ޑިސެމްބަރު މަހު ނޭޕާލުގައި ފެށުމަށް ހަމަޖެހިފައިވާ 13 ވަނަ ސައުތް އޭޝިއަން ގޭމްސްގައި ވާދަކުރުމަށް ރާއްޖޭގެ 23 އަހަރުން ދަށުގެ ފުޓުބޯޅަ ޓީމު ނޭޕާލަށް ފުރައިފިއެވެ.

މިފަހަރުގެ ސައުތް އޭޝިއަން ގޭމްސްގައި ރާއްޖެއިން ލައްވައިލައިފައިވަނީ އިންޑިއާއާއި އެއް ގްރޫޕެއްގައެވެ. މި ގްރޫޕްގައި ދެން ހިމެނިފައިވަނީ ސްރީލަންކާއެވެ. އެންމެ ފަހުގެ ގޭމްސްގައި ވެސް ރާއްޖެއިން ލައްވައިލައިފައިވަނީ މި ދެޓީމާއި އެއް ގްރޫޕެއްގައެވެ.

ގޭމްސްއަށް ފުރުމުގެ ކުރިން މީޑިއާ އާއި ވާހަކަދައްކަމުން ރާއްޖެ ޓީމުގެ ކޯޗު ޕީޓާ ސެގާޓް ބުނީ އަނިޔާގެ ސަބަބުން މުހިންމު ގިނަ ކުޅުންތެރިންނަށް މި މުބާރާތުގައި ބައިވެރިނުވެވޭ ކަމަށާއި ނަމަވެސް ގޭމްސްއަށްދާ ސްކޮޑަކީ ވަރުގަދަ އަދި ނަތީޖާ ނެރެވޭނެ ސްކޮޑެއް ކަމަށެވެ.

މި މުބާރާތުގެ ގްރޫޕް "އޭ" ގައި ހިމެނިފައިވަނީ މުބާރާތް ބާއްވާ ގައުމު ނޭޕާލް، ބަންގްލަދޭޝް އަދި ބޫޓާނެވެ.

13 ވަނަ ސައުތް އޭޝިއަން ގޭމްސްގެ ފުޓުބޯޅަ އިވެންޓްގެ ކުޅުން ފަށާނީ ޑިސެމްބަރު މަހުގެ އެއްވަނަ ދުވަހުއެވެ. މުބާރާތް ހުޅުވުމުގެ ގޮތުން ކުޅޭ މެޗުގައި ބައްދަލުކުރާނީ ނޭޕާލާއި ބަންގްލަދޭޝްއެވެ.

މި މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ ދެ ޓީމެވެ.

މިއަހަރުގެ ސައުތް އޭޝިއަން ގޭމްސްގައި ރާއްޖޭގެ 23 އަހަރުން ދަށުގެ ފިރިހެން ފުޓުބޯޅަ ޓީމުގެ އިތުރުން އަންހެން ފުޓުބޯޅަ ޓީމުވެސް ބައިވެރިވާނެއެވެ. އެގޮތުން އަންހެން ފުޓުބޯޅަ އިވެންޓްގައި ވާދަކުރާނީ ރާއްޖޭގެ އިތުރުން ނޭޕާލް، އިންޑިއާ އަދި ސްރީލަންކާ އެވެ.