ގަވާއިދަށް ގެނައި ބަދަލާއެކު އުލިގަމަށް އަންނަ ޔޮޓްތަކުގެ އަދަދު ވަރަށް ބޮޑަށް މަދުވެއްޖެ: އުލިގަމް ކައުންސިލް
1 ޑިސެމްބަރު 2019 | އާދީއްތަ 19:06ކްރޫޒްލައިނާއި ސެއިލާސްގެ ގޮތުގައި ދެމަރިން އަންނަ ޔޮޓުން ވެސް ފީ ނެގުމުގައި އެއް ހަމައެއް
މަޖިލީހުގެ އިގްތިޞާދީ ކޮމެޓީން މިއަދު ބޭއްވި ބައްދަލުވުމުގައި ހއ. އުލިގަމް ކައުންސިލާ ބައްދަލު ކުރައްވަނީ-
ރާއްޖޭގައި ޔޮޓް ފަހަރު ބަނދަރުކުރުމާއި ގުޅުން ހުރި ޤަވާއިދުތަކަށް ގެނެވުނު ބަދަލުތަކެއްގެ ސަބަބުން ރާއްޖެއާއި، ވަކިން ޚާއްޞަކޮށް ހއ. އުލިގަލަށް އަންނަ ޔޮޓް ފަހަރުގެ އަދަދު ވަރަށް ބޮޑަށް މަދުވެފައިވާ ކަމަށް އުލިގަމު ކައުންސިލުންނާއި ޔޮޓް ފަހަރުގެ އެޖެންޓުންގެ ގޮތުގައި މަސައްކަތްކުރާ ފަރާތްތަކުން ބުނެފި އެވެ.
މި ފަރާތްތަކުން މިކަން ޙިއްސާކޮށްފައިވަނީ އާދީއްތަ ދުވަހު ބޭއްވި ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް ހުށަހެޅިފައިވާ މައްސަލައާ ގުޅޭގޮތުން ވާހަކަދައްކަމުންނެވެ.
ރާއްޖޭގައި ޔޮޓް ފަހަރު ބަނދަރުކުރުމާއި ގުޅުން ހުރި ސަރުކާރުގެ ޤަވާއިދުތަކާއި އުޞޫލްތަކައް ގެނައި ބަދަލުގެ އުލިގަމުގައި ޔޮޓް ބަނދަރުކުރުން މިހާރު މަދުވެފައިވާކަން ފާހަގަކޮށް، ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް ހުށަހެޅިފައިވާ މައްސަލައާ ގުޅޭގޮތުން، އުލިގަމު ކައުންސިލާއެކު ބޭއްވި ބައްދަލުމުގައި ވާހަކަ ދައްކަވަމުން އުލިގަމު ކައުންސިލުގެ ރައީސް އަޙްމަދު މުއާޒު މުހައްމަދު އަދި ކައުންސިލް މެމްބަރު އިމާދު އަބްދުﷲ ވިދާޅުވީ، އުލިގަމުގައި ޒަމާނުއްސުރެން ކޮންމެ ދުވަހަކު އެތައް ޔޮޓްފަހަރެއް ބަނދަރު ކުރާކަމަށާއި ރާއްޖޭގެ މީހުން ދިރިއުޅޭ ރަށްތަކުގެ ތެރެއިން އެންމެ ގިނަ ފަތުރުވެރިން ޚިދުމަތް ހޯދަމުންދާ ރަށަކަށްވެސް އުލިގަމު ވާނެ ކަމަށެވެ. ނަމަވެސް ޤައިވާދަށާއި އުޞޫލްތަކަށް ސަރުކާރުން ގެނައި ބަދަލުތަކުގެ ސަބަބުން މިހާރު ޔޮޓް ފަހަރު އުލިގަމަށް އަންނަ މިންވަރު މަދުވެފައިވާ ކަމަށެވެ.
