ޕީޖީ ބިޝާމް މަޤާމުން އިސްތިއުފާ ދެއްވައިފި
28 ނޮވެމްބަރު 2019 | ބުރާސްފަތި 06:19އިސްތިއުފާދެއްވީ ބުރާސްފަތި ދުވަހު ހެނދުނުގެ ވަގުތެއްގައި
ޕްރޮސެކިއުޓަރ ޖެނެރަލް އައިޝަތު ބިޝާމް
ޕްރޮސެކިއުޓަރ ޖެނެރަލް އައިޝަތު ބިޝާމް މަޤާމުން އިސްތިއުފާ ދެއްވައިފިއެވެ.
ބުރާސްފަތި ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވި ޓްވީޓެއްގައި ވިދާޅުވީ، ޕީޖީ ބިޝާމްގެ އިސްތިއުފާގެ ސިޓީ ލިބިވަޑައިގެންފައިވާ ކަމަށާއި، އެކަމަނާގެ ޚިދުމަތަށް ޝުކުރު ދަންނަވާ ކަމަށެވެ. އަދި އެކަމަނާއަށް ކާމިޔާބީއަށް އެދިވަޑައިގަންނަވާކަމަށްވެސް ރައީސް ވިދާޅުވިއެވެ.
މަޤާމުން އިސްތިއުފާ ދެއްވުމުގެކުރިން ބިޝާމް ނެރުއްވި ބަޔާނެއްގައި ވިދާޅުވެފައިވަނީ މަގާމުން ވަކިކުރަން، މަޤާމުން ވަކިކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމެޓީން ފައްޓަވާފައިވާ އިޖުރާއަތުތަކަކީ އިހުލާސްތެރި ނިޔަތެއްގައި ކުރިއަށް ގެންދަވާ އަދި ގާނޫނުއަސާސީގެ ނައްޞާއި ރޫހާއެއްގޮތަށް ކުރިއަށް ގެންދަވާ އިޖުރާއަތުތަކެއްކަމުގައި ގަބޫލުނުކުރެވޭކަމަށެވެ.
ބަޔާނުގައި މައިގަނޑު ގޮތެއްގައި ވިދާޅުވެފައިވަނީ، މަގާމުން ވަކިކުރުމުގެ މައްސަލައެއް ޖުޑީޝަރީ ކޮމެޓީން މަޖިލީހުގެ ރައީސަށް ފޮނުއްވުމުން މަޖިލީހުގެ ރައީސް އެ މައްސަލަ މަޖިލީހުގެ ތަޅުމަށް އިއްވަމުން ވިދާޅުވި ވާހަކަފުޅާއި، އެމައްސަލަ ކޮމެޓީއަށް ދިރާސާ ކުރުމަށް ފޮނުއްވުމުން، ކޮމެޓީން އެމައްސަލާގައި އަމަލު ކުރާގޮތް ތަފާތު ކަމަށެވެ. އެކަން ފާހަގަކުރައްވާ ޕީޖީ ބިޝާމްގެ ބަޔާނުގައި ވަނީ، އޭނާ މަގާމުން ވަކިކުރެއްވުމުގެ މައްސަލަ މަޖިލީހުގެ ރައީސް މަޖިލީހުގެ ޖަލްސާއަށް އިއްވަމުން ވިދާޅުވެފައިވަނީ، މީހުން މެރުމާއި، ވަގަށް ނަގުމަށްފަހު، މަރާލެވިފައިވާ، އަހުމަދު ރިލްވާން އަބްދުﷲގެ މައްސަލަތަކުގެ ރިޕޯޓްތަކަށް މަޖިލީހަށް ހުށަހެޅި މެމްބަރުން ބަހުސް ކުރައްވާއިރު، އަދި ވައްކަމާއި ފަސާދައާއި އަނިޔާއާއި ޓެރެރިޒަމްގެ އަމަލުތަކާއި ހައްދުފަހަނަ އެޅުމުގެ އަމަލުތަކާއި، މީގެން އެއްވެސް ކަމަކާ ގުޅޭގޮތުން ޕްރޮސެކިއުޝަނެއް އެކަށީގެންވާ ގޮތުގައި ހިނގާފައިވާތަން މެމްބަރުން ގަބޫލު ނުކުރައްވާކަން މަޖިލީހުގެ މެމްބަރުން މަޖިލީހުގެ ތަޅުމުގައި ދައްކަވާ ވާހަކަތަކުންނާއި ބައްދަލުވުންތަކުން އެނގޭ ކަމަށެވެ. އެހެންކަމުން ގާނޫނުއަސާސީގެ 228 ވަނަ މާއްދާގެ (ހ) ގައި ބުނާ ހާލަތަށް ރިއާޔަތްކޮށް، މަޖިލީހުގެ ޖުޑީޝަރީ ކޮމެޓީއަށް ޕީޖީ ބިޝާމް މަގާމުން ވަކިކުރުމުގެ މައްސަލަ ކުރިއަށް ގެންދިއުމަށް މަޖިލީހުގެ ރައީސް ދަންނަވާފައިވާ ކަމަށް ބިޝާމްގެ ބަޔާނުގައިވެއެވެ.
ބިޝާމްގެ ބަޔާނުގައި ވިދާޅުވެފައިވަނީ، ރައްޔިތުންގެ މަޖިލީހުގެ ރައީސް އެގޮތަށް ވިދާޅުވެ، އޭނާ މަގާމުން ވަކިކުރެއްވުމަށް، ޖުޑިޝަރީ ކޮމެޓީއަށް ފޮނުއްވުމުން، އެކޮމެޓީން ބޭއްވި ބައްދަލުވުމުގައި އެ ކޮމެޓީގެ ބައެއް މެމްބަރުން ވިދާޅުވަމުން ގެންދެވީ ގާނޫނުއަސާސީގެ 43 ވަނަ މާއްދާއަށް ރިޔާއަތްކޮށް، ޕީޖީގެ މަގާމުން އޭނާ ވަކިކުރުމުގެ ސަބަބެއް ކަމަށެވެ.
ބިޝާމް ވިދާޅުވަނީ، އޭނާ މަގާމުން ވަކިކުރުމުގެ ސަބަބެއް ކަމަށް މަޖިލީހުގެ ރައީސް ވިދާޅުވި ވިދާޅުވުމާއި، ޖުޑީޝަރީ ކޮމެޓީން ފާހަގަކުރާ ސަބަބުތަކާ އެއްގޮތް ކަމަށް ގަބޫލު ނުކުރެއްވޭ ކަމަށެވެ.
ޕީޖީ ބިޝާމަކީ ކުރީގެ ރައީސް އަބްދުﷲ ޔާމީން ސަރުކާރުން އެމްއެމްޕީއާރުސީގެ ބޮޑު ހިޔާނާތާއި މީހުން މެރުމާއި، ބޮޑެތި ޖަރީމާތައް ރާއްޖޭގައި ހިނގާދިޔައިރު، ވެސް އެމަގާމުގައި ހުންނެވި ފަރާތެވެ. އިދިކޮޅު ސިޔާސީ ލީޑަރުން ޖަލަށްލައި، މަޖިލީހުގެ ގިނަ މެމްބަރުންތަކެއް ޖަލަށްލިއިރުވެސް ޕީޖީގެ މަގާމުގައި ހުންނެވީ ބިޝާމް އެވެ.
