ލަންޑަން ބްރިޖު ހަމަލާ: އާންމުންގެ 2 މީހަކު މަރުވެ 3 މީހަކު ޒަހަމްވެފައިވޭ

ހުކުރު ދުވަހު ލަންޑަން ބްރިޖު މަތީގައި ހިނގި ހާދިސާގައި އާންމުންގެ 2 މީހަކު މަރުވެ 3 މީހަކު ޒަހަމްވެއްޖެއެވެ.

ލަންޑަންގެ މެޓްރޮޕޮލިޓިއަން ޕޮލިސް ކޮމިޝަނަރ ކްރެސިޑާ ޑިކް އާއި ހަވާލާދީ ބީބީސީގައި ރިޕޯރޓްކޮށްފައިވަނީ ، މި ހާދިސާއަކީ ޓެރަރިސްޓު ހަމަލާއެއްގެ ގޮތުގައި ކަނޑައަޅާފައިވާ ކަމަށާއި، ފުލުހުންނަށް ހާދިސާގެ ރިޕޯރޓް ލިބުނުތާ 5 މިނެޓް ތެރޭގައި އެތަނަށް ގޮސް ހަމަލާދިން މީހާ ގަޔަށް ބަޑިޖަހައި މަރާލާފައިވާ ކަމަށެވެ. އެގޮތުން އޭނާ ހުރީ ގައިގައި ބޮން ހަރުކޮށްގެން ކަމަށް ފުލުހުން ބުނެފައިވެއެވެ.

މި ހާދިސާގައި އާންމުންގެ ތެރެއިން 2 މީހެއްގެ ގަޔަށް އޭނާ ވަޅިން ހަމަލާދީ މަރާލާފައިވާއިރު، އެ ސަރަހައްދުގައި އެވަގުތު އޮކްސްފޯރޑްގެ ގިނަ އަދަދެއްގެ ދަރިވަރުންނާއި އާންމުން ތިބި ކަމަށް ފުލުހުން ބުނެފައިވެއެވެ.

ޑިކް އާއި ހަވާލާދީ ބީބީސީގައި ބުނެފައިވަނީ މި ހާދިސާ ހިނގި ގޮތުގެ ފުރިހަމަ ތަހުޤީޤެއް ހިންގާނެ ކަމަށާއި، މި ހަމަލާގައި އިތުރު މީހެއްގެ ބައިވެރިވުމެއް އޮތްތޯ ބަލަމުންދާ ކަމަށެވެ. އަދި މަރުވި މީހުން ދެނެގަތުމުގެ މަސައްކަތް އޮފިސަރުން ކުރަމުންދާ ކަމަށް ޑިކް ބުނެފައިވެއެވެ.

މި ހާދިސާއާއި ގުޅޭގޮތުން އާންމުވެފައިވާ ވީޑިއޯއިން އާންމުންގެ ތެރެއިން ބަޔަކު އޭނާއާއި ކުރިމަތިލާ މަންޒަރު ފެނިފައިވާއިރު، މި ހާދިސާގައި އާންމުންގެ ފަރާތުން ދެއްކި ހިތްވަރަށް އެ ޤައުމުގެ ބޮޑުވަޒީރު ބޯރިސް ޖޯންސަންވެސް ވަނީ ތައުރީފު ކުރައްވާފައެވެ.

ލަންޑަންގައި ގިނަ އަދަދެއްގެ ދިވެހިންވެސް ދިރިއުޅޭއިރު، ލަންޑަން ބުރިޖާ ދިވެހިން ކައިރިނުވާން އިނގިރޭސި ވިލާތުގައި ހުންނަ ދިވެހި އެންބަސީން ވަނީ އިލްތިމާސް ކޮށްފައެވެ.

މިހާދިސާއާ ގުޅިގެން އެންބަސީން ބުނީ އެއްވެސް ދިވެއްސަކަށް އަނިޔާވެފައިވާ ކަމުގެ މައުލޫމާތު އަދި ލިބިފައިނުވާ ކަމަށާއި، ހާލަތުގެ ގޮތުން އެއްވެސް ދިވެއްސެއް ލަންޑަން ބުރިޖާއި ގާތް ނުވުމަށް އިލްތިމާސްކުރާ ކަމަށެވެ.