އުލިގަމު ކައުންސިލާއެކު، އެބައްދަލުވުމުގައި ބައިވެރިވި، އުލިގަމުގައި ޔޮޓް ފަހަރުގެ ލޯކަލް އެޖެންޓެއްގެ ގޮތުގައި މަސައްކަތް ކުރަމުން އަންނަ އަސަދުﷲ މުޙައްމަދު ވިދާޅުވީ، ޔޮޓް ފަހަރު ބަނދަރުކުރުން ބޮޑުތަނުން މަދުވެފައިވަނީ ވޭތުވެދިޔަ ސަރުކާރުތަކުން ޤައިވާދަށާއި ފީނެގުމުގެ އުޞޫލުތަކަށް ގެނައި ބަދަލުތަކުގެ ސަބަބުން ކަމަށެވެ. އޭނާ ވިދާޅުވީ، ވޭތުވެދިޔަ ސަރުކާރުތަކަށް އެކަމުގައި ހުރި ގޮތްޖެހުންތައް ޙިއްސާކުރި ކަމަށެވެ. އެހެންނަމަވެސް އެމީހުންގެ ފާޅުކުރި ކަންބޮޑުވުންތަކަށް ވޭތުވެދިޔަ ސަރުކާރުތަކުން ދިނީ ބީރު ކަންފަތެއް ކަމަށެވެ.
އަސަދުﷲ ވިދާޅުވީ، އެންމެބޮޑު ގޮންޖެހުމަކީ، ޤަވާއިދު ހަދާއިރު، ބޮޑެތި ކުރޫޒްލައިނާ ފަދަ އުޅަނދުތަކަށް ޢަމާޒުކޮށްގެން ޤަވާއިދު ހެދުމުން ޔޮޓް ފަހަރު ނުވަތަ ސެއިލަރސްގެ ގޮތުގައި ރާއްޖެ އަންނަ ކުދި އުޅަނދު ފަހަރަށް ދިމާވާ ގޮންޖެހުންތައް ކަމަށެވެ. އެގޮތުން ކެޓަގަރީ ނުކޮށް، ބޮޑެތި ކުރޫޒު ލައިނާ ފަދަ އުޅަނދުތަކާއި ސެއިލަރސްގެ ގޮތުގައި އަންނަ ކުދި އުޅަނދު ފަހަރުތަކުގެ އަތުން ނަގާ ފީ އެއް ހަމައެއްގައި ނެގުމަކީ އެއީ ހަމަޖެހޭ އުޞޫލެއްކަމަށް ޤަބޫލު ނުކުރެވޭ ކަމަށެވެ.
އެގޮތުން އޭނާ ވިދާޅުވީ، ބޮޑެތި ކުރޫޒް ލައިނާ ފަދަ އުޅަނދުތަކަކީ ގިނަ ޢަދަދެއްގެ ފަތުރުވެރިން ގޮވައިގެން ދުނިޔޭއެކި ކަންކޮޅުތަކަށް ދަތުރުކުރާ އުޅަނދުތަކަށްވެފައި، އެއީ ކުރޫޒްލައިނާއިން ކުރާ ވިޔަފާރިއެއް ކަމަށެވެ. ނަމަވެސް ޔޮޓް ފަހަރާއި ސެއިލަރސްގެ ގޮތުގައި އަންނަ ފަތުރުވެރިންނަކީ، އެމީހުންގެ ހިތްހަމަޖެހުމަށް އަމިއްލަ އުޅަނދުގައި ރިޓަޔަރ ކޮށްފައި ތިބޭ ދެމަފިރިން ނުވަތަ ދެތިން މީހަކު، ވަރަށް ކުޑަ ބަޖެޓެއްގައި ކުރަމުންދާ ދަތުރުތަކެއްކަން އޭނާ ފާހަގަކުރެއްވިއެވެ.
އެހެންކަމުން ކްރޫޒް ލައިނާއިން 5،000ރ ނަގާފައި، ސެއިލަރސްގެ ގޮތުގައި އަންނަ ކުދި އުޅަނދު ފަހަރުން 5،000ރ ނެގުމަކީ ހަމަޖެހޭ ކަމެއްގެ ގޮތުގައި ޤަބޫލު ނުކުރެވޭ ކަމަށް ވެސް އަސަދުﷲ ވިދާޅުވި އެވެ.
