ދާއިރާގެ މެމްބަރ އަލީ އާޒިމް އިލްތިމާސްކުރައްވައިފި އެވެ.

އެމްޑީޕީގެ ޕީޖީ ލީޑަރުކަންވެސް ކުރައްވާ އަލީ އާޒިމް މިގޮތަށް އިލްތިމާސްކުރެއްވީ މޯލްޑިވްސް ބްރޯޑްކާސްޓިންގ ކޮމިޝަނުގެ މެމްބަރުކަމަށް ޢައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކުރި މިނިވަން މުއައްސަސާތަކާއި ބެހޭ ކޮމިޓީގެ ރިޕޯޓަށް ބަހުސް ކުރައްވަމުންނެވެ. އާޒިމް ވިދާޅުވީ މިނިވަން މުއައްސަސާތަކަށް މެމްބަރުން ޢައްޔަނުކުރާގޮތް ބަދަލުކޮށްފައިވަނީ އެތަންތަނަށް ޤާބިލު ބޭފުޅުން ހަމަޖެއްސުމުގެ ވިސްނުމުގައި ކަމަށެވެ. އެގޮތުގެމަތިން މަސައްކަތް ކުރަމުންދަނީ ތަންތަނަށް އެންމެ ޤާބިލު މީހުން ނެގޭތޯ ކަމަށް އާޒިމް ވިދާޅުވި އެވެ.

އެހެންކަމުން މެންބަރުންނަށް ގުޅައިގެން ތަކުރާރުކޮށް ކެމްޕޭންކުރާ އުޞޫލުން އެކަން ނުކުރުމަށް އިލްތިމާސް ކުރައްވާކަމަށް އާޒިމް ވިދާޅުވި އެވެ.

އާޒިމް ވިދާޅުވީ މިނިވަން މުއައްސަސާތަކާއި ބޯޑަށް އެންމެ ރަނގަޅު ފަރާތް ނެގުމަށް މެމްބަރުންނަށް ދޫކޮށްލާފައި ބޭއްވުމަކީ ދިވެހި ރައްޔިތުންނަށް އެންމެ ރަނގަޅު ގޮތްކަމުގައި ދެކިވަޑައި ގަންނަވާކަމަށެވެ.

މިނިވަން މުއައްސަސާތަކާއި ބޯޑުތަކަށް ސިޔާސީ ޕާޓީތަކުގެ އެކްޓިވިސްޓުންނާއި، ޕާޓީތަކާއި ގުޅުންހުރި މީހުން މަޖިލީހުން ނަގާ މައްސަލައަކީ ޢާންމުން އަބަދުވެސް ކުރަމުންދާ ޝަކުވާ އެކެވެ. އެތަންތަނަށް ޤާބިލު ނޫން ބޭފުޅުން ޢައްޔަނުކުރުމުގެ ސަބަބުން، އެ މުއައްސަސާތައް ރަނގަޅަށް ހިނގަމުން ނުދާކަމަށާއި، ސިޔާސީ ނުފޫޒުގެ ތެރެއިން އެތަންތަން ހިނގަމުންދާކަމުގެ ޝަކުވާ އާންމުން އަބަދުވެސް ކުރަމުންދެއެވެ.