އަސަދުﷲ ވިދާޅުވީ ސެއިލަރސްގެ ގޮތުގައި އަންނަ ޔޮޓް ފަހަރުތައް މައިގަނޑު ގޮތެއްގައި އުލިގަމަށް ބަނދަރު ކުރަނީ އެމީހުންނަށް ބޭނުންވާ ކާނާއާއި ތެލާ ފެންފަދަ ތަކެތި ބަރުކުރުމަށާއި، ކުދިކުދި މަރާމާތު ކޮށްލުމަށް ކަމަށެވެ. އަދި އެމީހުންނަކީ ފަތުރުވެރިންގެ ގޮތުގައި މާނަ ކުރުމަށްވުރެ، އެމީހުންނަކީ ދަތުރުވެރިންގެ ގޮތުގައި، ޤަވާއިދު ހަދާއިރު މާނަ ކުރުމުން ކޮންމެވެސް ވަރެއްގެ ޙައްލެއް ލިބިގެންދާނެ ކަމަށް ވެސް އަސަދުﷲ ވިދާޅުވި އެވެ.
މީގެއިތުރުން އަސަދުﷲ ވިދާޅުވީ، އުލިގަމުގައި ބަނދަރުކުރާ ޔޮޓް ފަހަރު ބަނދަރު ކުރުމާއި ފުރުވާލުމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ދައުރެއް އޮތްއިރު، މިހާތަނަށް އުލިގަމުގައި އެމްޕީއެލްގެ އިދާރާއެއް އަދި އެއްވެސް މުވައްޒަފަކު ނުހުންނާތީ ވަރަށް ބޮޑެތި ދަތިތަކާ ކުރިމަތިލާން ޖެހި، ޚިދުމަތް ދިނުމުގައި އުނދަގުލާ ކުރިމަތިލާންޖެހި، ޚިދުމަތް ހޯދާ ޔޮޓް ފަހަރުތަކުގެ ޝަކުވާ އިންތިހާއަށް ލިބެމުންދާ ކަމަށެވެ. ނަމަވެސް އެމްޕީއެލްއަށް ދައްކަންޖެހޭ ފީ ބަރާބަރަށް ދައްކަން ޖެހޭ ކަމަށްވެސް އަސަދުﷲ ވިދާޅުވި އެވެ.
އަސަދުﷲ ވިދާޅުވީ ސަރުކާރުގެ އޮފީސްތަކުން ހޯދަންޖެހޭ ލިޔެކިޔުންތައް ނުވަތަ ހުއްދަތައް ލިބުމުގައި ދަތިތައް ދިމާވާތީ، ބުރާސްފަތި ދުވަހު ހެނދުނު އަންނަ ޔޮޓް ތެލާއި ފެނާއި ކާބޯތަކެތި އަރުވައިގެން ހަމަ އެދުވަހުގެ ހަވީރު ފުރަން ބަލާއިރު، ފުރޭގޮތް ނުވެ، އަދި ހަފުތާ ބަންދާ ދިމާވެއްޖެ ޙާލަތެއްގައި، ދެން އެ ޔޮޓް ފުރުމުގެ އިންތިޒާމު ހަމަޖައްސައިދެވެނީ ހޯމަ ދުވަހު ކަމަށެވެ.
"އަވަށްޓެރި ސްރީލަންކާ އާއި ތައިލޭންޑް އަދި މެލޭޝިއާ ފަދަ ޤައުމުތަކުގައި ޔޮޓް ބަނދަރުކުރާތާ، އެއްގަޑި އިރުގެ ތެރޭގައި ކްލިއަރެންސް ހޯދައިގެން، އެމީހުން ބޭނުންވާ ޚިދުމަތެއް ހޯދައިގެން ފުރޭ، ކީއްވެތޯ ރާއްޖޭގައި އެ ޚިދުމަތް ނުދެވެންވީ،" އަސަދުﷲ ވިދާޅުވި އެވެ.
އަސަދުﷲ ވިދާޅުވީ، ޤަވާއިދުތަކާއި އުޞޫލުތައް އެގޮތަށް ހުންނާތީ، ޔޮޓް ދަތުރުފަތުރު ކުރާ ފަރާތްކާއި، އެމީހުންގެ އެޖެންޓުން ކަންބޮޑުވާ ކަމަށާއި، އެފަދަ ބައެއް ޝުޢޫރުތައް ނުވަތަ ކޮމެންޓުތައް ދުނިޔޭގެ މަޝްހޫރު ބައެއް ވެބްސައިޓްތަކުގައި ލިޔެފައި ހުންނަ ކަމަށެވެ.
